Efes-sâ 5
5
Tit ta kur b’od’id’a
1Agi hlagi balum asem Alona d’igi grom suma mam le kazi heîna na. 2Ar agi tid’igi kur od’a d’igi Christ mi le kei na mi. Mi he tam mbei kei d’igi vama he ma ngat buzu ma his ma afufuî ma lAlona tam djivid’ina na.
3Wani agi ni suma a tinigi iragi vagina. Kayam ndata, ar mizeuna ki sun nda ndjendjed’a ki a’arad’a, ar agi yazi simiyêzi adigagi d’i. 4Wani zla d’a zulona ki sun nda lilid’a ki zla d’a tchibeta, ar agi yazi simiyêzi d’uo mi, wani vama kalâ, kur tchen magid’a, agi lagi ni mersi mAlona. 5Agi wagi woi tetet ala sama mizeuna, sama le sun nda ndjendjed’a, sama le d’od’oka yam beged’ina, nala ma tuwal fileina, suma hina na a mba te leud’a hi Christ-sa kAlona d’i.
6Ar sana mi lobogi ki zla d’a de d’a hawa yaka d’i. Ni kayam ahle ndazina ba, ayîna hAlonina nga mi mba yam suma bei humum vunam ba na. 7Kayam ndata, ar agi zlabagi darigïd’a ki sum ndazina d’i. 8Kayam adjeu agi ni kur nduvunda, wani ki tchetchemba, agi zlabagi tu ki Salad’a, agi ni kur b’od’a. Kayam ndata, agi tid’igi d’igi suma a nga kur b’od’ina na. 9Kayam sama nga kur b’od’ina nga mi landjaf sun nda djivi d’a lara ge pet ki d’ingêra ki gagazid’a mi. 10Agi b’ad’agi tagi á le vama mi le Salad’a tam djivid’ina. 11Agi lagi darigïd’a ki suma a nga le sun nda hawa yak ka kur nduvundina d’i, wani vama kalâ, agi ngobozi ni ngoba, 12kayam ahle suma azi nga lazi gumuna ni zulona á ded’a. 13Kayam sama nga kur b’od’ina, sun mamba led’a ni woi pid’agï, 14kayam b’od’a nga d’i ndahlena woi pet pid’agï. Kayam ndata, suma hiuna a dala:
Ang ma bur senina, ang zlid’a,
ang tchol lei aduk suma matna.
Hina wani, Christ mba mi b’o woi kangû.
15Kayam ndata, agi gologi tagi djivi yam tit magid’a. Ar agi tid’igi d’igi suma bei ned’a na d’i, wani d’igi suma ned’a na. 16Ata yima agi fagi yinina, agi lagi wat, kayam atchogoi d’a ei nga kurut wanda ti tchod’a. 17Kayam ndata, ar agi kagagi d’igi suma lilid’a na d’i, wani agi b’ad’agi tagi á wäd’u vama Salad’a mi min ala agi lagiziya na.
18Ar agi gurud’ugi ki süma tala mi igi kur tit ta batranga d’a d’i. Wani agi oyôgi ni ki Muzu’â hAlonina. 19Ar agi dagi zlad’a ata tagi ni ki sawal la giled’a ki sawala hAlonid’a ki sawala hi Muzuk mamid’a mi. Agi gagi sawala, ar agi gilegi Salad’a kurugi mi. 20Ar agi lagi mersi teteu mAbui Alona yam ahlena pet ki simiyê Saleina Jesus Christ mi.
Aropma kandjuviyoziya
21Ar agi gagi yagi kä ad’u tagi d’igi agi gagi yagi kä avok Christ na mi.
22Aropma, ar agi gagi yagi kä avok andjuviyogi d’igi agi nga gagi yagi kä avok Salad’a na mi. 23Kayam mandjufâ ni yam atchad’a d’igi Christ ni yam Toka na mi. Christ tamba ni Ma sut Tok kala ni hliwimu d’a. 24Wani d’igi Toka ti ge yat kä ad’u Christ na, hina mi, ar aropma a ge yazi kä ad’u andjuviyoziya kur ahlena pet mi.
25Andjuveina, ar agi lagi yam amiyôgina d’igi Christ mi le yam Toka na, mi he tam mbei kat mi. 26Mi mbuzut tei yed’et ki mbina, nala, zlad’a hAlonid’a, mi tinit irat vat mAlona mi. 27Mi le hina kayam Toka ti tchol avorom bei tchod’a ba, bei ndala, bei trobudjoka, bei vama ding ma hina na atat ba, kayam ti ka’î yed’et bei ngula ba. 28Hina mi, mbeî andjuveina a le yam amiyôzina d’igi ni hliu tazi na. Sama nga mi le yam amambina, mi le ni yam mam tamba. 29Kayam sana nga mi noî tam mbi, wani mi hum tena, nga mi ngomom d’igi Christ nga mi le ki Toka na mi, 30kayam ei ni ir hliu tamu. 31D’igi mbaktumba hAlonid’a ti de na ala: Sana mba mi ar abum kasumu, mba mi reî kamamba. Hina, azi djak a mba mbut ni hliu ma tuna. 32Zla d’a muduri ndata ad’ut ti zula heî, wani zla ndata ni ngad’a yam Christ ki Toka. 33Wani zla ndata ni kagi mi. Ar nge nge pî mi le yam amamba d’igi mam tambina. Ar atcha d’a lara ge pî ti he ngola mi ndjuvut mi.
Currently Selected:
Efes-sâ 5: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.