MIGI KIITAHAY 10
10
Mizli mekelem migi kiitahay: Tola ati Yaˀir
1A dirba Abimelek mumuc na, Tola mangal ngi Puwa, dideˀ ngi Dodo, i muy ngi Isakar, hay naŋ a Samir, a muwã Efrayim, a so laha Israyele. 2A zum buy angi Israyele vi kukur cuw nga makir, a muc, a dikaka a Samir.
3A dirba nah, Yaˀir mbur Galaˀat, a ci ar li naŋ, a zum buy angi Israyele vi kukur cuw nga cuw. 4Yaˀire, ziri naŋ mizileheye, taŋ kukur makir, a jiɗam zungu kukur makir taŋ, yo walahay taŋhaya kukur makir ma, hã wurenna, a zilaka walahay tayna, walahay ngi Yaˀirey. 5Yaˀir a muc, a dikaka a Kamoŋ.
Mizli Amoŋhoy mizlaka Israyeley ngi kiɗa vu.
6Mizli Israyeley a zlaka gi malambaˀ a mbuŋ Bumbulvuŋ sima. A huruk hurukam a mbuŋ Baˀal ati Astarte, waɗ a mbuŋ kuli ngi mizli Aramay, ngi Sidoŋhoy, ngi Moˀapay, kuli ngi Amoŋhoy, waɗ a mbuŋ kuli ngi mizli Filistihey. A pulaka Bumbulvuŋ mbak, a gam gawla naŋ mata. 7Bumbulvuŋ, a slikiɗ mevel fõh fõh ng'ar Israyeleye, a vula taŋ asi haŋ ngi Filistihey ati Amoŋhoy, 8Zle ti nana, Amorihey ati Galaˀatay, ara gaka taŋ bonoy, ara guzuvuraka taŋ, hã vi kuruˀ. 9Mizli Amorihey, a tuwuɗaka mizaw Zurdeŋ, nga gi vurum ati sukwi ngi Zuda, ngi Benjameŋ, waɗ ngi Efrayim. Hã Israyeley a cam ar bonoy madiɗaŋ. 10Akẽh na, Israyeley, a tilam mi da Bumbulvuŋ a ɓakaŋ: «I gam malambaˀ le avu ka, asi i pulukuw ka Buymisemuŋ ndra fuk, i ra huruk hurukam a mbuŋ kuli Baˀalay.» 11Bumbulvuŋ a mbiɗa da Israyeleye: «Ti Eziptehey, Amorihey, Amoŋhoy, Filistihey, 12Sidoŋhoy, Amalekey ati Maˀoŋhey mugukum bonoy na, ki tilikiy mi, i luhukum tisi haŋ taŋ ta kwa? 13Amma kumo, ki pulikiy fuk, joˀ ki gam gawla ngi kulihey. Vurˀe, y'anta mahiri ngi lih kumo mata. 14A ram! kum ara tilam mi da kulihey kum muwunaka taŋ na si. Anja i taŋ makiloko widi ngi bonoy kum madiɗa vuna!» 15Israyeley a ɓaka Bumbulvuŋ: «Aw Bumbulvuŋ ɗu! I gam mungra le, gi ti ndra kaɓa ka mawuɗo, amma laha ndra dana ma si!» 16Dar a kursaka kulihey misi zleˀe avu taŋ na, a huruk hurukam a mbuŋ Bumbulvuŋ muduba. Na Bumbulvuŋ a ɓusa bonoy Israyeley masaka na gu ta.
17Mizli Amoŋhoy a cikilam, a ndaham ndah ndah tir vay Galaˀat. Israyeley kwana, a cikilam, a ndaham a Mispa. 18Mizli Galaˀatay ati buy taŋhay, a ɓam ar wala taŋ: «Mara zla kiɗa vu dumbuŋ ati Amoŋhoy i waka? Mbur mizla le na, masa cifi buy ngi Galaˀatay gar i naŋ.»
Currently Selected:
MIGI KIITAHAY 10: BEGDC
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen-GB.png&w=128&q=75)
Want to have your highlights saved across all your devices? Sign up or sign in
Bible en Langue Guiziga © L’Alliance Biblique du Cameroun, 2011.