Miq 6
6
Lhawuk lakalelhthayaj tä itiyej häp laka wichi
1Ch'ahuyaye m'ak tä Lhawuk yäme tä yok:
“Nephä, is chik chenhas iläte ämet
tä letiyej letes oka wichi.”
2¡Chenhas, ch'ahuyaye Lhawuk lhämet!
¡Honhat fwetes tä t'unhi,
tetshan m'ak tä Lhawuk yen tesayej
laka wichi Israel!
3Lhawuk yok:
“Amel tä ahäpehen oka wichi,
chulhay n'oho.
¿Atsi m'ak tä owoyejn'aj amehen
wok oailhaklithen p'iya?
4Oaitonchephähte tä lhehi Egipto,
wet nemhit ahäpehen Egipto lheley kwenkay.
Ochente amehen Moisés, Aarón, lhäy'e Miriam,
häpkhilek amel lhekche lhamel.
5Ika wichi, tichunache häp m'ak tä ni'isa
tä Balac, häp Moab kaniyat,
t'uhtehläk iwoyeje achätilis.
Wet yej p'ethatlä m'ak tä Balaam, Beor lhäs,
nichulhohte häp niyattso tä iwoye olhämet.
Isit'ak lep'ethatlä tä owohte n'äyija achätilis
tä lhamel tälhe lakasthawet tä ihi Sitim,
wet ohänche lhamel häp tewok tä Jordán
pajtha nichäte lakasthawet tä ihi Gilgal.
Enpej atichunhayaja tähestso
tä ispej m'ak tä owoyej amehen.”
M'ak tä Lhawuk iwatläk wichi iwoye
6¿Atsihila m'ak chik oyen t'awayhata
Lhawuk Dios tä pule lhele
häpkhilek on'okwiyej?
¿Etp'i oyenla t'awayhata w'asetaj les
tä hiw'en tefwaji häp nekchäm,
häpkhilek õ'wunhomche?
7¿Lhawuk akäjejlhi p'iya chik oyen t'awayhata
mil tson'atas tä hin'ol
wok diez mil aceite tä hätet iwoye tewok lhayis?
¿Wok hä is chik olän olhäs tä ochunkatsek
tä otiskanejpe och'isukyaj
lhäy'e tä ottaynajlä oka Dios?
8¡Kha! Pajche Lhawuk ifwel amho
m'ak tä is chik lewoye.
Is chik lewoye m'ak tä is alhoho,
wet lehumin aka Dios
wet lep'altsenhen aiyhäj,
wet letach'ahuye aka Dios,
wet nemhit alechäjlhi
tä lhehi tä lham tatache.
Lhawuk lhämet tä tatayhlä häp n'otkanyaj lhäy'e n'olhämet tä kamatache
9Lhawuk t'änehen häp Jerusalén lheley,
wet elh tä lechowej ihi häp tä tach'ahuye.
Lhawuk yok, “Amel tä alehutwek
tä lhehi hupuy, ch'ahuyay n'oye.
10Hin'o tä ni'isa lewukwe,
nilhokej lakäywet tä hiw'en tä ichufwi,
ikalheji lakey tä ni'isa tä iwoye.
Häp tä tamenej tä on'äyiho,
tsi t'akanyaj tä iwoye
häp tä tamenej tä hiw'en m'ak.
11¿Chi iwoyek otäyhtej letes
hin'o tä ni'isa lakaw'awlhanthi
wet ikanej iyhäj?
12Wichi tä hiw'en m'ak tä ihi hupuyna
matche tä hich'atej wichi tä p'elitses.
Nilhokej wichi tä ihi hupuyna
iwoye lhämtes tä kamatachehen
wet ikanejen iyhäj.
13Häp tä tamenej tä nech'e otasin amel,
otifwila amejen, tsi oyen tesa amejen
hach'isukyajay tä lewoye.
14Let'ekhihena mat tek lhip'isihena,
kamaj lechuyuhihena t'at.
Lhenhilhila akapuchehis,
mat lajit lheleya.
Tej chik iche m'ak chik let'amajej,
tha aisiyejt'ala.
Ochenla amehen n'oka'tshayaj
wet häp tä ihämthila.
15Letutcheyhla,
mat niwohit m'ak chik lelanhihla.
Lechofwajihla aceitunas,
mat aisiyejt'ala aceite chik tälho.
Let'äsihla uvas,
mat leyähiyejt'ala hat'es chik tälho.
16Tsi häp tä kaleyache rey Omri
lhäy'e lhäs Acab lhamel lakeyiste iwoye.#1~Rey 16.23-33; 21.25-26
Matche tä akeyis hätet iwoye
lhamel lakeyis tä ni'isa.
Häp tä tamenej tä oyachajila amehen häp atayhfwas,
häpkhilek iwasthi aka honhat
wet wichi yafwuthichehena lepästey,
itihla amejen leläkwyhanyaj.
Tej tä ahäpehen oka wichi,
mat iyhäj wichi ayenla w'et m'ayeka.”
Currently Selected:
Miq 6: WCHB
Highlight
Share
Copy
Want to have your highlights saved across all your devices? Sign up or sign in
Biblia Wichí, Dios Lhämtes tä Matchehen © Sociedad Bíblica Argentina, 2002.