Efes-sâ 4
4
Zlap pa tud’a hi hliu tad’id’a
1Kayam ndata, an ma dangei ma yam Salad’ina nga ni tchenegi ki so tad’a, ar agi tid’igi ndak yam yi d’a Alona mi yagid’a 2ki lulumad’a ki kukud’uka zlapa ki ve tad’a burâ ki burâ. Agi vagi tagi ad’enga á le od’a yam tagiya. 3Yam Muzuk mam ma mi hagizina, agi b’ad’agi tagi á kagagi zlapa tu ki b’leng nga halasa aduk tagiya. 4Agi wagi ala hliu tad’a ni tu, Muzu’â hAlonina ni tu mi, d’igi Alona mi yagi á tinigi hurugi yam vama tuna na mi. 5Salad’a ni tu, he gagazid’a ni tu, batemba ni tu mi. 6Alona ni tu, nAbu suma pet, ni Ma nga mi te yam suma petna, ni Ma nga adigazi petna, ni Ma nga kuruzi petna mi.
7Nge nge pî Alona mi hum he d’a hawad’a d’igi Christ mi humzi na. 8D’igi mbaktumba hAlonid’a ti de na ala:
Ata yima mi tup akulona,
mi yo suma dangeina ad’umu,
mi he he d’a hawad’a mi suma.
9Wani zla d’ala mi tup akulod’a, ad’ut nana ge? Nala, mi surop kä kur yima yiyik ma handagad’ina avok tua. 10Ni mam tam ma surobï kä na, ni ma tup akulo dei á ndak vun ahlena petna. 11Mi he suma dingâ á mbut suma a sunuzina, suma dingâ á mbut suma djok vun Alona, suma dingâ á mbut suma tchi wal Zla d’a Djivid’a, suma dingâ á mbut suma pol suma ki suma hat suma mi. 12Mi le na á mbut suma hAlonina memet á le sunda, á wul hliu tad’a hi Christ-sa akulo kur he gagazid’a, 13á mbud’i kaka zlapa tu kur he gagazi meid’a á we Alona Goroma, á mbud’i suma djengâ ndak á we ndak ka memeta hi Christ-sina. 14Kayam ndata, ar ei kagei d’igi kem suma simet ma lara ge pet nga mi tchazi tata kur hata hi suma kur lop ira ki lem mba vitina na d’uo d’a. 15Wani ei dei ni zla d’a gagazid’a ki od’a á wuli tei akulo kur ahlena pet yam Christ, mam ma ala ni yamba na. 16Yam ad’enga hi Christ-sa, ir hliu tad’a pet nga d’i djak zlapa, sidei ma lara ge pet nga mi djik hliu tad’a pet zlapa mi. Hina, le ir hliu ta d’a lara ge pet nga d’i le sun mata ni, hliu ta ndata pet nga d’i wul akulo, nga d’i min tat akulo kur od’a mi.
Ari d’a awilid’a yam Christ-sa
17Ni kayam ndata ba, an nga ni de, nga ni le glangâsâ ki simiyê Salad’a ala ar agi tid’igi d’igi andjaf suma bei wAlona a nga tit kur djib’er mazi d’a hawa yaka na d’uo d’a. 18Djib’er mazid’a ti mbut nduvunda, azi wal lei dei kari d’a Alona mi hat mi sumid’a, yam vit mazid’a, yam hur mazi ma b’ala mi. 19Kayam huruzi mbut tib’iri’â, a he tazi á le sun nda batranga, á le a’arad’a, á le sun nda ndjendje d’a lara ge pet mi.
20Wani agi had’agi nga tita hi Christ-sa ni na d’i. 21Gagazi, an wala agi humum zlamu, suma a had’agi zla d’a gagazi d’a yam Jesus-d’a mi. 22Kayam ndata, ar agi fogogi sama adjeuna woi ki sun mam mba led’a. Sama nga kurugi adjeuna, ni ma nga mi lobogi á igi kur b’lakina. 23Kal pet, ar agi mbud’ugi ni suma awilina kur muzugagi, kur djib’er magid’a mi. 24Ar agi tchugugi sama awili ma Alona mi gum mi hle tam d’igi mam na na atagiya, ni mam ma nga mi tagagi tit ta gagazi d’a d’ingêr ra agi tinit irat vat mAlonid’a.
25Kayam ndata, agi aragi zla d’a kad’a woyo, wani ar sama lara pî mi de ni zla d’a gagazid’a mi ndrama, kayam ei ni hliu ma tuna. 26Le hurugi zala ni, agi lagi tchod’a d’i. Ar afata nigigi kayî magi ma djulula d’i. 27Agi aragi yina mi Diable d’uo mi. 28Sama kul adjeuna, ar mi kul luo d’a, wani ar mi le ni sunda kabom á fahlena á ndjun suma houd’a. 29Ar zla d’a tchod’a ndavunagi d’i, wani agi dagi ni zla d’a djivi d’a ndak á wul suma kid’aka akulo kur he gagazid’id’a, á ndjun suma a nga hum zla magid’ina mi. 30Ar agi b’lagagi hur Muzuk ma bei tchod’a ba na hAlonina d’i; ni mam ba, kagi ki geuna gak bur ma Alona mba mi yoi sä akulona. 31Zla d’a aglara pet kayîna ki hur ma zala ki yalâ ki ngula, ar agi pad’azi woi pet adigagi zlapa kasa’ata pet mi. 32Wani agi lagi djivid’a aduk tagiya, agi wagi hohowa tagi mi. Ar agi vad’agi hurugi woi yam tagi d’igi Alona mi vat hurum mbei kagi yam Christ na mi.
Currently Selected:
Efes-sâ 4: BA
Highlight
Share
Copy
Want to have your highlights saved across all your devices? Sign up or sign in
Azumeina Bible © Alliance Biblique du Tchad, 1999.