Hebreos 8
8
1Engani xáni ambe arhikia ixu jámberi, engani sánderu k'éri ambe arhikuekani jaka imesti eskachi jatsikorheska xásï ma táta k'érini, enga auandarhu anapu juramutini tirerkandani uaxataka, 2enga ambakiti tióstarhu marhuatspeni jaka, enga Acha úka, jima enga no ísku nema úka.
3Jimbokaksï iémendu táta k'ératini péranhasïnga eskaksï ima aiakuntaaka jurhengua ambe ka kéjtsïtakua ambe: Jimbosï uétarhejti eska imajtu ambe ma aiatspentapiringa. 4Jimboka ima no jamberi tátepiringa enga parhakpeni jámani japiringa, jimbokaksï ixu jámaxakaia engaksï kéjtsïtakua ka jurhengua ambe aiatspentajka. 5Indeksï tátecha imani ambe uandatsekorhekusïndi enga auandarhu anapu kakonhaskakueka, eska Moisesi na jásï ma xarhatamenhaka enga tióstani uénani jámempka úni. Jimboka arhisïnga: “Exe, ísïrisï jásï ma úaka eskari juátarhu na jásï ma xarhatamenhaka”. 6Ka ima sánderu sáni ambakiti úkua ma p'irastia jimboka imeri jimboeska enga sánderu ambakiti pakatperakua jaka ka enga sánderu ambakiti ambe aiátspekueka. 7Eka urheta anapu pakatperakata nómbema arhikua jukapiringa, máteru nóteru uétarhepirindia. 8Enga úka, Diósï no k'amak'amasï sési xéjpentasti ka uandasti:
Acha uandasti: Jauati jurhiata
engani Israeli ka Juda jinguni
jimbanhe ambe pakatperaaka.
9I pakatperakua no májkueniuati
ima jinguni engani chári ióntki
anapuecha jinguni pakatperaka
jiáni engaksïni jupijkuka
uékanksïni Egiptu petaatantani;
ka jimbokaksï pakatperakuani no kurhandirakuska
ji jurarkuaska,
Achasï ísï uandajti.
10Engani Israeli jinguni pakatperaaka
engaksï na ima jurhiatecha nitamaakia,
arhiauati, Achasï ísï uandajti:
Jucheti juramukuechani inchajtsïtauaka
ka imecheri mintsitarhu pakataaka.
Ji imecheri Diósïuaka
ka imaksï jucheti ireteuati.
11Nóteru uétarheatia eskaksï
márku iretarhu anapuecha jurhentperaaka
o eskaksï márkuecha jurhentperaaka
eskaksï Achani míteaka,
jimboakajtsïni iámeduecha míteaka,
k'érati ka sapirhaticha.
12Jimbokani púakuantauaka
imechani engaksï nósesi ambe niátaka,
ka k'amanharhintskuechani mirikurhikuauaka.
13Ka enga arhika eska jimbanhe ma juramukua jarhaska, arhikuekaxati eska urhetku anapu nóteru marhuasïngia; ka ambe enga iónikia ka t'arhepenia, uarhixamtia.
Currently Selected:
Hebreos 8: DKPJ
Highlight
Share
Copy
Want to have your highlights saved across all your devices? Sign up or sign in
Biblia en P´urhépecha, Michoacán, México © Sociedad Bíblica de México, A.C.