Miq 7
7
Nemhit iche Israel chik t'ifwtiyej Dios
1¡Wuj tä olhakli ihi!
Ohätet iwoye hin'o tä fwetaj t'ukwe hal'ä lhay
tä tajyäme lewhäy tä iche.
Onchuyuhlä hal'ä lhay,
mat onlhokhiyet'a tsi nofw.
2Honhatna nemhit iche hin'o tä t'ifwtiyej häp Dios.
Tatäy wichi tä isen m'ak tä iwoye.
Nilhokej lhamel elh tefwajpejni
yen tichunhayaja chik ilän elh.
3Matche tä lhamel ihanej lakey tä ni'isa tä iwoye.
Niyatey inityenej chik iyhäj
hiw'enho m'ak tä iwatlä.
Wet n'okalelhthayajwos hits'ilkat
elh tä tis tä lhamel tach'ote.
Wet wichi tä len'ohyaj ihiche
iwoyet m'ak tä lhamel ihuminche.
Nilhokej lhamel ikänchi häp m'ak tä is.
4Tej elh chik is thayej,
kamaj tet iwoye ch'uthanil
wok hal'ä tälhe tä lhey ihi.
Mat nek t'at lewhäy tä ikathiyeja laha
lakeyis tä ni'isa tä iwoye,
mälhyej tä silätwos pajche ifwenhopej lhamel,
wet nemhit lhamel ihanhiyeja m'ak chik iwoye.
5Yej t'ekhaye apuhfwa
wet yej t'ekhaye aelh.
Tej chik hach'efwa, tha a'äm hin'ohlä,
ikanla amej p'iya.
6Tsi hin'o iwohit'a haya lajcha,
wet atsinha tatayhlä lako,
wet lecheyäs ko tatayhlä lakatela,
wet hin'o letayhfwas häpe t'at lew'et lheley.#Mat 10.34-36
7Mat olham otihiyeja oniwhayaj
häp Lhawuk Dios tä Ofwayhthi,
tsi häp tä lham tach'ahuhilat n'oye chik ot'alhe.
Lhawuk ifwayhthila laka wichi
8Amel tä ahäpehen olhamel otayhfwas,
yej a'käjejlhi owit'äyhyaj tä in'oyejen.
Olhamel onchätnaj katsi,
mat oneyhiphäla.
Olhamel oihi honatsi,
mat Owuk Dios häpe oka isi.
9Olhamel owonaj och'isukyaja
wet ottayhlä häp Owuk Dios.
Häp tä tamenej tä wuj olhamel oteläythayaj,
tsi Owuk tä tawäkwäy n'oyehen.
Mat itetshanhila m'ak tä tamen n'oyejen,
ikalelhthila n'oyejen m'ak tä is alhoho.
Itihla n'ohiche häp isi,
wet olhamel ow'enla häp m'ak tä is alhoho
tä lham iwoyej n'oyehen.
10Olhamel otayhfwas chik hiw'enla,
lhamel wuj tä len'äfwlhi ihihila.
Lhamel iläkwlhinaj n'ohen wet yok:
“¿Chi tä ihi Awuk Dios?”
Mat okäjiyejlhila lewit'äyhyaj
chik ihiyejena lhamel,
tsi letayhfwas t'äsichela lhamel,
hätehlat iwoye iyhät tä õt'äsche
tä ichehen hup kawayhil.
Jerusalén yachajiholak õyenlhi
11Jerusalén, nämla ifwala
tä õyenlhi alafwek tä tuntey,
wet aka honhat lepesey õy'ayhthichetshila.
12Nämla ifwala tä wichi
tä tälhe nilhokej honhatil ihohla ame.
Tälhe Asiria, Egipto,
wet tewokitaj tä lhey Nilo,
wet tewokitaj tä lhey Éufrates,
wet lewomekitas wet lhäy'e häp chenhas.
13Honhat nech'e ts'anisla t'at,
häp wichi lakeyis tä ni'isahen
tä lhamel iwoye tä tamenej.
Lhawuk yachajiholak hip'altsen häp Israel lhayis
14Iwuk, uye aka wichi,
häpe t'at tson'atas tä am tä aläy.
Lhamel ts'ilkas t'at tä ihi tayhi
wet iwhäye honhat tä is.
Is chik lhokose hup tä ihi Basán lhäy'e häp Galaad,
hätet iwoye ifwalas tä pajche tä lechunhanwethä.
15Päyne m'ak tä lhamel t'iseltejen,
hätet iwoye ifwalas p'ante letonphä tä tälho Egipto.
16Is chik wichi tä i'pe honhat hiw'en,
häpkhilek lhamel wuj tä len'äfwlhi ihi
wet nemhit takhajayhen.
Hätehlat iwoye ch'isukwis tä nhanayej tahuyhen,
wet hätehlat iwoye wichi tä nilätachehen honhat,
häp len'äfwlhi tä tamenej nem yämlhi.
17¡Is chik lhamel tufw honhat,
hätet iwoye amlhäs tä tufw at honhat,
wet hätet iwoye iyhäj m'ak tä lhaitonchehen honhat!
Is chik tachettiyejchehen lenowayhyaj
tä inukwephä tä tälhomche
honhat lhipey tä leletnhawtes,
wet iho ame tä ahäpe Lhawuk Dios.
Dios itäyhthiyeja laka wichi letes
18Ihichet'a Dios chik häte iwoye häp am,
tsi häp tä letäyhtej letes
aka wichi iyhäjfwas tä imälhehi.
Lehumin tä leti n'oyejen hap'altsenyaj,
wet leleche awäkw tä leti n'oyejen.
19Achajo tä leti n'oyejen hap'altsenyaj,
potpe nilhokej olhamel okeyis
tä ni'isahen tä in'oyejen.
Is chik letafwomej och'isukyajay
wet thate lewomekitaj tä pitoj.
20Ti n'oyejen ahumnhayaj lhäy'e afwtihyaj,
mälhyej tä lefwenho p'ante olhamel otetsel
Abraham lhäy'e Jacob tä lehumnhila n'ohen.
Currently Selected:
Miq 7: WCHB
Highlight
Share
Copy
Want to have your highlights saved across all your devices? Sign up or sign in
Biblia Wichí, Dios Lhämtes tä Matchehen © Sociedad Bíblica Argentina, 2002.