MIGI KIITAHAY 11
11
Zefte micifi buy Israyel.
1Zefte mbur Galaˀat, mbur miwirwir ar vurumo, i mangal ngi ngwas sulome, a ya ka ti mbur mazilaka Galaˀat. 2Meketeŋ ngi Galaˀat vuna, a yaŋ ziri mizilehey le ya, yo ziri ngi meketeŋhey migilam muduba na, a ɓulaka Zefte avra, a ɓakaŋ: «Ki zuŋ ngi mumuŋ ndra ta, k'anta kusa lum gwat ngi zumahay ngi cine ndra ko neˀ ta.» 3Zefte a kil kileŋ avu sukum naŋhaya, ara cifi kini tir vay Top. Mizli kesefey a jumom ng'avi Zefte, a jiginam mi avu mizli bumaˀ.
4A zikam neˀ na, mizli Amoŋhoy a gam vurum ati Israyeley. 5Ti Amoŋhoy mizlaka taŋ ngi kiɗa vu so na, mizli micawwa ngi Galaˀatay, ara supoko Zefte a hirwuy Topo. 6A ɓakaŋ na: «Sawa, cifi madiɗa ngi soje ndrahay, ɓa i kiɗaka Amoŋhoy na.» 7Zefte a ɓa mizli micawwa ngi Galaˀataya na: «Mihirsikiy, muɓuloko ya ti hay baha na, i kumo ta kwa? Na bonoy a lumukum le so na, ki soko ng'avi ya mbri mbri maka?» 8Mizli micawwa ngi Galaˀatay, a ɓaka Zefte: «Ndra mumoko wurenna ng'avi ka na, ɓa ki ru, i ra kiɗaka Amoŋhoyo, ɓa ki cifi buy ndra, waɗ buy ngi Galaˀatay keɗeɗe.» 9Zefte a ɓa micawwa ngi Galaˀataya: «Da ki zilikiy nga kiɗa Amoŋhoy, da Bumbulvuŋ a vuliy taŋ le asi haŋ ɗu na, yi sa cifi buy kumo.» 10Micawwa ngi Galaˀatay a mbiɗakaŋ di: «Da i gaka kaɓa ndra miɓaka na ta na, Bumbulvuŋ i sedewo ndra.»
11Akẽh na, Zefte aru asi mizli micawwa ngi Galaˀatay tuwa so. A vulakaŋ buy, yo madiɗa ngi sojehey ma. Zefte a mahiri ngi ɓi hana cek a mbuŋ Bumbulvuŋ a Mispa.
Mingiɓi ngi Zefte da Amoŋhoy
12Zefte a slin mizli ng'avu buy ngi Amoŋhoy, ɓa a ɓakaŋ na: «Mizlira ndra ati ka i mi, ɓa ki so gi vurum ati ruwuy ɗu naka?» 13Buy ngi Amoŋhoy a ɓa mijiviɗ ngi Zeftehey tuwa: «Ti Israyeley maboko ti si ruwuy Ezipte na, a tiɓaka hirwuy ɗu, zle ar sozo ngi Arnoŋ hã sesẽŋ a ˀay didik ngi Yabok waɗ sozo ngi Zurdeŋ. Mo ndra di wurenna ti leleŋ so.»
14Zefte tuwa, a slin mizli ng'avu buy Amoŋhoy tuwa siy ma ni, 15ɓa ara ɓakaŋ: «Zefte a ɓi na: ko Israyeley a tiɓam hirwuy Moˀapa ta, hirwuy ngi Amoŋhoyo ta ma. 16Naŋ kine ti taŋ maboko ti ruwuy Ezipte na, a zuɓam jiviɗ ngi wuzlaɓuh mikirɗak kirɗak, hã sesẽŋ a mi mubuliy lavaɗa, a ndilam a Kades. 17Israyeley a slinam mizli baɗ a diga ng'avu buy Edom, ɓa a ɓakaŋ na: ‹Pula ndra jiviɗ i bam ng'ar hirwuy ɗike.› Amma buy Edom a ngum ta. A slinam ng'avu buy Moˀapa ma, a ngum ta ma, a ndiram a Kades. 18A dirba nah, a zuɓam jiviɗ ngi wuzlaɓuh mikirɗak kirɗak tuwa amuŋ. A taka ruwuy Edom ati Moˀapa teˀe, a ndilam tisi pas ngi miprik ngi ruwuy Moˀap. A ɗiyaka guɗuk taŋhay ti duba Arnoŋ, ko a cam nga ruwuy Moˀapa ta, asi Arnoŋ i maakway ngi Moˀap vuna. 19Israyeley a slinam mizli baɗ a diga ng'avi Sihoŋ, buy ngi Amoŋhoy miwa Heseboŋ, a ɓakaŋ na: ‹Pula ndra jiviɗ, ɓa i ngiraka hirwuy ɗike hã ar li pisar ndra.› 20Amma, Sihoŋ a ngum ta. A cikila mizli naŋhay gar, ara ndaham a Yahas, a kiɗam vu ati Israyeleye. 21Bumbulvuŋ Buymisemuŋ ngi Israyele, a vula taŋ Sihoŋ ati mizli naŋhay cek asi haŋ taŋ, a kiɗa taŋ. Akẽh na, Israyel a tiɓa hirwuy ngi Amoŋhoy misi anga cek. 22A tiɓaka hirwuy ngi Amoŋhoy cek, zle ar sozo ngi Arnoŋ hã sesẽŋ a ˀay didik ngi Yabok, zle a wuzlaɓuh mikirɗak kirɗak hã sesẽŋ a mizaw Zurdeŋ. 23Na a dirba Bumbulvuŋ Buymisemuŋ ngi Israyel muɓula Amoŋhoy a mbuŋ sukwi naŋ Israyel tuwa, wurenna ka ki wuɗ ɓa ki ɓula taŋ ya mbri maka? 24Hirwuy kuli ɗik Kemos muvuluw di na, naŋ da takwa? Na gwat Bumbulvuŋ Buymisemuŋ ndra muvula ndra di le da ndra gar na, a ndir da ndra ta vur mike? 25Na wurenna, ki wa vu ɗike fineˀ Balak mangal ngi Sipor, buy ngi Moˀap na sukwani? Na Balak vuna a jigin mi le avu Israyele, ɓa hã a gam vurum kwa? 26Ti Israyeley micifam zleˀe a Heseboŋ ati Aroˀer waɗ prok taŋhay, ar walahay ngi ciki Arnoŋhoy gar na, vi t'ani skata. Na ki tiɓa hirwuyo ti nah na zleˀe ta vur mike? 27Yi pura avu ya na, i guw malambaˀ da ka ta, amma i ka magiy malambaˀa, asi ki ra wuɗ gi vurum ati ya. Anja Bumbulvuŋ migi kiita da mizli, a ga kiita dana da Israyeley ati Amoŋhoy.»
28Amma ko buy ngi Amoŋhoy, a cine mingiɓi ngi Zefte miɓaŋ di na ta.
Zefte muvula zuŋ naŋ ngi gi mikuli
29ˀUf ngi Bumbulvuŋ a ci avu Zefte. A bula ruwuy vay Galaˀat ati Manase, aru nga Mispa ngi Galaˀat, ɓa ara tuwuɗa maakway ngi Amoŋhoy. 30Zefte a hudum a mbuŋ Bumbulvuŋ, a ɓi: «Da ki vuliy Amoŋhoy na le asi haŋ ɗu gisiŋ na, 31ti ya masa mo tir vurumo, mbur masa bo dumbuŋ ti hay ɗu, nga ji ti ya hirnga na, mbur nah i ngi Bumbulvuŋ, i sa gi di mikuli mizlam zlam wãˀ.» 32Zefte a tuwuɗa maakway ngi Amoŋhoy nga gi vurum ati taŋ, Bumbulvuŋ a vulaŋ taŋ asi haŋ naŋ. 33a kiɗa taŋ zle a Aroˀer hã sesẽŋ gweˀ avu Mimit ati Abel-Keramim, a tiɓi walahay kukur cuw. Mizli Amoŋhoy a hĩhĩyam haɗi. Akẽh Amoŋhoy a hinam hirnga a mbuŋ Israyele.
34Ti zefte mamo ngi hay naŋ a Mispa so na, i zuŋ naŋ mubo nga ji di hirnga, ara kiɗ jãwjãw, ara ɓuruk aseˀe. Zuŋ naŋ kpesl purla i naŋ, ko mizile, ko mongoso mekelem anta. 35Zefte mupura keɗ na, a ngira zana naŋhaya, a ɓi: «Aw zuŋ ɗu! Ki zuɓiy mendere le, mawuɗ a lumiy mendere na i ka vuna si. Yi lih mi le haɗi a mbuŋ Bumbulvuŋ si, i mo ti mi gu mata.» 36Amma zuŋ naŋ tuwa, a ɓaŋ: «Baha, ki lih mi le haɗi a mbuŋ Bumbulvuŋ, na ka gi ti ya ka ka miɓa vuna si, asi Bumbulvuŋ a pula bol ɗike le avu mesene ɗik Amoŋhoyo.» 37Dar a ɓa cine tuwa ma: Vuliy kiya pal, i sa ram nga hirnga muwã ati cil ɗuwoy, i ra kuɗuma tuwuy, asi ya ma ra muc pam manja ɗuva zil na.» 38Zefte a ɓaŋ: ‹Aru›, a pulaŋ jiviɗ ɓa aru ngi kiya cuw. A cohom nga hirnga muwã ati cil naŋhaya, a kuɗma tuwuy a diga vur naŋ ma ra muc pam manja duva zil na. 39Kiya cuw migi muduba na, a mo ngi hay cine. Dar cine a ja mi ngi hudum naŋ ti zuŋ naŋ tuwa. Naɓa zuŋ a sin zile t'aruŋ. Dar Israyel a tiram di i sirik taŋ zle tapasa. 40Vur vi gar na, ngwas Israyeley a ram ndol le nga muwã ngi hin mufaɗ nga tuwa zuŋ ngi Zefte mbur Galaˀata.
Currently Selected:
MIGI KIITAHAY 11: BEGDC
Highlight
Share
Copy
Want to have your highlights saved across all your devices? Sign up or sign in
Bible en Langue Guiziga © L’Alliance Biblique du Cameroun, 2011.