Kushangumuka 46
46
Yakomba na naanga yendi vaya ku Ingito
1Ngecivene, Yakomba walongekeyeye vivala vyendi vyoshe, waile ku Mbeleshemba, kuje wakakombelelele n̄ombelo kuli Njambi ya ishe Isake. 2Njambi wendekele nendi ku vutsiki mu cimona wamusanene ngwendi, “Yakomba, Yakomba!”
Co wakumbulwile ngwendi, “Ewa, yange uno Shukulu.” 3Co wendekele ngwendi, “Yange njapwa Njambi, Njambi ya isho. Kesi uzive lyova lyakuya ku Ingito, omwo kuje njikatumisa vatekulwila vove kupwa muyati wakama. 4Njikaya amo nove ku Ingito, co mwa vushunga njikelwisa lalo vatekulwila vove ku lifuti lino. Yosefa ikeye akakufwika a mesho ove omo ukatsa.”
5Asinoni Yakomba watundile ku Mbeleshemba. Co vana vendi vaakele ishavo amo na vana vavo vavandondo na vanakazi vavo mu matemba aje avatuminine mwene wa Ingito. 6#Vil 7:15 Vambatele vimuna vavo na vufuko vwavo vuje vafukile mu Kanana, vaile ku Ingito. Ngecivene, Yakomba waile na vatekulwila vendi voshe, 7na vana vendi va vanalume, na vatekulyendi va vanalume, na vana vendi va vanakazi, na vatekulyendi va vanakazi.
8Awa akewo mazina a naanga ya Yakomba na vatekulwila vendi vaje vaile navo ku Ingito. Munendi wa ntwatwa lizina lyendi Luvena, 9co vana va Luvena va vanalume mazina avo, Hanoki, na Palu, na Hezelone, na Kalemi. 10Vana va Simyoni va vanalume mazina avo, Njemwele, na Njamine, na Ohande, na Njakine, na Zohale, na Shaulu muna munakazi wa kaKanana. 11Vana va Levi va vanalume mazina avo, Ngeleshone, na Kohate, na Melali. 12Vana va Yunda va vanalume mazina avo, Ele, na Onane, na Shela, na Peleze, na Zela. (Oloni Ele na Onane, vatsililile mu Kanana.) Vana va Peleze va vanalume mazina avo, Hezelone na Hamule. 13Vana va Isakale va vanalume mazina avo, Tola, na Puwa, na Njashumbe, na Shimelone. 14Vana va Zembuloni va vanalume mazina avo, Selende, na Elone, na Njahelele. 15Ava vakevo vana va vanalume vakitile Leya kuli Yakomba ku Mesopotamya, amo na munendi wa munakazi Ndaina. Voshe vatekulwila vendi kuli Leya vapwile makumi atatu na vatatu.
16Vana va Ngande va vanalume mazina avo, Zefone, na Hangi, na Shune, na Ezimbone, na Ele, na Alonde, na Aleli. 17Vana va Ashele va vanalume mazina avo, Imena, na Isheva, na Ishevi, na Mbeliya, na ndokazi yavo Sela. Vana va Mbeliya va vanalume mazina avo, Hevele na Malekyele. 18Ava likumi na vatanu na umo vakevo vatekulwila va Yakomba va kuli Zilipa, mukwasi wa Leya uje yamwanene ishe Lambani.
19Lakele munakazi wa Yakomba wakitile vana vavali va vanalume mazina avo, Yosefa, na Mbenjemani. 20#Kus 41:50-52 Yosefa wakitile vana vendi vavali va vanalume mu Ingito, mazina avo, Manase, na Efalime. Vaje vakitile na Asenate muna Potifela, muka-kukombelela mu Helyopolise. 21Vana va Mbenjemani va vanalume mazina avo, Mbela, na Mbekele, na Ashimbele, na Ngela, na Namane, na Ehi, na Loshe, na Mupime, na Hupime, na Alenda. 22Ava likumi na vawana vakevo vatekulwila va Yakomba kuli Lakele.
23Muna Ndani wa munalume lizina lyendi Hushime. 24Vana va Nafetali va vanalume mazina avo, Njazele, na Ngumi, na Njezele, na Shileme. 25Ava vatanu na vavali vakevo vatekulwila va Yakomba kuli Mbileha, mukwasi wa Lakele uje yamwanene ishe Lambani.
26Vana na vatekulwila va Yakomba vaje vaile navo ku Ingito vapwile makumi atanu na limo na vatanu na umo kwakako vainamweno. 27#Vil 7:14 Yosefa lalo wakakitile vana vavali va vanalume mu Ingito, ngeci naanga yoshe ya Yakomba vapwile makumi atanu na avali vaje vaile ku Ingito.
Yakomba na naanga yendi mu Ingito
28Yakomba watumine Yunda kulutwe nakuleka Yosefa ngeci vakuliwanene mu Ngoshene. Omo vetele mu Ngoshene, 29Yosefa walondele mu likalu lyendi, waile nakuliwana na ishe. Omo valiwanene, Yosefa wavumbatelele mu mukoshi wa ishe, co walilile manene simbu yakama. 30Ngecivene, Yakomba wendekele kuli Yosefa ngwendi, “Kunau ololo, nambe njinatsi kunjilinyenge, njinakumono ucili na kuyoya.”
31Yosefa wendekele kuli vandolome vendi na ku naanga ya ishe yoshe ngwendi, “Njinapande kuya njikaleke mwene ngwange vandolome vange na naanga ya tate yoshe, vaje vakele ku Kanana vanaija kuli yange. 32Njikamuleke ngwange vakevo vapwa vaka-kunyunga vimuna, co vanaija na vimanga vavo, na vyoshe vije vakele navyo. 33Omwo mwene akamisana nakumihula ngwendi, ‘Vipangi vyeni vika?’ 34Co mulekeni ngweni, ‘Yetu mukuyoya kwetu kwoshe twapwa vaka-kunyunga vimuna, ngwe muvalingile vakukulwila vetu.’ Mu ngila eyi akamitava ngeci mwakukale muno mu Ngoshene.” Yosefa wendekele ngeci omwo wazivukile ngwendi vaka-Ingito vapwile vaka-kuyengula tunyungi.
Currently Selected:
Kushangumuka 46: MBB
Highlight
Share
Copy
Want to have your highlights saved across all your devices? Sign up or sign in
The Bible in Mbunda ©The Bible Society of Zambia, 2006