Kushangumuka 45
45
Yosefa alisholola kuli vandolome vendi
1 #
Vil 7:13
Yosefa kasele kulikuta a viyongola vyendi ku mesho a a vaje vangamba vendi, co wavashikile voshe kutuuka muje mu mulili, naumo wai wasalelemo omo Yosefa walisholwele kuli vandolome vendi. 2Co walilile nakusikoka manene noo vaka-Ingito vazivileko, co vatwalele muzimbu ku lipela lya mwene. 3Yosefa wendekele kuli vandolome vendi ngwendi, “Yange Yosefa. Tate acili na kuyoya ndi?” Oloni vandolome vendi omo vazivile evi vakele na lyova manene lyakumukumbulula. 4Asinoni Yosefa wendekele kuli vakevo ngwendi, “Vandolome vange, shwenyeni kuno.” Omo vashwenyeleko, co Yosefa wendekele ngwendi, “Yange ndolome yeni Yosefa, uje imwalandesele ku Ingito. 5Oloni kesi mulishoshomwene nambe kuliluvalesa yeni vavenya omwo mwanjilandesele kuno embwe. Mwa vushunga Njambi wanjitumine kuno mukwamena myonyo ya vanu. 6Ou ukewo mwaka wamucivali wa njala ya lyangengela mu lifuti. Co kwacisala lalo myaka itanu yakujeneka kulima nambe kuteja. 7Njambi wanjitumine kuno mukumyovola namukumimwesa ngeci yeni na vatekulwila veni mukayoye. 8Ngecivene, mwa vushunga kesi yeni mwanjitumine kuno embwe, oloni Njambi. Ikeye nanjipwisa mwata waakamwa ya vamyata va mwene, yange mukulunu wa lifuti lyendi lyoshe. Yange muka-kushwana Ingito yoshe.
9“Co ololo zambuleni mwiluke kuli tate nakumuleka ngweni evi vikevyo vyanendeka munove Yosefa ngwendi, ‘Njambi nanjipwisa muka-kushwana Ingito yoshe, ija kesi wishwale. 10Wakwasa kutunga ku Ngoshene, kuje wasa kukala muyehi nange, na vana vove, na vatekulyove, na vimanga vove, na vimembe vove, na vingombe vove amo na vufuko vwove vwoshe. 11#Vil 7:14 Nga wakukala mu Ngoshene, co yange njakukunyunga. Omwo kucili myaka itanu ya njala ya lyangengela, cooni kunjishaka yove, na naanga yove, na vimuna vove mulanduke.’ ”
12Yosefa wendekele lalo ngwendi, “Ololo yeni voshe, nove Mbenjemani, mwalimwena ngweni mwa vushunga vene yange Yosefa. 13Yenioni mukaleke tate ngweni njili na moko yakama manene mu Ingito, yeni mukamuleke a vyoshe evi mwamono. Zambuleniko ngeci mukamushake.”
14Asinoni Yosefa wavumbatelele ndolome yendi Mbenjemani mu mukoshi, co walilile, na Mbenjemani lalo wavumbatelele mu mukoshi ya ndolome yendi nakulila. 15Co lalo walilile nakuvumbatela vandolome vendi umo na umo nakumutsemba. Asinoni vandolome vendi vashangumukile kwendeka nendi.
16Omo lutsimo lwetele ku lipela ngeci vandolome va Yosefa vanaija, mwene na vamyata vendi vavwaelelele manene. 17Co mwene wendekele kuli Yosefa ngwendi, “Leka vandolome vove valongekeye vimulu vyavo ngeci veluke ku lifuti lya Kanana, 18vakashake ishavo na naanga yavo veluke kuno lalo. Njakuvana lifuti lyalivwa muno mu Ingito, co vakakala na vyavingi vyakulikwasa navyo. 19Valeke lalo vaye na matemba amo amuno mu Ingito, ngeci vakendelemo vanakazi vavo na vana vavo vavandondo, co vakaije na ishavo amo. 20Kesi vakalinyenge a vyuma vyavo vivakaseza kuje. Vyoshe vyavivwa vya mu lifuti lyoshe lya Ingito vikapwa vyavo.”
21Ngecivene, vana va Yakomba valingile ngwe muvavalekele. Yosefa wavanene matemba, ngwe muje mwashikile mwene, na vyakulya vya mu vungenzi. 22Co lalo, umo na umo wamwanene vikoveyo vivali, oloni Mbenjemani wamwanene mavundungulu a siliva 300 na vikoveyo vitanu. 23Asinoni watumine kuli ishe vimulu likumi vambatele vyuma vyavivwa vya mu Ingito, na vimulu likumi vambatele tiliku, na makende, na vyakulya vikwavo vya mu vungenzi. 24Yosefa watumine vandolome vendi, co vaile. Ikeye wendekele kuli vakevo ngwendi, “Kesi muye nakulizunga mu ngila.”
25Ngecivene, vatundile mu Ingito, velukile kwimbo kuli ishavo Yakomba ku Kanana. 26Yakomba vamulekele ngwavo, “Yosefa acili na kuyoya. Ikeye alinakushwana mu Ingito mwoshe!” Co Yakomba walingile ngwe alota, kavakulaelele.
27Oloni omo vamulekele vyoshe vije vyendekele Yosefa kuli vakevo, nomwo wamwene matemba aje atumine Yosefa mukumwizila ngeci aye nao ku Ingito, wavwaelelele. 28Yakomba wendekele ngwendi “Mukemwo kunau! Kuma munange Yosefa acili na kuyoya! Njinapande njiye njikamumone simbu kanda njitse.”
Currently Selected:
Kushangumuka 45: MBB
Highlight
Share
Copy
Want to have your highlights saved across all your devices? Sign up or sign in
The Bible in Mbunda ©The Bible Society of Zambia, 2006