Oseas 11
11
Ñim Lo'onatac 'Enauacna ỹataqta ỹauotec so lalamaxat nhuo' le'ecpi
1Co'ollaq ñaq saxanaxa da ỹe na Israel le'ecpi,
nache Aỹem ỹataqta ỹauotaxat,
qataq sachegoxotchiguiña co'ollaxa ye Egipto
da seỹaxana na ỹalaqpi.
2Qalaxaye co'ollaq ỹapac da seỹaxaatega,
nache lamaxa nquictauec da aỹem ca'ai.
Nache namayepi ỹaatacot ana lachetaqtaxanaqte
nam saq 'en atamnaxala'pi,
qataq ỹavigaxattac na lchenaxanaxat
da ỹanot nam ne'enaqtacpi.
3Qaq na'aictaxa 'enauac de'era,
Aỹem sapaxaguenec da lqueuoxoc na
chegoxoguetpi so Efraín,
qataq sauecta'aguet co'ollaxa, ñasoqta'a na lhuaq namayepi,
qalaxaye saishet da ỹaỹaaneguet da Nachaỹem da selotague' namayepi.
4Qaq Aỹem serolec co'ollaxa da huesotta
ỹauotaxanaqtaic da ñaueguela't namayepi,
qataq ñesoxouo, 'eeta'am ca nogotolec
maye ñaq lleptac,
nache ñeqateeguesop na qapa'atta maye npeetague' namayepi,
nache sanem na aloq da sequia'axaatac.
5Qaq namayepi saishet qome da qaltaq ỹe'eguelaxa ye Egipto,
cha'aye na asiiriopi choche ỹamaqtac qome namayepi,
souaxat da namayepi saishet da aỹem ñe'eguelaxa.
6Nache qairolec qome ca ỹeelonec,
da qailaxachigui na huaqta'a't nỹecpi maye lalamaxatpi,
qataq qailaxachigui na lpaqtaxatpi namayepi,
qataq qanlaxaañi na maiche lapaxañi lataxacpi namayepi.
7Ne'ena ỹalamaxat nhuo' le'ecpi
ỹataqta lhuennataxa da Aỹem dataỹa'aguet,
ỹoqo'oye na'aictaxa da iỹaxaatega da ỹe'enaxat,
qalaxaye saishet da ỹoqta 'eesa da Aỹem ỹo'oxoreetac.
8'Am Efraín, ¿ca sheetectaxa da 'am sheca'ai?
'Am Israel, ¿ca sheetectaxa da 'am salat?
¿Isheto' peta'a da 'am selaxachigui
da 'eeta'am so huaqta'a't nỹecpi ye Admá,
huo'otaq da 'eeta'am da sheetec co'ollaxa
so huaqta'a't nỹecpi ye Seboyin?
¡Da iquiyaqteỹaxac ỹataqta Aỹem iraxanapec,
souaxat da ichoxonnataxanaxa da qoneta!
9Ỹoqo'oye saishet da 'am serolec da ỹayeloxo,
qataq saishet da she'eguelaxalec da ñelaxaañi ye Efraín,
cha'aye Nachaỹem maye Ỹo'onatac 'Enauacna,
qaq saishet da choche aỹem shiỹaxaua.
Qataq Nachaỹem maye Aỹem Qui'itta, qami' salectaiguilo,
qaq saishet da 'am ñanaỹa da 'am selaxachigui.
10Qaq namayepi qome, ca'attague' qome Ñim Nataxala',
qaq Ñimaye desoqo qome, 'eeta'am ca llon.
Qaq qom desoqo Ñimaye,
nache na lalamaxatpi iviloxol qom anac,
chegoqta'ague da nala' lliguisheguem.
11Qaq 'eeta'am ca qoỹo da iviloxol
qom anac chegaqa'a ye Egipto,
qataq 'eeta'am ca qoto' qom anac chegaqa'a ye Asiria,
nache Aỹem, sanaiguilo qome naua lma'ate namayepi.
Qaq 'era da ỹa'aqtac Aỹem Nataxala'.
Da lasouaxashet na Israel le'ecpi
12Na Efraín qalaq aỹem coleesop naqa'en na latenataxanaxacpi,
qaq na Israel le'ecpi qalaq aỹem coleesop naqa'en nam saq 'enpi.
Qaq na Judá, qalaq ca'ai Ñim Lo'onatac 'Enauacna,
qaq nagui ỹataqta ỹalaxaguet nam ỹaqa'a atamnaxala'pi.
Currently Selected:
Oseas 11: LÑLE13
Highlight
Share
Copy
Want to have your highlights saved across all your devices? Sign up or sign in
Biblia Toba Qom, La'aqtaqa Ñim Lo'onatac 'Enauacna © Sociedad Bíblica Argentina, 2013.