Kushangumuka 47
47
1Yosefa waile na vandolome vendi vatanu kuli mwene. Co wamulekele ngwendi, “Tate na vandolome vange vanaija kutunda ku Kanana na matanga avo a vimuna, na vyoshe vakele navyo. Vakevo ololo vali mu lifuti lya Ngoshene.” 2Asinoni Yosefa wetesele vandolome vendi kuli mwene. 3Co mwene wavehwile ngwendi, “Vipangi vyeni vika?”
Vakevo vamukumbulwile ngwavo, “Yetu twapwa tu tunyungi shukulu, ngwe muvalingile vakukulwila vetu. 4Tunaija nakukala mu lifuti lino omwo mu lifuti lya Kanana njala ya lyangengela inaama manene, co kukwesi noku kwakunyungila vimuna vetu. Ngeci shukulu, utwaneko lisesa lyakutunga muno mu lifuti lya Ngoshene.” 5Mwene wendekele kuli Yosefa ngwendi, “Ololo isho na vandolome vove vanaija kuli yove, 6lifuti lya Ingito linapu lyavo. Ngecivene, vatave vakatunge mu lifuti lya Ngoshene, ku mutambela wauvwa wa lifuti, co nga akati kavo ali vanalume vakutakama vaane moko yakukenga a vimuna vange.”
7Asinoni Yosefa watwalele ishe Yakomba kuli mwene. Co Yakomba wavezikisile mwene. 8Co mwene wamwihwile ngwendi, “Uli na myaka ingai?”
9Yakomba wamukumbulwile ngwendi, “Kuyoya kwange kwakwendangana ano asi kunapu myaka 130. Myaka eyi yapwile yaindondo oloni yakukaluwa, kuyalifwile na myaka ije vakele nakwendangana vakukulwila vange.” 10Yakomba wavezikisile mwene lalo, co waile. 11Asinoni Yosefa watumbamene na ishe na vandolome vendi mu Ingito, co wavanene mutambela wauvwa mu lifuti kuyehi na nganda ya Lamesese, ngwe muje mwashikile mwene. 12Yosefa waanene vyakulya kuli ishe, na vandolome vendi, na naanga yoshe ya ishe, na kuli vaje vavandondo lalo.
Njala ya lyangengela
13Ngecivene, njala ya lyangengela yaamene manene, kukwakele vyakulya mu lifuti lyoshe, vanu va mu Ingito na mu Kanana vakonyele na njala. 14Omo valandesele tiliku, Yosefa wakungulwile vimbongo vyoshe nakuvitwala ku lipela. 15Omo vimbongo vyoshe vya mu Ingito na mu Kanana vyahwile, co vaka-Ingito voshe vezile kuli Yosefa ngwavo, “Twane vyakulya! Kesi utwecelele tutse! Vimbongo vyetu vyoshe vinahu.”
16Yosefa wavakumbulwile ngwendi, “Nga vimbongo vyeni vinahu, neneni vimuna veni ngeci tulandakane na vyakulya.” 17Ngecivene, vanenele vimuna vavo kuli Yosefa, walandakanene vyakulya na tuvalu twavo, na vimanga, na vimembe, na vingombe, na vimulu. Co a mwaka uje wavanene vyakulya vyakulandakana na vimuna vavo voshe.
18Omo mwaka uje wahwile, vezile kuli ikeye mu mwaka wamucivali vendekele ngwavo, “Shukulu, yetu twendeka mwa vushunga, kutwasa kukushwekela yove shukulu yetu, omwo vimbongo vyetu vinahu, co vimuna vetu lalo vanapu vove. Kukwesi lalo nevi vinasala tukwanevyo, kuvanga mivila yetu na livu lyetu. 19Kesi tulanduke ku njala, tulande yetu na mahya etu na vyakulya. Tulande na livu lyetu mukulandakana na vyakulya. Co tukapwa vindungo va mwene, ikeye akafuka livu lyetu. Twane tiliku ituyoyese na mbuto tukuve mu mahya etu.”
20Ngecivene, Yosefa walandelele mwene livu lyoshe lya mu Ingito. Co na vaka-Ingito voshe vavasindiiye kulandesa livu lyavo, omwo njala ya lyangengela yaamene manene. Lifuti lyoshe lyapwile vufuko vwa mwene. 21Yosefa wapwisile vanu vindungo, kutunda ku shongo nakweta ku shongo ya Ingito. 22Livu lika lyasaleleo lije kalilandele, kuvanga livu lya vaka-kukombelela. Kucatavele ngeci valandese livu lyavo, omwo mwene wakele nakuvana vyakulya vinavapande ngeci vayoyeleo. 23Yosefa wendekele kuli vanu ngwendi, “Mwamono, njamilanda yeni amo na livu lyeni kupwa vya mwene. Tambuleni vimbuto evi mukakuve mu mahya eni. 24Oloni a simbu ya kuteja munapande kwana camucitanu kuli mwene. Co eyi mbuto ikasalao, na vyakulya vikevyo vikapwa vyeni na naanga yeni.”
25Vamukumbulwile ngwavo, “Unatwovola. Unalingi mwamuvwa kuli yetu shukulu. Tukapwa vindungo va mwene.” 26Ngecivene, Yosefa waakele lishiko a livu lya mu Ingito ngwendi, a kuteja, camucitanu cinapande kupwa ca mwene. Lishiko eli vacilisindiya na lelo, kuvanga lika livu lya vaka-kukombelela likelyo kulyakundamene kuli mwene.
Yakomba ashika lwa mamaneselelo
27VaIsalele vakele mu Ingito mu lifuti lya Ngoshene, vafukile manene, co vakele na vana vavangi. 28Yakomba wakele mu Ingito myaka likumi na itanu na ivali, noo wapwisile myaka 147 ya vukulukazi vwendi. 29Omo simbu ya kutsa kwendi yashwenyele muyehi, Yakomba wasanene munendi Yosefa wendekele kuli ikeye ngwendi, “Aka livoko lyove mukati ka mao ange#47:29 AKA...MAO: Eyi yapwile ngila ivalisingile nayo yakwonwa kutengulula, (kenga 24.2). nakulisinga ngeci kuukanjitsindi muno mu Ingito. 30#Kus 49:29-32; 50:6 Njishaka ukanjitsinde kuje kuvatsinda vatate. Ukanjitundise muno mu Ingito ukanjitsinde kuje kuvavatsinda.”
Yosefa wamukumbulwile ngwendi, “Njikalinga ngwe omo muunendeka.”
31Co Yakomba wendekele ngwendi, “Lisinge ngwove njikalinga ngeci.” Asinoni Yosefa walisingile, ngecivene, Yakomba wakandelelele oku nalala a vulili vwendi.
Currently Selected:
Kushangumuka 47: MBB
Highlight
Share
Copy
Want to have your highlights saved across all your devices? Sign up or sign in
The Bible in Mbunda ©The Bible Society of Zambia, 2006