Hebreos 9
9
Ióntki anapu kéjtsïtakua no marhuasïndi
1Ióntki anapu pakatperakuajtu p'indekuechani kángorheasïrempti ka tióstani jatsikorhespti ixu parhakpeni.
2Tátsepani jatsinhasïrempti kandela jatakua ka kurhinda Diósï mindakata p'íjtsïtakua, 3jima tátsepani enga tsimandarhu arhunhepka jima Santisimurhuespti, 4enga xunhanda jatsikutarakua tiamu tiripitiri kéjtsïtatarakua jápka, ka pakatperakata jatakua#9.4 enga iámu tiamu tiripiti jimbo pitsïrhentskata jápka ka jima máteru mana jatakua, imajtu tiámu tiripitiri, ka Aaroniri chkári enga ménderu tsikirhuntapka, ka pakatperakateri juramukuecha. 5Jimaksï anhajtsïkutixapti#9.5 –pakatperakua jatakuarhu. ánjelicha engaksï Diósïri uinhapekua xarhatempka ka engaksï iámu k'umajtsïtempka púatsperantskuarhu. Eka úka, iáiasïksïni inderi ambe no k'amak'amasï aianguaka.
6Enga xáni ambe ísï pérakata jarhempka, tátechaksï méntkisï jimajku inchasïndi enga inchani jámantkueka ka jimaksï marhuasïndi Diósïni uandatsekorhekuni. 7Ka k'éri táta santismurhu ma xánharku inchasïrempti ma uéxurhini jimbo ka jandiójku, ka no úsïrempti inchani enga no páni japiringa iurhiri enga imeri k'amanharhintskua jimboepiringa ka támu pásïrempti enga ireteri jimboepiringa. 8Espiritu Santu indeni jimbo jánhastpesïrempti eska santisimurhu nótki mítakorhesïrempka jiájkani jámberi enga útasï japiringa tiósta enga urhetipka. 9Iámendu inde ambe íni jurhiatekuecheri eranhaskatarakuesti, májkueni eska jima na mámaru ambe kéjtsïtanhempka enga uandatsekorherichani no marhuakuempka k'amak'amasï séserantaani. 10Ka akua ka itsïmakua ka iámendu jásï pímbinhajkperantskua p'indekua ambejkuespti, enga jiájkani jamberi únhempka enga jamberi janopiringa jurhiata enga ménderuenipiringia.
Krístueri aiakorhekua iámu marhuaristi
11Ka Krístu k'éri tátestia imani ambakiti amberi enga jurhani jaka, tióstarhu sándeu k'éri ka sánderu séserantskata, engaksï no parhakpeni anapuecha úka, ka enga no ixu parhakpeni anapueka. 12Ka ma xanharku ka méntku inchasti ka nóteru méni uéntaati, ka no máteru amberi iurhiri aiatspentani, imeri iurhirisï aiatspentaati engajtsïni jimbo k'amanharhintskuarhu p'ímutantaka. 13Ísïsti eska manakorhericheri iurhiri ka úakasï kurhirakateri pakajpekata marhuasïrempka enga atarhekorhenhempka, enga úka, jinijkusï p'ikurhpentempti. 14¡Náxantsïni no sánderu sési pímbinhajkuntajki Krístueri iurhiri! Enga Diósïni jinguni nómbema arhikua jukaka ka enga Espíritueri jimbo, enga méntkisïka, aiakorhentaka ka eskachi ísï jámani Diósïni marhuakuaka, enga tsípiti jámani jaka. 15Jimbosï jimbanhe pakatperakueri ima pakaratspititi; eska imeri uarhikua p'iuaka iámendu nósesi úkata ambe enga ióntki anapu pakatperakua jimbo nósesi niátanhapka, ka eskaksï p'iuaka ima engaksï uandajpanhantakia intsïnhani engaksï méntkisï anapu aiamenhatini jaka, 16jimboka uétarhesïnga eska úrheta uarhiaka ne enga karakata jimbo jurajkutini jarhajka aiatsperakua, 17jimboka karakata jiájkani marhuasïngia enga na uarhinhajkia, ka nótki marhuasïndi enga útasï jámani jauaka ima enga aiatspitika. 18Urheta anapu pakatperakuajtu uénakuarhu iurhiri tsîtanhaspti. 19Moisesijtu jiájkani enga na k'amarapkia imeri iretani juramukua arhikuntani, imajtu manakorhericheri iurhiri itsï jinguni jeuetatini ka takusï charhapiti ka isopo jimbo, karakatani jamberi atarhespti ka iámu atarhpespti 20uandaparini: “I iurhiri pakatperakueristi engaksïni Diósï axacheka” 21Ka k'éri tióstantu atarhespti ka iámendu ambe enga uandatsekorhetarakueka; 22jimboka juramukua arhisïnga eska iámendu ambe jatsispka iurhiri jimbo pímpinhajkunhantani, ka enga no tsîncheska iurhiri eska no púatsperanhantaaka. 23Jimbosï uétarhejti, eska p'imbinhajkunhantaaka iámu ambe enga auandarhu anapu ambe ts'éndantajka, enga úka, auandarhu anapu ambe sánderu ambakitiri iurhiri jimbo p'imbinhajkunhantasïndi. 24Jimboka Krístu no jima sánderu pímbinhandekuarhusï inchaka enga parhakpeni anapu nema úka, enga imani ts'éndantajka enga ísïka, aundarhumendusï inchati, Diósïni kurhandirakuni juchantsïni arhijpecheni, 25ka no mémechani uéntani aiakorhentani, eska táta k'éri na jámka mándani uéxurhini ka útasï máteru amberi iurhiri aiatspentani. 26Enga ísïpiringa mémechani uéntapirindi nósesi nitamakorheni, jiájkani uératintki enga parhakpeni uénaka. Sánderu sáni iásï xarharasti ka ma xanharku, iásï enga sánderu sési jándekuarhueka, imeri aiakorhentskua jimbo jurhasti k'ámanharhintskuani méntku k'amajkuni. 27Ka májkueni eska na jaka, eska parhakpeni anapuecha ma xanharkusï uarhiaka ka eska tátsekua janoaka arhinharhikperakua, 28Krístujtu májkueni, eska na aiakorhentaka iámenduechani k'ámanharhintskua p'ikurhpentani, ménderu xarhantaati, nóteru k'amanharhintskua p'ikurhpentania, p'iuantanisï juuati imechani engaksï erontani jaka.
Currently Selected:
Hebreos 9: DKPJ
Highlight
Share
Copy
Want to have your highlights saved across all your devices? Sign up or sign in
Biblia en P´urhépecha, Michoacán, México © Sociedad Bíblica de México, A.C.