Oseas 12
12
1Na Efraín qalaq chectac na la'at,
qaq 'enauac ye na'a'q da quetague' na la'at maye chegaqa'ague da nala' lliguisheguem.
Qataq nquigaxattauec na latenataxanaxacpi qataq qaica ca iren,
qataq naỹamaxate' ye Asiria, qataq ỹamaxa na nme aceite ye Egipto.
2Ñim Nataxala' dataỹa'aguet na Israel le'ecpi,
qataq ỹauo'o qome ca nhuaxanaguec nam lauo' le'ecpi so Jacob,
souaxat dam qauem lataxac namayepi,
nache isheeteneguet, ipacchigui naqa'en da 'eetec nam ỹo'otpi namayepi.
3Qaq nache chegoqta'a co'ollaq ñaq taỹa'a da ñiguiñi so Jacob,
nache npa'axaalec da lañoxoc so lqaỹa,
qaq co'ollaq mashe ỹe somaye nache nalaqaatague'
som lamaxashec Ñim Lo'onatac 'Enauacna.
4Nalaqaatague' co'ollaxa somaye,
nache ivira'a da nauec,
huaña, nache nỹeeto'ot qataq nachoxoreetacot somaye da ichoxoren.
Qaq huaña ye Betel nache Ñim Lo'onatac 'Enauacna nauane' somaye,
qaq huaña yemaye nache detaxaỹapegue' somaye.
5Qaq Ñim Nataxala', Ñim Lo'onatac 'Enauacna,
maye Qaica ca Ỹaqalanapec, Ñimaye da le'enaxat 'eeta': «Nataxala'».
6Qaq ỹoqo'oye 'am Israel, 'avi'eguelaxa qome Ñim 'Anatamnaxala';
'auo'ot qome da nauotaxanaqtaic,
qataq da nalochiguiñi lataxac,
qataq nache 'eetai' qome da 'auacheto'ot da 'arpi'iỹaxac Ñim 'Anatamnaxala'.
7«Na Canaán le'ecpi, qalaq do'ogoxootega
ana laloqnaxanaxaqui maye saipaigui ye lcata da huo'o na naloqten,
cha'aye nqopita da decachiỹot na laỹepi.
8Qaq na Efraín, qalaq 'eeta':
¡Aỹem ỹataqta aỹem sallaxanec, ỹataqta qalota ana llaỹoñiguishe aỹom!
¡Qalaxaye qaica ca ishet da anac da ỹauo'o ca ỹasouaxashet,
da 'eetega sachegoxotaigui da icachaxac de'era isallaxa!
9Qalaxaye, Aỹem Nataxala' maye Aỹem 'Anatamnaxala'
co'ollaq qonetaña ye Egipto,
'am she'eguelaxata qome da qaltaq qonetaigui na npe'lpi,
'eeta'am co'ollaq ñauanaxa't, huaña ye toolec 'alhua.
10Aỹem, shenapega co'ollaxa so na'aqtaxanaxanecpi,
qataq sanem da qalota ñaqa'en na lauanaqchecpi,
qataq sachegoxotchigui somayepi da qami' setaxaiguilo
sauota'a nam ỹaloqnaxanaxatpi.
11Ye Galaad, hueta'a na ỹaqa'a atamnaxala'pi,
qalaxaye namayepi nda'a't na saq 'en.
Qaq ye Gilgal huaña na qoỹaategueuo nachetaqtaxanaxat huaca,
ỹoqo'oye ana lca'atoxonaxalatepi dolagui qome,
'eeta'am ca logosheguem coma'pi,
maye huetalec ca qanqalagoxotsheguem 'alhua.»
12Qalaxaye so Jacob,
ỹe'eguena co'ollaxa ye 'alhua Aram,
qaq nache huaña yemaye da ilotague' aso qaguetapi,
da do'onataxaateguelec da lasheechiỹaxac aso lhua.
13Qaq Ñim Nataxala' ỹachegoxotchigui so 'oonolec na'aqtaxanaxanec,
da nqateeguesop ye Egipto na Israel le'ecpi,
qataq do'ogoxona so 'oonolec na'aqtaxanaxanec da ilotague' namayepi.
14Qalaxaye na shiỹaxauapi ye Efraín, inogoqchet Ñim Nataxala'.
Qaq ỹoqo'oye Ñimaye ỹauo'o qome ca nhuaxanaguec namayepi,
souaxat da lalaataxanaxac,
nache namayepi maiche talec qome nam qauem maye ỹo'otpi.
Currently Selected:
Oseas 12: LÑLE13
Highlight
Share
Copy
Want to have your highlights saved across all your devices? Sign up or sign in
Biblia Toba Qom, La'aqtaqa Ñim Lo'onatac 'Enauacna © Sociedad Bíblica Argentina, 2013.