Efes-sâ 6
6
Gugureina ki simiyêziya
1Agi gugureina, vama djivina avok Salad’a, agi humugi vun simiyêgiya. 2Ar ang hu abung kasungû. Wana ni vun ma he ma avok ma nga zlapa ki vun ma hled’ina. 3Hina wani, ang mba kak ki djivid’a, ang mba te ngola tatâ yam andagad’a mi.
4Agi abuyod’a, ar agi djogi grogina ki zlad’a d’i, wani agi wuluzi akulo, agi gad’aziya, agi had’azi zlad’a hi Salad’id’a mi.
Magumeina ki suliyozina
5Agi magumeina, agi humugi zlad’a hi suliyogi suma yam andagad’a ka hina ki mandarâ ki zlaka ki hur ma tuna d’igi ni mi Christ na. 6Ar agi lagi ni ir suma a lazi tazi djivid’a go d’i, wani agi lagi minda hAlonid’a ki hurugi pet d’igi magumeina hi Christ-sâ na mi. 7Ar agi lagi sun magomba ki hur ma djivina d’igi agi nga lat mi Salad’a na, nga ni mi suma hol li. 8Agi wagiya, sama lara pî, magoma d’oze gor vuta, Salad’a mba mi wuragam yam sun mam mba djivid’a mi lata.
9Agi suliyozina, agi lazi hina mi. Agi aragi ngopa woyo, kayam agi wagi ala azi ki agi djak, Salagi ma sä akulona nga mi pat sana yam iram go d’i.
Ahle suma dur ayîna hi kretiyênina
10Vama arâ, agi siragi ngingring zlapa tu ki Salad’a, kur sib’ika had’eng mambid’a mi. 11Ar agi tchugugi ahle suma dur ayîna hAlonina pet atagiya, kayam agi fagi ad’enga á tchologi ngingring kayam lemba hi Diable-d’a. 12Kayam ei duri ayîna ni ki suma d’i, wani ni ki muzuk ma teteng ma tcho ma te yamba, ni ki muzuk ma teteng ma tcho ma ad’eng ma nga mi te yam duniya d’a nduvun nda wandina, ni ki muzuk ma teteng ma tcho ma nga aduk akulod’ina. 13Kayam ndata, ar agi yogi ahle suma dur ayîna hAlonina pet abogiya, kayam agi fagi ad’enga á tchologi á d’elem kur bur ma tchona. Bugol la agi kuzugi yam ahlena peta, agi tchologi ngingring.
14Agi minigi tagiya. Agi siragi ngingring kur gagazid’a d’igi sana mi djin d’i’â furum na. Agi tchugugi d’ingêra atagi d’igi kongrongâ na. 15Agi tchugugi atuguru ma min tad’a asegi á tchi wal Zla d’a Djivi d’a mba ki b’leng nga halasid’a. 16Ata yima lara ge pet, agi tchologi ki he gagazid’a d’igi sana mi tchol ki mbareid’a abom na, kayam agi fagi ad’enga á tchagi si djam mba zala hi ma tchonid’a woi pet. 17Agi kulubugi suta kagi d’igi djumba na, agi vagi zlad’a hAlonid’a d’igi mbigeu d’a fiyak ka Muzu’â hAlonina mi hagizid’a na. 18Agi lagi ahle ndazina pet ni kur tchenda. Agi tchenegi Alona mi ndjunugiya. Agi tchenegi Alona ata yima lara ge pet yam ad’enga hi Muzuk mamid’a. Agi kagagi ki ndjola teteu ki d’engzenga. Agi tchenegi Alona yam sum mama pet mi. 19Agi tchenegi Alona kan mi, kayam mi han ad’enga á de zla d’a irata bei mandarâ ba, á väd’u zla d’a mudurid’a hi Zla d’a Djivid’id’a woi abua. 20Kayam Zla d’a Djivid’a, an vrak blangâm kur dangeina. Agi tchenegi Alona kan á de zlad’a bei mandarâ ba, tala ndak á ded’a d’a.
Dep pa dabid’a
21Wiyeina Tisik ma hurun vum heî ma d’engzeng ma sunda hi Salad’ina, mba mi vagi ad’u zla manda pet kahle suma an nga ni lazi ka hina mi. 22An sunugizi sä kayam mi vagi ad’ud’a yam kak mamid’a, á b’lengêgi hurugi mi. 23Alona Abui ki Salad’a Jesus Christ a he b’leng nga halasa mi b’oziyoina ki od’a ki he gagazid’a mi. 24Ar Alona mi ve suma pet suma a nga le yam Saleina Jesus Christ ki od’a bei dabid’a ba d’ina sumad’a.
Currently Selected:
Efes-sâ 6: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.