1 Tim 6
6
Geye 'la wɔlɩ
1Maa ‑tɛtɛa ‑ɔ ‑glɩ 'lɛ geye na, ɩ ‑fata lebhe ma kalɩ ma tocɩa 'la zʋlɩɛ ɩya nclɔɔ bhlogbɩɩ 'la ka Laagɔ 'la 'ŋlɩa ɩya cacawɔlɩa 'la wɔɔnyinyi nyɩtɛ. 2‑Ma ‑anʋa, ma tocɩa ya 'lɛ Dɩnanɩa* ‑nʋawlɛ la na, ɩ 'ta ‑fata lebhe ma 'cla lebhe ma ‑glɩnɩ 'lɛ bholiecɩ na, maa cɩ 'tanɩ maa zʋ. ‑Ma ɩ ‑fata lebhe ma lobhonɩ ‑awlɛ maa 'nanɩ, sa maa ma lobho 'lɛ na, ‑glɩnɩ ncɛlɩa ‑ɔ ya 'lɛ Dɩnanɩa ‑nʋawlɛ la, 'nyɩ Laagɔ -wa 'lɛ na. 'Lɩka ɩmɩa ‑n cɩ ka 'lɛ ncɛlɩ ca ɩya ‑n ka 'lɛ maa pala na.
3Gbazɩ nclɔɔ ‑ka ‑buun -wɔlɩ ca, 'nyɩ ɔ 'ta ‑ala ‑Kwlenyɔ Zozi Klisi 'la wɔɔnyɩtʋa 'titi ɩya cacawɔlɩa ɩya Laagɔ 'la gɩlɩwɔlɩa ‑glɩ 'lɛ bhlo na, 'kʋ 'plɩlɩ na, 4'dɛndlana ‑tutule ‑yelio 'nyɩ ɔ 'ta wɔlɩ ‑ylɛylɛ ‑ci. Wɔɔtɩtʋɛ ɩya 'slagbʋslalɩɛ ‑glɩ 'lɛ ɔla gu. 'Lɩka daa woze, wɔɔtɩtʋɛ, Laagɔ 'la vlalɩɛ, 'lɩbhɩlɩbhɩ 5ɩya 'slagbʋa ‑ʋ bhɩa 'ta 'lɛ ncɛlɩa ‑ɔla wɔɔgugwiea ‑gblogbloluo 'lɛ na, sidiin na, 'wlʋlʋ 'lɛ na. Ma 'tanɩ ‑nʋawlɛ ‑ci 'nyɩ ma gugu lebhe Laagɔ 'la gɩlɩlɩɛa ‑glɩ 'lɛ daa ma cɩ 'ka 'lɛ 'plɩlɩ ɩya ma 'ka 'lɛ 'bhɛlɩ li na.
6‑Zaagbʋsa Laagɔ 'la gɩlɩlɩɛa ‑glɩ 'bhɛlɩ 'kadɩ, ɩ ‑ka ‑kʋ lebhe lʋʋa nclɔɔ ‑ka 'lɛ na, ʋ 'kɔɔ pɔlɛɛn bhlili na. 7Sa ‑a 'ta lʋʋ bhlogbɩɩ ‑laagɔzɔan ‑lamʋ 'nyɩ ‑a cɩ 'ta 'la lʋʋ ‑ylɛylɛ famʋlɩɛ mino. 8Na, gbazɩ ‑a ‑ka lʋʋa ‑a cɩ 'ka 'lɛ li ɩya lʋʋa ‑a cɩ 'ka 'lɛ nɩkplaanpla na ‑ka na, ‑ala daa ‑zu. 9‑Ma maa ‑ɔ ‑wa 'lɛ lebhe, ‑ɔ ka 'bhɛlɩ li na, ka ma bhlili gbɩɩnclalɩɛɛn, ‑badaaglunʋnʋgbɩ ɩya wɔɔgugwie ‑nyinye ‑bhutukpaa ‑ɩ gba 'lɛ 'nyɩ ncɛlɩ mlɔ 'lɛ 'nyɩ ma gbɩɔ 'lɛ na nɩkplaan. 10Sa 'kwlɩbhɩɛa 'fɩan 'la ‑sukpluu ‑glɩ 'lɛ 'dala 'la ‑walʋ. ‑Anʋa yaa ‑gbɔɔn wabha, ɩ ya gba na, ma ya Laagɔ cɩ da tlʋbhalɩ 'nyɩ maa 'titi ya macɩ 'kwlɩbhɩɛ ‑bhutukpa 'nyɩnɩ.
Pɔɔtɛtɛ 'la tananʋa 'la vʋlɩɛ
11‑Ma ‑mɔ, Laagɔ 'la nclɔɔ, tlʋbhalɩ ɩmɩ ‑naa 'fɩan cɩ da. 'Matɩ 'kʋnylugolulɩɛ, Laagɔ 'la gɩlɩlɩɛ, pɔɔtɛtɛ, ‑wawʋ, pɔɔklalɩɛ ɩya pɔɔwɔtɛ. 12Vʋ pɔɔtɛtɛ 'la tananʋa ɩya ‑n ka jabhʋa ‑ʋ ‑kʋ 'lɛ 'lʋkʋlʋkʋ ɩya 'lʋkʋlʋkʋ 'la gbʋa Laagɔ lɔɔ 'lɛ na 'lɩ. Ɩmɩ ‑naa ‑n cibhlili 'lɛ, clɩɩa 'kʋa ‑n ŋonu 'lɛ ‑danʋfʋɛcɩ ‑bhutukpa 'ci 'kʋ na. 13Laagɔ, ‑ɔ nʋ 'lɛ lɩɩa ‑tɛtɛa, ɩya Zozi Klisi, ‑ɔ ŋonu 'lɛ ɔla pɔɔtɛtɛa 'la wɔlɩa Pɔnsʋ Pilatɩ ‑deliin na, 'la 'klʋʋn, n clɔɔ lebhe: 14'Plɩlɩ ‑jlɩmaa 'kʋ, namʋnʋ ‑kplɔlɩɛɛn ɩya ma 'la 'lɩɔ 'gesalɩda ‑aan ɩya ‑ala ‑Kwlenyɔ Zozi Klisi 'la ciclɩɩa 'ka ŋeni. 15Clɩɩa Laagɔ zʋ 'lɛ, ɩ ‑ka ŋeni na, ɔ cɩ 'ka gba ɩya Klisi 'ka ci. Ɔ ‑glɩ Laagɔ, 'ɔ bhlo ‑zilo 'lɛ ‑tɛtɛa 'fɩan 'kʋ na. Ɔ ‑kwle ‑tɛtɛa 'fɩan, ɔ ‑glɩ 'nanɩkʋlɩɛ 'la 'wlʋlʋda, nyɩbhɛlɩa 'fɩan 'la Nyɩbhɛlʋ ɩya ‑kwletocɩa 'fɩan 'la ‑Kwleto. 16Ɔmɔ bhlogbɩɩ ‑ɔ ‑kʋ 'lɛ 'lʋkʋlʋkʋ ɩya 'lʋkʋlʋkʋ. Zezezelia nɩkplaan ɔ ‑kʋ 'lɛ na, nclɔɔ bhlogbɩɩ cɩ 'tɩɩ cɩmɛlɩɛ mino. Nclɔɔ bhlogbɩɩ 'ta ka ‑azlɔɔ 'ciinlɩ 'nyɩ nclɔɔ bhlogbɩɩ cɩ 'tɔɔ 'ciinlɩlɩɛ mino. 'Naa 'klʋagba ɩya 'tɛtɩ 'plɩ ɔla da 'lʋkʋlʋkʋ ɩya 'lʋkʋlʋkʋ. Ɩ kʋ sɛɛ.
Solu maa ‑ɔ ‑lio 'lɛ 'bhɛlɩ na
17Solu maa ‑ɔ ‑lio 'lɛ ‑laagɔzɔn ‑naa 'la 'bhɛlɩa na, le ma 'la lia ‑tutule. 'Cla maa lebhe ma 'la zʋa mala pɔlɛkʋtɛlɔa 'bhɛlɩɩ ‑naa ‑ɩ cɩ 'ka 'lɛ 'plɩ na 'kʋ. ‑Ma ma zʋʋ Laagɔ, ‑ɔ 'nyɩ 'lɛ ‑anyɩ lɩɩa ‑tɛtɛa nikadieen le ɩ 'ka ‑ala pɔlɛkʋmɛnɔ ɩya ‑ala 'nanɩ 'plɩ na. 18'Cla ‑awlɛ maa lebhe ma nʋ 'nanɩ, ɩya nʋnʋgbɩ 'nanɩ 'plɩ mala 'bhɛlɩ, ma 'nyɩnɩ pɔlɛ bhlo ɩya ma wabha polilie. 19Ma ka ‑sa nʋ na, ma cɩ 'ka 'bhɛlɩa 'titia ‑ɩ cɩ ‑ka 'lɛ gba ɩya ma 'ka 'lɛ 'nanɩ kʋ na li ɩya ma 'ka jabhʋa 'titi 'lɩ.
Bhɩalɩwɔlɩ
20Timoti, falɩ ɩmɩa Laagɔ zʋɔ 'lɛ wlɩɩn na 'nanɩ pɔlɛ cɩ. ‑Naa poa yooyo -dlɛdlʋ ɩya ma ‑ɔ la 'lɛ macɩ wɔɔcibhlilinya na, 'la yooyo 'dɩgalɩa 'nyukwliin. 21‑Anʋa ya macɩ ɩla cibhlinya la 'nyɩ ɩ ya maa 'kwlaan 'pa. 'Naa Laagɔ 'la 'nyupalɩɛa kʋ anyɩ 'kʋ.
Currently Selected:
1 Tim 6: NTLD13
Highlight
Share
Copy
Want to have your highlights saved across all your devices? Sign up or sign in
Dida New Testament © Bible Society of Côte d'Ivoire, 2013.