Mak 11
11
Jises akohok sisi-in ma iy imek, ano iy amak ja
(Kalan 11–16)
Jises ili Jerusalem i buku kabin
(Metiu 21:1-11; Luk 19:28-40; Jon 12:12-19)
1Eme oro ame mirihik ta Jerusalem ya ame kon Betapes ma Betani udu loboho kesehe mandrei Olip. Eme Jises suni uru lau tan la-uh, 2ma iy tiye i turu i buku doh, “Ah kala kon to anyolom i aliy don. Suwi labai ah kameh atou nadu donki ari loweu, ari ndramak bamanyah bare bwele-en bwe le. Ya ah katolowei malou ma kasiriniy keme. 3I buku none are lau kandremenya ah anya, ‘Ah abo sah kede-eh?’ Ah katiye ki buku doh, ‘Laban gok udu tan, ano iy baratiyaniy barame hamon ja!’”
4Eme uru au ma atou nadu donki badeh, iri sakabwitiniy udu ta kou udu alih ta san ili bolo kon, eme uru tolowei malou iu. 5Eme iri lau rayah ales are loboho doh ndremenya uru, “Hei, ah anya katalou donki badeh, ta sasah?”
6Eme uru tiye sahou nane Jises asehek i turu, eme oro tiye uru kandrei ma katiyaniy kili. 7Eme uru sirini donki ili hawe Jises, ma oro lau tan lowosani kolau toro lawe-en badu bwele-e awin toro i kona donki nane, ya Jises ili manyah udu bwele-en. 8Eme iri lau solo-an labai talou kolau tiri lawe-en badu bwele-e awin tiri ya iri talaha ili madasan. Ya iri ra-on badeh, ala asan la-u kei badu bilin ma anyehe i andri. 9Eme iri lau ra-on adek ala bwena ta Jises ma hawe iri ra-on adek an hamon badeh aloh i buku doh,
“Hosana!
Kasekesek iy!
Kasore nyaran!
Iy eme ta nyara Laban! Wari 118:25-26
10Kasore tondrok ta tama Debit kameh, eme!
Hosana!
Kasekesek ki loken mara-ei!”
11Eme ma oro ala asos kon tinan Jerusalem. Ma Jises hawe oro lau tan ala bolo asiu tinan ta Kindrei. Ano oro anyolom ili eme i ta lakou mari. Arile, an anya kamai ki-iu ki andri ai. Eme ma oro ruwani Jerusalem ma adek au ala kon bwisik Betani, ma oro amadin doh.
Jises tiye kei pik winiyan bato-ou salin bwe
(Metiu 21:18-19)
12Ya eme na len ari ja, oro are Betani ame len, ma Jises imeson andra-i labai. 13Eme iy ere ndra len, iy atou kei pik ra-ei, suhuyen labai. Eme iy edek ili bada kei dah, anya katou buwa pik dah udu aliy deh bwe. Arile iy ili badeh, iy batou se ari bwe, laba le la-un, tasah bamwenen ta len ta buwa pik bwe. 14Eme Jises tiye i ta kei nane i buku doh, “Iri lau winiyan baimon salim ja bwai.” Eme oro lau tan anuhun sahou iy asehek.
Jises atikah iri amekes baen ado asiu tinan ta Kindrei
(Metiu 21:12-17; Luk 19:45-48; Jon 2:13-22)
15Eme oro ame Jerusalem ma Jises iu ili bolo asiu tinan ta Kindrei ya iy atikah iri lau amekes ba-en udu asiu doh. Eme Jises bukudi iri sau tiri lau ta tokoha luk, ma hawe bwabwai tiri lau asih iri sirih aloh ban. 16Ya iy baseken are lau sabwese lakou sala bolo asiu doh, ndri-iy. 17Eme Jises leheya iri mwan ma badih, ma iy tiye i tiri, “Sebwe buk ndrabun ndratiye nadeh? Tiye i buku doh,
‘Asiu tek dah, ta lau mari badu munyak tinan mari ta salom,’ Aisaya 56:7
arile aha ndramesekei asiu tek, ndrasahan
‘asumwe iri lau ta bahana.’ ” Jeremaya 7:11
18Jises asehek i buku doh, ma iri lau tinan tiri pris hawe iri lau ta leheya kandriyen tiri Juwis anuhun iy. Eme iri anoh iy, tasah iri lau mari boho iri asak ta leheya tan. Eme iri lomondra ta anya kadai iy.
19Len mara-ei Jises hawe oro lau tan amekes i buku doh: Kon a beyeh, oro adek are kon tinan au ala amadin a bolo kon bwisik.
Kei pik ndrasara ma sahou tanan ta aliy
(Metiu 21:20-22)
20Eme mandraben ta len ari ja badeh, oro adek anya kala hamon kala Jerusalem. Eme oro anyolom kei pik mene Jises asehek sahou i tan badeh, ndrasara mara-ei, udu ta la-un ili isos bada kandron. 21Ya Pita, balen bamaniy bwe, eme iy anya, “Ou anyolom, ndramak ta leheya, kei pik mene ou tiye sahou boto-on i ta aliy, badeh, ndrasara mara-ei!”
22Pita asehek i buku doh badeh, ma Jises tiye ili toro lau tan anya, “Ado kanuhun! Ado katehei budon tado handru badeh, kili ta Kindrei. 23Jo asehek sahou handru ewek tado, ou are lau asehek sahou i ta mandrei doh anya, ‘Ou suri ou ya ou sandroh ala bolo ndras,’ ma budon ta nohonoh sa-en ndrinem, arile budon tam handru ki-in ta lakou ou asehek, idah kameh asahan tam buku le ou nane ndratiye. 24Ya ta sehek ta aliy i buku doh, sasah ou ndremenya i san ta salom, ya budon tam ki-in ta aliy handru i buku ou ndrandrei, idah kameh ou andrei handru. 25Ya i buku none ou are ales ta salom badeh, ou badeh, balem kamani saba lomondra ndra-in ta bada are lau, ya idah kameh ou ale tamam Kindrei udu kandrah kameh sikine lomondra ndra-in tam iu.” [ 26“Arile, buku ou bamani lomondra ndra-in ta bada iri rayah bwe, tamam Kindrei udu kandrah ale kameh winiyan basikine lomondra ndra-in tam bwe ale.”]
Oro ndremenya Jises are lau handru edeu boto-on i tan
(Metiu 21:23-27; Luk 20:1-8)
27Eme oro ame asahan Jerusalem ja. Ya eme iy edek ili bolo asiu tinan ta Kindrei le badeh, iri tinan tiri pris hawe iri lau ta leheya kandriyen tiri Juwis hawe iri lau-en badeh, ame hawen. 28Eme iri ndremenya Jises, “Ou akohok boto-on badu heh handru, ma ou amekes iri lakou kede-eh? Are lau atehei nyaran tinan ewek tam ma tiye ou ta amekes iri lahou dah?”
29Ya eme Jises tiye i tiri, “Jo ale anya kandremenya aha ta lakou ari. Ano buku none aha tiye amwenen eme tek, sebwe jo kameh tiye ewek taha are lau handru atehei boto-on eme tek ta amekes gok dah. 30Kala Jon mene alomwa iri lau, iy akohok boto-on badu heh? Lokou doh badu kandrah deh, badu kon munyak le? Aha tiye keme tek.”
31Eme iri andres udu ndrokowa oro le i buku doh, “Buku none to katiye anya, ‘Idoh lakou badu kandrah,’ idah kameh iy ndremenya to ja anya, ‘Buku sah handru ya aha batehei budon taha bala ta aliy bwe?’ 32Arile, buku none to katiye anya, ‘Idoh kandriyen tiri lau le,’ winiyan bwe nadeh?” Iri lomondra i buku doh. Iri anoh iri lau tasah iri lau anya, Jon badeh, propet ta Kindrei handru. 33Eme iri asumon boho Jises i buku doh, “Ahi tana ahi bwe.”
Eme Jises tiye tiri i buku doh, “Jo ale jo winiyan batiye bawek taha ta are lau handru atehei nyaran tinan eme tek ya jo amekes iri gok dah bwe.”
Actualmente seleccionado:
Mak 11: lidNTpo
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 2001, Wycliffe Bible Translators, Inc. All rights reserved.