Temel kerra ma 4
4
Bitrus ma ne Yohanna swaga sarya go
1Bitrus ma ne Yohanna ne swaga jan naa fare go gale, naa ge ke tuwaleya ma, ne naa ge koy zok ge mbegeya ma ga̰l ma, ne Saduki ma yan’a, 2nama laar vḛne ne a ne ka hate naa pe, a ka waage naa tanna ge siya ma ne, ne Jeso ta. 3A wan nama, a kan nama daŋgay zi diŋ mbo kwap. Ne da pe, swaga ka gasamal. 4Naa gḛ ne nama ge a ne za̰ fare mbe ma buwal zi, a hon fareba. Naa ge hon fareba ma pet nama isiya mbo kaŋ ge dudubu anuwa̰y go.
5Dam ge kwap ge go, Yuda ma ga̰l ma, ne naa ga̰l ma, ne naa ge njaŋgeya ma, a kote ya Ursalima go, 6kep tuwaleya Hanna, ne Kayafa, ne Yohanna, ne Alezandre, ne hir ge kep tuwaleya ne ma pet a ka go me. 7A wan Bitrus ma ne Yohanna ya, a e nama bama buwal zi, a ka ele nama fare go: «Aŋ ke kaŋ mbe no da ne ma pool, ko ne ma dḭl ɗaa?» 8Go no, Bitrus wiya ne O̰yom ge mbegeya, jan nama go: «Ga̰l ge ɓase ma ne ma, naa ga̰l ma, 9ne jo̰ aŋ ele i fare ma̰ no da ne kwaɗa ge i ne ke ne ndu ge looɗol pe, ne viya̰ ge ne ɓó zonna pe me, 10Aŋ pet, ne ɓase ge Israyela ne ma pet, kwa me go, da ne dḭl ge Jeso Kris ge Nazaret, na ge aŋ ne pé na uwara kaŋgre pal digi, ge Dok ne ta̰ na ne naa ge siya ma buwal zi digi, da ne na ta ndu ge ne mḛ ne aŋ ndwara se mbe no ɓó zonna no. 11Na sḛ, a njal ge aŋ naa ge sinna ma, aŋ ne dó na uzi, saŋge ja njal keŋ go#Kmb 118:22.. 12Ago máya ne swaga ge ɗogle go to bat, dḭl a̰me ge ɗogle ge a ne ho̰ na ne suwar pal ge ndu ba ɓol máya ne na ta to bat.»
13Swaga ge a ne kwa Bitrus ma ne Yohanna fare janna ndaar, a ne kwa go nama naa ge ne ɓo hateya a̰me to ma ne, ne naa ge ful zi ge ma ne baŋ ɗe, a ke ajab. Ne nama fare janna ta, a kwa go nama ka dagre ne Jeso. 14Ne jo̰ bage ne ɓo zonna mḛ nama ziyar go ɗe, a gwan ɓol fare ge janna to. 15A yan nama ne zok koteya zi ya zum, a ga jan ta fare ta buwal zi. 16A jan ta go: «Nee ke ne naa mbe ma gyana ɗaa? Ago nama sḛ ke kaŋ ŋgayya mbe ne. Naa ge ne Ursalima diŋ ma pet a da ne na kwarra, nee ne pool ge ɗaŋgre na to. 17Amma, ge go fare mbe dasare naa ta pet to ɗe, ŋgwabe me nee nama, ne da pe na kaage nama gwan jan ndu a̰me fare ne dḭl mbe no to.»
18A tol nama ya, a tele nama, na kaage nama gwan jan fare, ko hate naa dḭl ge Jeso ne to bat. 19Amma Bitrus ma ne Yohanna gwan ne nama janna go: «Da ne na viya̰ go ge Dok ndwara se, i za̰ aŋ wak, ko i za̰ Dok wak ɗaa? Va me na buwal! 20I ne pool kuri be ge jan fare ge i ne kwa na ne i ndwara, ko ge i ne za̰ na ne i togor to to bat.» 21Swaga ge a ne gwan ŋgwabe nama, a ya̰ nama, ne jo̰ a be ɓol fare a̰me ge wan nama to, ne ɓase ma pe. Ago naa pet a ka uware Dok ne kaŋ ge ne ke no pe. 22Ndu ge ne ɓo zonna ge ajab mbe, na del ka waɗe wara anda.
Kaɗeya ge naa ge hon fareba ma ne
23Swaga ge a ne ya̰ nama, a mbo bama kaam ma ta ya, a wan nama fare ge naa ge ke tuwaleya ma ga̰l ma ne naa ga̰l ma ne jya̰ bama pe. 24Swaga ge a ne za̰ nama, a ndage bama ka̰l digi wak dagre ɗu, a jan Dok go: «Bageyal, mo bage ne dó digi, ne suwar, ne maŋgaɗam ga̰l yuwam ne kaŋ ge ne na pul se ma mwaɗak ne, 25mo bage ne pá fare mbe ma no i bá Dawda, dore ge mo ne wak zi ne, ne O̰yom ge mbegeya ta: ‹Kyaɗa pehir ge ɗogle ma ba ka iigi ta go ɗaa? Kyaɗa naa ba ka hun ta ne farra baŋ go yak ɗaa? 26Gan ge ne suwar pal ma ɓan ta ja digi, ga̰l ma ɓan pe ja digi ge Bageyal ma ne na naŋgeya pal#Kmb 2:1-2..› 27A fareba, suwal ga̰l mbe no diŋ, Herodus ma ne Pilatus poseya ne pehir ge ɗogle ma, ne ɓase ge Israyela ne pet a ɓa̰ bama pe digi mo dore ge mbegeya, Jeso, na ge mo ne naŋge na pal 28ndwara wi fare ge mo ne e na ne pool ge mo ne, laar ɓyareya ge mo ne pal, ne pe dolla ya day wak. 29Se no ɗe, Bageyal, ndi ŋgwabe ya ge nama ne, ho̰ mo mo̰r ma pool ge nama jya̰ fare ndaar kaka, 30ŋgay pool ge mo ne ne da pe naa ɓo zonna, kaŋ ŋgayya ma ne kaŋ ajab ma ke ne dḭl ge mo dore ge mbegeya Jeso ne zi.» 31Swaga ge a ne á ne kaɗeya go, swaga ge a ne kote ne go ndat, nama sḛ ma pet O̰yom ge mbegeya wi nama, a gá jan fare ge Dok ne ndaar kaka.
Naa ge hon fareba ma e bama kaŋ ma dagre ɗu
32Ɓase ge a ne ho̰ fareba ma ka dulwak ɗu ne dwatɗa ɗu me. Ndu a̰me ge jan go na kaŋ ma ndwara hini to, amma a ka e bama kaŋ ma dagre ɗu. 33Naa ge temeya ma ka jan fare ge tanna ge Bageyal Jeso ne ne pool gḛ, Dok ka ŋgay nama kwa a̰se ge na ne pe hini hini me. 34Ago ne nama buwal zi ndu a̰me ge woɗegeya be kat to. Naa ge a ne ka ne swaga ma, ne naa ge ne yàl ma, a ka yat nama uzi, a ka gene bware ge bama kaŋ ge bama ne yá uzi ma ya, 35a ka hon naa ge temeya ma na. A ka var ndu ge daage pool ge na ne pal.
36Yusuf, na ge naa ge temeya ma ne sya na dḭl Barnabas, na sḭ go: vya ge iyal laar. A hir ge Levi ne ne, a ndu ge suwal Chipre ne, 37yat na gaaso usi, mbo ne bware ya hon naa ge temeya ma.
Currently Selected:
Temel kerra ma 4: FGN2013
Highlight
Share
Copy
Want to have your highlights saved across all your devices? Sign up or sign in
La Bible en langue Kim © Alliance Biblique du Tchad, 2013.