1 Njé gə́ Kɔrḭtə 9
9
Njekaḭkula uba né gə́ wɔji dəa ya̰
1See ma m’to ŋgonkoji el wa. See ma m’to gə́ njekaḭkula el wa. See ma m’oo Jeju Mbaidɔmbaije lə sí el wa. See seḭ toje kula ramje gin Mbaidɔmbaije’g el wa. 2Ɓó lé ma m’to gə́ njekaḭkula kəm njé gə́ raŋg el kara kəm sí-seḭ’g lé ma m’to gə́ njea ya. Mbata seḭ nja toje gə́ njékɔrgin kula ramje gə́ m’to ne njekaḭkula gin Mbaidɔmbaije’g lé ya.
3Yee ɓa gə́ né kɔr ta dɔm’g no̰ deḛ gə́ njésəgmje’g. 4See j’askəm sɔ né gə kai né el wa. 5See j’askəm kɔr kɔnan sí gə́ dené mba karee to njekaw sə sí gə looje lai gə́ j’a kaw keneŋ to gə́ njékaḭkulaje gə́ raŋg ləm, gə ŋgako̰ Mbaidɔmbaije ləma, gə Képas ləm tɔ ra lé el wa. 6Esé see jeḛ gə Barnabas gə kar sí ba ɓa j’askəm lal ra kula el wa. 7See njerɔ gə́ ra ɓa si aw gə́ rɔ’g ŋga a kun lar ləa-yeḛ nja tɔɓəi gə mba tel kuga né dɔ jia wa. See na̰ ɓa ma̰a nduú ŋga a lal sɔ ka̰dee wa. Esé see na̰ ɓa ul nékulje ŋga a lal kai mbà dee wa.
8See ta gə́ m’pa lé to gə́ tapa dəwje ba ɓó godndu Moyis pa taree tɔ el wa. 9Mbata deḛ ndaŋg ta mee maktub godndu Moyis’g pana: Bɔ maŋg gə́ i ilá dɔ kó’g karee tuba ar ka̰dee tal lé i a tɔ təa el ŋga. See Ala pa wɔji ne dɔ maŋgje gə kar dee ba wa . 10Esé see ta gə́ pa lé pa mbata lə síjeḛ to wa. Oiyo, pa mbata lə síjeḛ ya pana: Yeḛ gə́ ndɔ-ndɔ lé a kunda mée yel gə mba kiŋga dɔ kée ya ləm, yeḛ gə́ unda kó lé kara a kunda mée yel gə mba kiŋga kandə kó kea̰ ya ləm tɔ. 11Ɓó lé jeḛ n’dubu né gə́ maji gə́ wɔji dɔ ndil sí mbuna sí’g ndá see to kəm kar sí j’iŋga né gə́ wɔji dɔ darɔ síjeḛ ji sí’g el wa . 12Ɓó lé njé gə́ raŋg d’isi gə torndu gə mba kiŋga ne ji sí’g bèe lé nɛ ɓəd ɓa see jeḛ lé j’a kunda dee gə lèlé ba el wa.
Nɛ torndu gə́ togə́bè lé j’isi ne el, jeḛ j’ula rɔ sí ndubu dɔ néje’g lai ɓó gə mba kar né kára kara ɔg rəw tagə́maji lə Kristi el. 13See seḭ gərje el wa, deḛ gə́ ra kula kəi-Ala’g lé d’usɔ né gə́ d’unda gə kəmee d’ar Ala mee kəi’g ləa ləm, deḛ gə́ ra kula loo-nékinjaməs’g lé kara d’iŋga né gə́ dɔ tabul’g gə́ wɔji dɔ dee keneŋ ləm tɔ . 14Togə́bè ɓa Mbaidɔmbaije un ndia mba kar deḛ gə́ d’ila mber Tagə́maji lé d’iŋga nékodo rɔ dee gin Tagə́maji’g lé tɔ .
15Ma nja m’taa torndumje neelé kára kara m’ar dee d’wɔji dɔm el ləm, maktub nee gə́ m’ndaŋg kara m’ndaŋg mba kar dee d’am ne né el ləm tɔ. Kam m’wəi gə́ kwəi lé ɓa maji unda kar dee d’a kɔgm dɔ ta nee gə́ ka̰ ti rɔm lé. 16Tagə́maji gə́ m’ila mberee lé ma m’oo loo ti ne rɔm el. Tɔgərɔ ya, to né gə́ unm lad ilam keneŋ ya. Ɓó lé m’ila mber Tagə́maji lé el ndá némeeko̰ a nai dɔm’g. 17Ɓó ma m’ra gə məəm gə́ maji ndá meemaji ɓa gə́ nékoga dɔ jim ya. Nɛ ɓó lé to né gə́ unm lad ilam keneŋ ɓa m’ra kara to kula gə́ d’ɔm jim’g ya. 18See ɗi ɓa gə́ nékoga dɔ jim wa. Tagə́maji gə́ m’ila mberee m’ar dee gə́ kar ɓó m’ra m’taa ne torndu gə́ wɔji dɔ njekilamber Tagə́maji’g el lé yee ɓa gə́ nékoga dɔ jim ya.
19Mbata ɓó lə dəw dɔm kára kara godo kara ma nja m’wa rɔm gə́ ɓər lə dəwje lai ɓó gə mba kiŋga ne dəwje unda nje gə́ kédé. 20Mbuna Jibje lé ma m’tel rɔm gə́ Jib ɓó gə mba kiŋga ne Jibje. Mbuna deḛ gə́ d’isi gin godndu Moyis’g lé ma gə́ m’to gə́ gin godndu’g neelé el lé m’tel m’oso gin godndu’g ɓó gə mba kiŋga ne deḛ gə́ d’isi gin godndu’g lé tɔ. 21Mbuna deḛ gə́ lal godndu lé m’tel rɔm asəna gə dəw gə́ lal godndu tɔ, ɓó gə mba kiŋga ne deḛ gə́ lal godndu lé tɔ, nɛ ma lé m’lal godndu gə́ ka̰ Ala el mbata ma m’isi gin godndu gə́ ka̰ Kristi’g. 22M’tel m’to gə́ yɔ-dəw gə deḛ gə́ to gə́ yɔ-dəwje lé gə mba kiŋga ne deḛ gə́ to gə́ yɔ-dəwje lé tɔ. M’tel rɔm gə́ gar dəwje lai m’saŋg ne néje ɓəd-ɓəd ɓó gə mba kaji ne njé gə́ na̰je ya. 23Néje lai gə́ m’ra lé m’ra mbata Tagə́maji lé ɓó gə mba kiŋga ne né gə́ wɔji dɔm-ma nja keneŋ tɔ.
24See seḭ gərje el wa. Deḛ gə́ ndum na̰ gə ŋgwɔd loo-naḭ’g lé d’aiŋgwɔd lai ya nɛ dəw gə́ dum mareeje ɓa a kiŋga née, see gərje bèe el wa. Bèe ndá maji kar sí aḭjḛgwɔd gə mba kiŋga ne néngwɔd lə sí. 25Deḛ lai gə́ ndum na̰ lé d’ɔg rɔ dee dɔ néje’g ɓəd-ɓəd ti meḛ dee mbidi gə mba kiŋga ne dɔgugu gə́ a gə ŋgisi ya. Nɛ jeḛ lé n’ra gə mba kiŋga ne dɔgugu gə́ ŋgira kiŋ-kiŋ gə́ a gə ŋgisi el lé. 26Togə́bè ɓa ma m’aiŋgwɔd ɓó m’aḭ m’ila ne birkodé mbir-mbir el, m’un jim ndá m’unda ne né ɓó m’ər ne né el tɔ. 27Ma lé m’ɔb rɔm kag m’wa rɔm gə́ ɓər, nà banelə loo gə́ m’ila mber m’ar dəwje gə́ raŋg ɓa dee lé d’a kundam ɓad.
Currently Selected:
1 Njé gə́ Kɔrḭtə 9: SBA2015
Highlight
Share
Copy
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.