Hebreos 7
7
Jesusi, májkueni tátesti eska Melkisedeki
1Ka Melkisedeki, enga Salemi ireta irechepka ka Diósï auandarhu anapueri táteni, ima enga Abranini nípka kúntani, ka újchakurani, jiájkani enga junguani jápkia irechechani andaarini. 2Ka Abrani, imani íntskuspti andakateri sáni enga maiamperantskueka ka enga imeri jakangurhikua jamberi “Kaxumbekueri irecha” arhikuekajka ka engajtu, Salemi anapu irechani, enga “Sési jakueri irecha” arhikuekajka, 3no kámsïndi tátjembani, níjtu amambani, níjtu némani kángorhejki, no mítenhasti káni andajpenuski, ni káni uarhiski ka ísï eska Diósï Uájpa, méntkisï tátexati. 4Exe je eska xáni k'éri ambepka enga juchari ióntki anapu Abrani imani íntskupka andakateri sáni enga maiamperantskueka, ka imani ambe íntskuni enga sánderu jukaparhakuepka. 5Ísïsti eskaksï Lebi uájpecha, engaksï tátekua p'irajka, juramukua jimbo arhikata jarhasti eskaksï imeri márkuecheri andakata maiamperantskua p'iuaka, náuejkiksï imajtu Abraniri sïrukueni; 6Ka Melkisedeki, náuejki no Lebiri sïrukuepka, ima p'iraspti Abraniri andakata sáni enga maiamperantskueka, ka újchakuraspti imani enga Diósïri aiatsperakuechani káani jápka. 7Ka nónema uandaati eska k'érisï újchakurajka sapichuni. 8Ka ixu, andakata sáni enga maiamperantskueka, parhakpeni anapusï p'irajti; enga úka, uandanhasïndi eska Melkisedeki tsípiti jámaxaka. 9Ka ísï jámani Lebijtu, Melkisedekini andakateri maiamuspti enga Abranini íntskupka, náuejki ima p'irajka andakata maiamperantskueri, 10jimboka tátjemba t'uíni Lebi jinguni jámaxapkia, jiájkani enga Melkisedeki kúntani nípka.
11Enga úpiringa tátekua Lebichani jimbo k'amak'amasï espiritu p'inhani#7.11 –jimboka imecha jinguni jarhaska juramukua enga ireta intsïnhaka., ¿Ambeteruchi úrapirinia máteru tátani enga imajtu Melkisedekini jásïpiringa? ¿Ka enga no “Aaronini jáxepiringa”? 12Jimboka eka, tátekua ménderuenintaska, juramukuajtu ménderuenintaati. 13Jimboka ima engachi uandatseni jaka, máteru ireta anapueska, jima anapuesti enga nónema marhuarika tiósïo kéjtsïtakuarhu. 14Ka sési xarharaxati eska juchari Acha, Juda anapuespka, ka Moisesi imani iretani nósani uandasti enga tátekua ambe uandani jápka.
15Iámendu inde ambe sánderu sési jánhaskorhesti, enga ísï xarharaka máteru táta, Melkisedekini jásï ma, 16enga no parhakpeni anapu jimbo táta únhaka, enga ima irekua xarhataka enga nónema újka xerentani. 17Jamberi imeri ambe arisï uandakata jarhasti:
“T'úri méntkisï táteska,
májkueni jásï ma eska Melkisedeki.”
18Ísï jámani juramukua urheti, xerekorhentasti, jimboka no uinhapekua jukaska ka jimboka no marhuaska, 19jimboka juramukua nómbema k'amak'amasï séserantaska, jimboka uénatarakuajkuespka, eskachi ísï jámani sánderu ambakiti ambe mintsikapiringa, engachi jimbo Diósïni andarherajka.
20Ka no ískuespti; uandakua jukaparharatarakua jimboespti, ka máteruechaksï ískuespti, 21ka inde uandakua jukaparharatarakua ima ísï uandaspti:
“Acha uandastia
ka no mómuntaati:
‘T'úri méntkisï táteska.’ ”
22Jimbosï Jesusi pakaratspti ambakiti méni jati, enga úaka Diósï jinguni márkuenhantani. 23Ka támuksï ima tátecha uánespti, jimbokaksï no ióni jámsïrempka. 24Ka inde k'óru méntkisï anapu tátekua kámsïndi, jimboka méntikisïska. 25Jimbojtusï újti p'ímutantaani imechani engaksï imeri jimbo Diósïni andarherakorhentajka, jimboka méntkisï tsípiti jarhasïnga ka úsïndi uandapetspeni. 26Xásï k'éri táta máchisï uétarhenchani jápka: Kaxumbiti ma, enga nómbema nósesi niátaka, ka enga nómbema nósesi jásï jukaraaka, ka enga no pírekorheajka k'ámanharhintstichani, enga auandarhu sánderu karhakua péranhaka, 27enga no uétarhenchajka eska mándani pauani urheta ambe ma aiatspentaaka imeri k'amanharhintskua jimbo, ka jimajku ireteri k'amanharhintskua jimbo kéjtsïtani, ísï eskaksï máteru táta k'ératicha ka iámendu indeni ambe, ma jimbojku ísï úti, enga aiakorheka. 28Jimboka juramukua, k'érati táteni imani péraasïnga engaksï no uinhapekorheka: Enga úka, uandakua enga jukaparhaka, ka enga juramukua jinguni tátsekueka, uájpani táta ústi, imani enga k'amak'amasï sésika ka enga méntkisïuaka.
Currently Selected:
Hebreos 7: DKPJ
Highlight
Share
Copy
Want to have your highlights saved across all your devices? Sign up or sign in
Biblia en P´urhépecha, Michoacán, México © Sociedad Bíblica de México, A.C.