MIGI KIITAHAY 12
12
Kiɗavu ngi Zefte ati Efrayimey
1Mizli Efrayimey a kusom, a tuwuɗaka mizaw Zurdeŋ, a ram nga Safoŋ. A ɓaka Zefte na: «Ki tuwuɗa maakway ngi Amoŋhoyo, ɓa ki ra gam vurum ati taŋ na, ki zila ndra ɓa i ram bumaˀ ta vur mike? I sa wuraka hay ɗike jom ti ka araŋ.» 2Zefte mbiɗa taŋ di: «Mi memeɗe a ci le haɗa ar wala ndra ati ziri Amoŋhoyo. I zulukum na, ki kiloko widi ɗu ta. 3I pura keɗ keɗ na, kum anta ki soko nga lih ɗu ta, dar i ɗuva dibiɗe taˀ da mucu, i tuwuɗa maakway ngi Amoŋhoyo, akẽh Bumbulvuŋ a vuliy taŋ asi haŋ ɗu. Na wurenna ki soko ngi gi vurum ati ya na, vur mike?» 4Dar Zefte a cikila mizli Galaˀataya cek, a gam vurum ati Efrayimey. Galaˀatay a kiɗaka Efrayimey le gu. Naŋ kine, mizli Efrayimeye a ɓam zleˀe na: «Kum mizli Galaˀataya, kum i is ngi mizli mikilam ti Efrayimey ti kil, ki kilam baɗ ar sukwi ngi Efrayime ng'ar sukwi ngi Manase.» 5A dirba nah, li tuwuɗ ngi mizaw Zurdeŋhey ngir ti Efrayim gar na, mizli Galaˀatay a tikaka taŋ mbes mbes. Da mbur mikila ngi Efrayime, a ndilo le a mi mizawa, a ɓi le: «Pulikiy i tuwuɗ» na, mizli Galaˀatay a ɓakaŋ: «Ki mbur Efrayim kwa?» Da a ɓi le «aˀa» na, 6Galaˀatay a ɓakaŋ: «naŋ kuy! Na zila Sibolet.» Mbur Efrayime a zila kanah gu ta, a zila nga naŋ: «Cibolet.» Akẽh so na, a jaka, a slakaˀay naŋ gweˀ avu li tuwuɗoy a mizaw Zurdeŋ. Ti nah na, a kiɗam mizli Efrayimey durmuk kukur mufaɗ nga cuw.
7Zefte mbur Galaˀata, a ga kiita da Israyeleye hã vi merkeɗ, a dirba nah, a mucu, a dikaka daˀ ar walahay naŋ Mispa ngi Galaˀat vuna.
Migi kiita mekelemey: Ibisaŋ, Eloŋ waɗ Abudoŋ
8A dirba Zefte, mici ar li naŋ ngi ga kiita da Israyeleye i Ibisaŋ mbur Betelyem. 9Ibisaŋ naŋ ti ziri mizilehey kukur makir waɗ mongosohoy kukur makir ma. A vula ziri mongoso naŋhay da mizli ngi sukwi mekelem ɓa a ɗuv taŋ, yo a ɗuva da ziri naŋ mizileheye kwana, i ziri ngi vrahay aya ya. A ga kiita da Israyele hã vi tarnaˀ. 10Ibisaŋ a muc, a dikakaŋ a Betelyem.
11A dirba Eloŋ mbur Zabuloŋ, mici ar li naŋ ngi ga kiita da Israyeleye, a ga kiita da Israyeleye hã vi kuruˀu. 12Eloŋ mbur Zabuloŋ tuwa, a mucu, a dikaka daˀ a Eloŋ hirwuy Zabuloŋ vuna si. 13A dirba Eloŋ, i Abudoŋ mangal ngi Hilel, mbur Piratoŋ miga kiita da Israyeleye. 14Mijiɗa zunguhoy a hay Abudoŋ kukur tarnaˀ, asi ziri naŋ mizileheye kukur mufaɗ, yo asi dideˀ naŋhay kukur makir. Abudoŋ a ga kiita da Israyele hã vi dangafaɗ. 15A dirba nah, Abudoŋ mangal ngi Hilele, mbur Piratoŋ, a mucu, a dikaka a Piratoŋ, hirwuy Efrayim, ar muwã Amalek
Currently Selected:
MIGI KIITAHAY 12: BEGDC
Highlight
Share
Copy
Want to have your highlights saved across all your devices? Sign up or sign in
Bible en Langue Guiziga © L’Alliance Biblique du Cameroun, 2011.