Temel kerra ma 2
2
Mborra ge O̰yom ge mbegeya ne ya
1Swaga ge dam Pentekot ne mbya, a ne koteya swaga ge ɗu go mwaɗak. 2Baŋ tukcuk ko̰r mbo ne digi ya dimma ne saam labreya go, mbo ya wi zok ge a ne ka ne na zi. 3A kwa kaŋ soya dimma ne ol wak ɗaabeya go, a varse ta se, a mbo ya mḛ ndu ge daage pal. 4O̰yom ge mbegeya wi nama mwaɗak, a ɗage far wak ge ɗogle ma, ne O̰yom ne ho̰ nama na farra go.
5Swaga mbe go, Yuda ma, nama ge ne sya Dok vo ma, a mbo ja ne suwal ma ya pet Ursalima go. 6Swaga ge ko̰r mbe ne ke, naa ɓase a kote ya nama ta, a ke ajab, ne da pe, ndu ge daage ka za̰ nama jan fare ne na wak. 7A ke ajab, nama wak gá a̰leya, a gá jan go: «Naa ge a ne far mbe ma no, a te be naa ge Galile ma ne mwaɗak to’a?
8Te ke gyana ndu ge daage ba ka za̰ nama na wak suwal zi ɗaa? 9Parte ma, ne Mede ma, ne Elamit ma, ne naa ge ne ka ne suwal Mesopotami go ma, ne suwal Yahudiya go ma, ne suwal Kappadokiya go ma, ne suwal Pontus go ma, ne suwal Asiya go ma, 10ne suwal Frigiya go ma, ne suwal Pamfili go ma, ne suwal Masar go ma, ne suwal Libiya ge gwa ne Siren go ma, ne nama ge ne mbo ne Roma ma suwal ma ya ma, 11Yuda ma, ne nama ge ne uware Dok ge Yuda ma ne ma#2:11 Nama ge ne ho̰ ta uware Dok ge Yuda ma ne ma a nama ge ne vḭ Dok ge Yuda ma ne ne ba̰y vyanna ta., ne naa ge suwal Krete ma, ne Arab ma, nee za̰ nama farra ne wak suwal ma zi, kaŋ ajab ge Dok ne!» 12Naa pet a ka ke ajab, a rase, a ka jan ta go: «Fare mbe pe wanna gyana ɗaa?» 13Amma a̰me ma ka cot ta ne nama, a ka janna go: «Oyo̰r jiya̰l ge giya̰l fere nama ne!»
Fare janna ge Bitrus ne
14Swaga mbe go, Bitrus ma ne nama ge wol para ɗu ma ne mḛya digi, ndage na ka̰l digi jan go: «Yuda sonmo ma, ne naa ge ne Ursalima diŋ ma pet, za̰ me mbi gale, so me aŋ togor ya mbi fare janna ma ta gale. 15Ago naa mbe ma be fere fere dimma ne aŋ ne dwat go to. A gyala wak horom gale ne baŋ. 16A fare ge anabi Juwel ne jya̰ wak wi ne:
17‹Dam ge hṵsi ma zi, Dok jya̰ ne:
mbi mbo kan mbi o̰yom yá naa pal pet.
Aŋ vya ge sonmo ma ne ge zaab ma mbo jan fare anabi,
aŋ naa ge sabar ma kiya̰r ma mbo jan nama,
aŋ bool ma mbo kwar daalam ma me#Juw 3:1-5..
18O̰, dam mbe go mbi kan mbi O̰yom ya
mbi dore ma ne mbi kale ma pal,
a mbo gá waage fare ma.
19Mbi mbo ke kaŋ ŋgayya ma digi, pḭr zi ya,
ne se, suwar pal se,
swama, ne ol, ne ol-swama ndugiya ma.
20Gyala mbo saŋge tṵ,
saba me mbo saŋge swama.
Dam ge Bage ɗiŋnedin ne ba ɗage mbo ya gale,
dam mbe mbo kat dam ge ɓaŋlaŋ, ne hormo gḛ.
21Ago ndu ge daage pet ge
ne mbo tol dḭl ge Bageyal ne ya mbo má.›
22Israyela sonmo ma, za̰ me fare mbe ma no: Jeso ge suwal Nazaret ne, ndu mbe no Dok ŋgay mbyatɗa ge na ne aŋ buwal zi ne kaŋ ajab ma ne kaŋ ŋgayya ma aŋ ta, dimma ne aŋ sḛ ma ne kwa na go. 23Ndu mbe a ɓya̰ na aŋ tok go dimma ne Dok ne vḭ tene kwarra ge na ne zi ne zaŋgal ya day go, aŋ hṵ na, aŋ e naa ge be kwa Dok to ma pel na uwara kaŋgre digi. 24Amma Dok ta̰ na, zu na ne yál njotɗa ge siya ne zi, ne da pe siya be ɓol pool ge wan na se to. 25Ago Dawda jya̰ fare na pal go:
‹Mbi ka kwa Bageyal ɗaɗak mbi ndwara zḛ,
na sḛ ka mbi tok matoson pal,
ne pe no a̰me ge ndace mbi to#Kmb 16:8-11..
26Da ne pe mbi sḛ ke tuli no,
mbi jan fare ne laar saal no.
Mbi sḛ duur mbo ɓol ɗigliya jobreya zi,
27Ago mo mbo ya̰ mbi táál ge siya ma ne se ya to bat,
mo mbo ya̰ mo mbegeya hubiya to bat.
28Mo ŋgay mbi viya̰ ge ndwara ne,
mo mbo wi mbi ne laar saal mo ndwara se.›
29Ná vya ma, a kwaɗa go mbi jya̰ aŋ fare mbe zum waŋ: nee bá Dawda su, a mbu na no, na sḭḭm pala ya nee buwal zi ɗiŋ ma̰ no#1Gan 2:10.. 30Ne jo̰ na sḛ ka anabi, kwa go Dok guni tene go na mbo e na hir na hool gan pal#2Sam 7:12-13, Kmb 132:11.. 31Na sḛ kwa tanna ge Kris ne zḛ, waage zḛ go, na mbo gá táál ge siya ma ne zi to, na duur mbo hubi to me#Kmb 16:10.. 32Jeso mbe, Dok ta̰ na digi, nee pet nee da ne na kwarra. 33Dok hé na digi, e na nà tok matoson pal no. Ame O̰yom ge mbegeya ne Báá ta, na ge ne ke na wak tuli, ka̰ na ya i pal no, dimma ne aŋ ne kwa na, ne aŋ ne za̰ na ne se no go. 34Ago Dawda be mbo digi zi ya to, amma na sḛ jya̰ go:
‹Bageyal jya̰ mbi Bageyal go:
Ka mbi tok matoson pal,
35diŋ mbi saŋge mo naa ge ho̰l ma ya mo koo pul se#Kmb 110:1..›
36Pehir ge Israyela ne ma pet, nama kwa tyatyat go, Jeso mbe ge aŋ ne pé na uwara kaŋgre pala digi, Dok saŋge na Bageyal ne Kris me.»
37Swaga ge a ne za̰ na, fare mbe til nama dulwak ge be to, a jan Bitrus ma ne naa ge temeya ge may ma go: «Ná vya ma, i ke gyana ɗaa?» 38Bitrus jan nama go: «Aŋ hase me, ndu ge daage na ke baptisma dḭl ge Jeso Kris ne zi, ne poreya ge na sone ne pe, go no aŋ ba ɓol O̰yom ge mbegeya. 39Ago wak tuli da ne aŋ pe, ne aŋ vya ma pe, ne nama ge ne káál ya ma pe pet, nama ge Bageyal Dok ge nee ne mbo tol nama ja ma pet.» 40Ne fare janna ge ɗogle ma, ka hal nama ne fare, ka moɗege nama janna go: «Má me ta ne doŋ pe ge ya̰l mbe no go.» 41Naa ge a ne vḭ na fare ma, a ke nama baptisma. Dam mbe go, naa kan ya pal ta mbo kaŋ ge dudubu ataa go.
Kat ba̰a̰n ge Dok vya ma ne
42A wan ta deŋgel hateya ge naa ge temeya ma ne ka honna zi, ne ba̰a̰n kerra zi, ne katugum varra zi, ne kaɗeya zi me. 43Ndu ge daage kat ne vo, naa ge temeya ma ka ke kaŋ ajab ma ne kaŋ ŋgayya ma gḛ ge be to. 44Naa ge a ne ho̰ fareba ma pet, a kat dagre ɗu, nama kaŋ ma kat dagre ɗu me. 45A ka yat bama swaga ma ne bama kaŋ ma uzi, a ka var ta bware mbe ma ta buwal zi, mbyatɗa ge ndu ge daage ne pal. 46Dam ne dam, ne dulwak ɗu, a ka kote zok ge mbegeya zi ɗaɗak, a ka siɗi katugum ta buwal zi yàl ma diŋ, a ka zam kaŋzam ne laar saal, ne sḛ tuli, 47a ka uware Dok, naa pet nama laar wan nama. Bageyal ka kan naa ge ne ɓo máya ma ya nama buwal zi dam ne dam.
Currently Selected:
Temel kerra ma 2: FGN2013
Highlight
Share
Copy
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.