Temel kerra ma 3
3
Zonna ge ndu ge looɗol ne zok ge mbegeya zi
1Bitrus ma ne Yohanna mbo zok ge mbegeya zi ya ne kaɗeya ge ler ataa ge gyala tok gasamal ne pe. 2Ago ndu a̰me ge ne tó looɗol, a ka in na ya eya zok ge mbegeya wak go, na ge a ne tol na «Zok wak ge siŋli» go, ne da pe na ba ka kaɗe kaŋ ne naa ge ne wat zok harcal zi ma tok go. 3Swaga ge ne kwa Bitrus ma ne Yohanna ne mbo wat zok ge mbegeya zi ɗe, kaɗe nama, nama ho̰ na bobo. 4Bitrus ma ne Yohanna ndil na ɗeer, a jan na go: «Ndi i!» 5Ndu mbe gá ndil nama ne dwatɗa go na ma̰ ɓol a̰me ne nama tok. 6Amma Bitrus jan na go: «Mbi ne bware ko ne dinar to. Kaŋ ge mbi ne na, mbi hon mo na: Ne dḭl ge Jeso Kris ge Nazaret ne, ɗage digi, mbo viya̰!» 7Swaga ge ne wa̰ na ne na tok matoson, wan na digi. Swaga mbe go juju, na koo ma, ne na koo ndwala-pe ma ɓol pool. 8Za̰me digi mḛya, ɗage mbo viya̰. A ne nama wat zok ge mbegeya zi ya, ka mborra, ka gane digi, ka uware Dok. 9Naa pet a kwa na mborra, ne uware Dok. 10A kwa na tyatyat: A na ge ne ka kat zok ge mbegeya wak ge a ne tol na «Zok wak ge siŋli» go kaɗe kaŋ ne. Fare ge ne ɓó na mbe ke naa ajab, a rase.
Fare janna ge Bitrus ne zok ge mbegeya zi
11Ne jo̰ ndu mbe be ya̰ Bitrus ma ne Yohanna pe to ɗe, naa pet ajab zi, a ka sya ya nama ta, zok wak ge a ne tol na Salomon go. 12Swaga ge Bitrus ne kwa no, jan ɓase ma go: «Israyela ma, aŋ te ke ajab ne zonna ge na ne pe kyaɗa ɗaa? Aŋ te ndil i gyana dimma ne i ne e ndu mbe mbo viya̰ da ne pool ge i ne, ko ne kerra ge i ne ke Dok kwaɗa pe go ɗaa? 13Dok ge Abraham ne, ge Isaku ne, ne ge Yakub ne, ne Dok ge nee bá ma ne#Wat 3:15., uware na dore Jeso, na ge aŋ ne ɓya̰ na naa tok go, ge aŋ ne kuri na Pilatus ndwara se, ne jo̰ na sḛ ɓyare go na kan na digi. 14Ago aŋ kuri bage harcal ne ge dosol, aŋ ɓyare no go Pilatus dó aŋ digi ndu ge hun siya. 15Aŋ hṵ bage ne hon naa ndwara. Amma Dok ta̰ na ne siya se digi, i sayda. 16Da ne fareba honna dḭl ge na ne zi ta, ndu ge aŋ ne ndil na mbe no, na ge aŋ ne kwa na mbe, hon fareba Jeso ta zo̰ na ne, dimma ne aŋ pet aŋ ne kwa na ne aŋ ndwara ne se no go. 17Se no, ná vya ma, mbi kwa kwa go, aŋ ne aŋ ga̰l ma, aŋ ke kaŋ mbe kwarra to zi. 18Dok sḛ ne na pala waage na zḛ ne na anabi ma pet wak zi go, nà Kris mbo njot yál, a na wak wi ne. 19Hase me, saŋge me ta ya Dok ta, ne da pe a ba gul aŋ sone ma uzi. 20Go no uwale Bageyal ba teme aŋ dam ma ge ɗigliya ya, ba teme aŋ na ge a ne tá na tal ne aŋ pe, ndwara go Jeso Kris, ya. 21A na ge ne ka ne digi ya ɗiŋ dam ma ge kaŋ ma gwan bama byalam go dimma ne Dok ne jya̰ na ne na anabi ge mbegeya ge dḛ zaŋgal ma wak zi go. 22Musa jya̰ go: ‹Bageyal Dok ge aŋ ne mbo hon aŋ anabi a̰me ne aŋ ná vya ma buwal zi dimma ne mbi go, aŋ mbo za̰ na fare ge ne mbo jan aŋ ma ya mwaɗak#Dwa 18:15,18-19.. 23Ndu ge daage pet ge ne mbo za̰ anabi mbe ya to, a mbo ban na ne na ɓase ma buwal zi uzi.› 24Anabi ma pet ne Samiyel ya day ɗiŋ mbo ya naa ge a ne e na ma go, a waage fare dam mbe ma pal. 25A aŋ sḛ ma anabi ma vya ma ne, a aŋ sḛ ma ɓó wak tuli ge Dok ne ge ne ke ne aŋ bá ma ne, swaga ge ne jya̰ Abraham go: ‹Ne mo pehir ma ta, pehir ge ne suwar pal ma pet a mbo ɓol wak busu#Pe 22:18, 26:4..› 26Dok ho̰ na dore ya gale da ne aŋ pe ɓya, teme na ya e aŋ wak busu, ndwara gwan ne ndu ge daage ne aŋ buwal zi ne na kaŋ kerra ge sone ma zi ya.»
Currently Selected:
Temel kerra ma 3: FGN2013
Highlight
Share
Copy
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.