2 Tim 1
1
‑Ayopalɩɛ
1‑Amʋ Zozi Klisi 'la lobhulobhunyɔ* Pɔlʋ, Laagɔ wabha 'lɛ 'nyɩ ɔ sla 'lɛ de, le n 'ka jabhʋa ‑ʋ ‑kʋ 'lɛ Zozi Klisi nɩkplaan, 'nyɩ ɔ talɩ 'lɛ ‑ndanyɩ 'kʋ na, 'la 'dɩa ‑sa na, 2n zieo, Timoti, 'na ‑wawaco. 'Naa To Laagɔ ɩya ‑ala ‑Kwlenyɔ Zozi Klisi 'la ‑wawʋa, mala ŋaazɩɩnlɩlɩɛa ɩya pupuea ŋenio 'kʋ.
Pɔlʋ bhɔlʋ Laagɔ
3Gbazɩ n ‑ka clɩɩa 'fɩan bhibhieda ‑kʋ na, zezezeliin ɩya bhlibhliylʋʋn, n bhibhie ‑naa da 'nyɩ n bhɔlʋ Laagɔ, n lobho 'lɛ n tokadɔcɩ 'la 'jeen, ‑kplɔkplɔpɔlɛ nɩkplaan na. 4N ‑ka ‑naa 'mɩɔa luoli na, n ‑wa ‑gbɔɔn le n 'ka ‑awlɛɔ 'ciinlɩ ɩya pɔlɛkʋmɛnɔ 'kaan yeli. 5N luoli ‑naa ‑nʋawlɛɛpɔɔtɛtɛa. Pɔɔtɛtɛ ‑naa ‑n go Loyisi ‑kaa 'lɛ, ‑n nɔ Enisi ya 'lɛ ‑aja 'kʋ lili, 'nyɩ n ‑ci 'lɛ sɛɛ lebhe ɛ yɔɔ 'kʋ ŋeni na.
Pɔlʋ zʋ Timoti 'tɛtɩɩn
6Ɩla gbʋ na, daa n ‑gbɛɔ 'lɛ sɩ 'wlu na, lʋʋa Laagɔ 'nyɩɔ 'lɛ, 'nyɩ ‑ʋ ‑kʋɔ 'lɛ nɩkplaan, n luolio lebhe ‑n gba ɩya ʋ 'ka 'ghlibholi. 7Sa ‑n 'ta ŋanɔwugo Laagɔ 'ta 'lɛ ‑anyɩ 'nyɩ, ‑ma 'tɛtɩ, ‑wawʋ ɩya ‑ncɩkʋklawugo ɔ 'nyɩ 'lɛ ‑anyɩ. 8Na, ‑ala ‑Kwlenyɔ 'la ‑danʋfʋɛa ‑n -cɩ ka 'lɛ li na, ɛ 'la kalɩɔ ‑zo ɩya ‑amʋa ‑ɔ ‑kʋ 'lɛ ‑palʋʋnpapalʋ ‑zɔn, ɔla gbʋ na, ‑amʋ ‑ma 'na ‑kalɩɔ ‑zo. ‑Ma 'tɛbhalɩ Laagɔ 'la 'tɛtɩa ‑deli 'kʋ ɩya n ‑yɔɔsɔ sɛlɩ nebhlo Dɩnanɩa* 'la gbʋ. 9Ɔmɔ ‑ɔ ‑sa 'lɛ ‑anyɩ gbʋʋn le ‑a ka 'ɔ 'nʋa 'plɩ, ‑n 'ta ‑ala nʋnʋgbɩ 'nanɩa 'la 'sasʋʋn, ‑ma ɩmɩa ɔmɔ 'titi bhɔsʋa 'lɛ na ɩya ɔla ‑wawʋa 'la gbʋ. ‑Wawʋ ‑naa ɔ wabhaa 'lɛ ‑anyɩ ‑godogodo Zozi Klisi nɩkplaan na, 10ɔ yanɩʋ ‑pɔtɔnʋ ‑anyɩ pala, -ala Gbʋʋnsanyɔ Zozi Klisi 'la ciliea nɩkplaan. Ɔmɔ ‑ɔ ‑sa 'lɛ 'kwɩ 'dʋʋn 'nyɩ ɔ ya 'lɛ Dɩnanɩa 'kʋ 'plɩlɩ 'nyɩ ɔ ya 'lɛ gba 'nyɩ jabhʋa ɩya 'lʋkʋlʋkʋ 'la kʋlɩɛa 'la zezezelia ya 'lɛ ‑zɔn 'wlʋ. 11Dɩnanɩ ‑naa 'la ‑salɩɛ 'la gbʋ, Laagɔ pleen 'lɛ plicinyɔ, lobhulobhunyɔ* ɩya canyɔ. 12'Lɩka wɔlɩa 'la gbʋa n ‑kʋ 'lɛ 'kwlɩbhɩɛ ‑naa nɩkplaan na. ‑Ma ɩ 'taan ‑zo ‑ka, sa n ‑ci ɔmɔa n zʋ 'lɛ 'na pɔɔtɛtɛa 'kʋ na, 'nyɩ n ‑ci sɛɛ lebhe ɔ cɩ mino, ɔ cɩɩn lobholia ɔ zʋʋn 'lɛ wlɩɩn na, wlɩɩn 'klʋlɩlɩ ‑aan 'nyɩ bhɩalɩ clɩɩa cɩ ŋeni.
13'Plɩlɩ wɔɔnyɩtʋa ‑ʋ nʋ 'lɛ 'nanɩ na 'kʋ, pɔɔtɛtɛ ɩya ‑wawʋa Zozi Klisi nyɩ 'lɛ na nɩkplaan. Ʋ yaan neen 'wlʋlʋ 'nyɩ ‑n yʋʋ 'lɛ 'nʋ. 14Zʋ -lɩɩ 'nanɩa ma zʋɔ 'lɛ wlɩɩn na sa, ‑Kplɔkplɔ ‑Wugoa* ‑ʋ ‑kʋ 'lɛ ‑anyɩ nɩkplaan na, 'la klalɩɛa nɩkplaan.
15‑N ‑ci sɛɛ lebhe Aziibhlɩa 'kʋ ‑naanʋa 'fɩan yaan 'kʋbolu, Fizɛlɩ ɩya Elimozɛnɩ ‑kʋmʋ 'dɛ 'la ncɛlɩa sidiin. 16'Naa ‑Kwlenyɔ nʋ Onezifɔlʋ ɩya ɔla 'slinyaa 'nanɩ, sa ɔ zʋa ‑azlaan 'tɛtɩɩn, 'nyɩ ɔ 'ta 'na ‑abhluakɩa 'gulu. 17Sa daa ɔ ci 'lɛ Wlɔmʋdua nɩkplaan ‑jaa na, ɔ ya ‑nwɔvi, ɔ yaan 'matɩ 'nyɩ ɔ yaan 'lɛ 'lɩ. 18'Nyɩ lobholia ‑tɛtɛa ɔ nʋnʋʋn 'lɛ kpʋkpʋʋn Efɛzɩdua 'kʋ na, ‑n ‑cii, ‑n zi ncɛlɩa 'fɩan 'kʋ. 'Naa ‑Kwlenyɔ gba ɩya ‑Kwlenyɔa 'lɩɔ ŋaazɩɩn 'dɛ 'la clɩɩa#1.18 'Tɩtɩplaclɩɩa Pɔlʋ la 'lɛ ‑da «'dɛ 'la clɩɩa». 'kʋ.
Currently Selected:
2 Tim 1: NTLD13
Highlight
Share
Copy
Want to have your highlights saved across all your devices? Sign up or sign in
Dida New Testament © Bible Society of Côte d'Ivoire, 2013.