Kushangumuka 44
44
Vazimbalesa nganja
1Yosefa washikile ngamba wa mukulunu uje wakele ku njuvo yendi ngwendi, “Shulisa manene vyakulya mu vinjeke vyaava vanu, vambate ngwe muvanasela kwambata. Co aka lalo vimbongo ku kanwa ka njeke ya munu na munu. 2Asinoni aka nganja yange ije ya siliva mu njeke ya mutinikila wavo, amo na vimbongo vya tiliku yendi.” Co walingile ngwe muje vamulekele. 3Alikaki a mungulungengu vandolome va Yosefa vakatukile kuya vungenzi vwavo amo na vimulu vyavo. 4Omo vanendeko kanunda kakandondo lika kutunda mu nganda, Yosefa walekele uje ngamba wa mukulunu wa ku njuvo yendi ngwendi, “Zambwila vaje vanu. Omo unavawana, vehule ngwove, ‘Omwo vikajo munelwisila vuvi ku vuvwa? 5Omwo vikajo munevila nganja ya shukulu yange ya siliva? Ikeyo yakanwila, ikeyo lalo yakataesa omo ashaka kuzivuka vika vilinakwija. Yeni munavulumuna mulonga wakama manene!’ ”
6Omo uje ngamba wavawanene, co wendekele majwi aje avamulekele. 7Oloni vamukumbulwile ngwavo, “Vikajo shukulu mwendekela ngacije? Tulisinga ngwetu kutwalingile cuma ca cangacije. 8Wazivuka ngeci tunelwisile vimbongo vije twakawanene mu vinjeke vyetu ku lifuti lya Kanana. Co omo vikajo twiva siliva nambe ngolinde ku njuvo ya shukulu yove? 9Shukulu, nga umo wetu mumuwana nayo, mwamuvwa kumutsiya, co yetu tukasalao tukapwe tu vinzinda va shukulu yetu.”
10Co wendekele ngwendi, “Mwamuvwa njamitava, oloni kuvanga lika ou nambata nganja ikeye akapwa cinzinda cange, co yeni mukasalao mukaliila ngoco.” 11Vwasi-vwasi vatulile vinjeke vyavo asi, co munu na munu wazitwile ku njeke yendi. 12Asinoni uje ngamba ya Yosefa wakele nakushakezeka, washangumukilile kuli mukulunu wavo nakweta kuli mutinikila wavo, co wawanene nganja mu njeke ya Mbenjemani. 13Vandolome va Yosefa vatavwile vikoveyo vyavo omwo vusiwa, valongekeyeye vimulu vyavo nakwiluka lalo ku nganda.
14Omo Yunda na vandolome vendi vetele ku njuvo ya Yosefa, vamuwanene anga acili kuje. Vatsikamene a mavuli ku mesho endi nakumulemesa, 15co Yosefa wendekele kuli vakevo ngwendi, “Vika mwalingi? Kuma kumwazivukile ngeci munu wakufwa ngwe yange asa kuwana cuma eci akutaa ndi?”
16Yunda wakumbulwileko ngwendi, “Vatijo twendeka kuli yeni, shukulu yange? Vatijo twasa kulinga vimata? Vatijo twasa kulisambesa yetu vavenya? Njambi nafukula a milonga yetu. Yetu voshe tunapu vindungo vove kesi lika ou ivanawana na nganja embwe.”
17Yosefa wendekele ngwendi, “Embwe vakwetu! Kunjasa kulinga ngoco! Kuvanga lika ou ali na nganja ikeye apwa cinzinda cange. Oloni yeni mwasalao mukeluka mu kwoloka kuli ishweni.”
Yunda alambelela ali Mbenjemani
18Yunda washwenyele kuli Yosefa wendekele kuli ikeye ngwendi, “Yove shukulu yange, njitave njendeke nove. Kesi uluvale nange, omo yove unapu ngwe mwene vene. 19Shukulu, mwatwihwile yetu ngweni, ‘Muli na ishweni nambe shongo yeni mukwavo ndi?’ 20Twakumbulwile ngwetu, ‘Eyo shukulu tuli na tatetu nakuluvala laja na shongo yetu wamundondo, uje yakitile tate mu vukulukazi vwendi. Co ndolome ya uje mukwenje watsa, ikeye lika nasalako mwimo lya vaina aciyoya kunau, co ishe wamuzema manene.’ 21Asinoni shukulu, mwatulekele kwija nendi kuno, ngeci mwakumumone, 22co twamikumbulwile ngwetu, ‘Mukwenje kasa kutunda kuli ishe embwe, nga alingamo, ishe atsa.’ 23Oloni mwendekele netu vangamba veni ngweni, ‘Nga kumukaija na ndolome yeni, co kumukamono lalo cihanga cange.’
24“Omo twelukile kuli tate, twakamulekele vije mwendekele. 25Ngecivene, ikeye watulekele kwija lalo nakulanda vyakulya. 26Oloni twamukumbulwile ngwetu, ‘Kutwasa kuya. Kuvakatutavesa kumona cihanga ca uje munalume kuvanga tuye na ndolome yetu amo.’ 27Ngecivene, tatetu wendekele ngwendi, ‘Mwazivuka ngeci munakazi wange Lakele wakitile nange vana vavali lika va vanalume. 28Umo wanjiseza laja. Vikashama vamusanyozola, omwo kunjamumwene tunde aje wanjisezelele. 29Nga yeni munjinyeka lalo ou, co njitsa vene, mukanjikokela vusiwa vwakunjilya mu vukulukazi vwange.’ ”
30Ngecivene, Yunda wendekele lalo ngwendi, “Omo njiiluka kuli tate, tunapande kuya amo nendi, omwo tate wamuzema manene, 31co cikapwa ngeci omo tate akatumona kutwesi nendi amo, akatsa citundulu. Co yetu vangamba vove tukamukokela vusiwa vwakumulya. 32Co lalo, yange ngamba yove njalipwisile vunomo kuli tate omwo ya mukwenje. Njamulekele ngwange nga kunjikaija nendi, co njikakala na mulonga myaka yoshe. 33Ngecivene, ololo tava yange ngamba yove njipwe ndungo ya shukulu yange kwinga mu mwela wa mukwenje. Mweseleni aye amo na vandolome vendi. 34Yange njikeluka vatijo kuli tate nga mukwenje wai? Kunjapandele kumona tuyando mutwija ali tate.”
Currently Selected:
Kushangumuka 44: MBB
Highlight
Share
Copy
Want to have your highlights saved across all your devices? Sign up or sign in
The Bible in Mbunda ©The Bible Society of Zambia, 2006