1 Njé gə́ Kɔrḭtə 10
10
Néra Israɛlje lé to gə́ nétɔji lə sí ya
1Ŋgakɔmje, tɔgərɔ ya, ta neelé ma m’ndigi kar sí síje keneŋ dɔ mbə’g el: ka síje lai lé d’isi gin mum gə́ wa kəm kàr’g ləm, deḛ lai d’unda baa-boo-kad dana gaŋg ləm , 2mum gə́ dəb dɔ dee’g gə baa-boo-kad gə́ deḛ gaŋg lé deḛ ra dee ne batɛm gin Moyis’g ləm, 3deḛ lai d’usɔ nésɔ gə́ ka̰ Ndil lé . 4Deḛ lai d’ai nékai gə́ ka̰ Ndil lé yee ɓa to mán gə́ uba kaar mbal’g tir-tir gə́ ndolè goo dee. Mbal neelé m’wa m’wɔji ne Kristi . 5Nɛ njé gə́ na̰je bula mbuna dee’g taa kəm Ala el mbata deḛ d’udu ne dɔdilaloo’g .
6Néje nee lai teḛ dɔ dee’g togə́bè mba to ne nétɔji mbata lə sí ɓó gə mba kar sí n’tusu rɔ sí j’ya̰ dan mal néje gə́ majel gə́ ra sí to gə́ ra dee kédé lé el . 7Maji kar sí toje njépole-magəje to gə́ njé gə́ na̰je gə́ mbuna dee’g lé el. To gə́ deḛ ndaŋg mee maktub’g pana: Koso-dəwje d’isi naŋg gə mba sɔ gə kai ɓa gə mba kuba loo kḭ ndam ɓəi . 8Maji kar sí n’tusu rɔ sí j’ya̰ dan mɔdkaiya’g to gə́ njé gə́ na̰je gə́ mbuna dee’g ra lé el, deḛ ra togə́bè ya nɛ mee ndəa gə́ kára ba ya d’wəi keneŋ d’as tɔl-dɔg-loo 23 . 9Ar sí naaje meekuru lə Mbaidɔmbaije to gə́ njé gə́ na̰je mbuna dee’g na̰ lé el, deḛ ra togə́bè ya nɛ li to̰ dee tɔl dee ar dee d’udu guduru . 10Imje na̰ to gə́ njé gə́ na̰je mbuna dee’g d’im ne na̰ lé el, deḛ lé deḛ ra togə́bè nɛ njetuji dəwje ndum dee ne mburug-mburug .
11Néje lai gə́ teḛ dɔ dee’g lé to nétɔji sí ya. Deḛ ndaŋg taree d’ar sí mba ndəji sí ne, jeḛ gə́ rudu ndəa a gə kun dɔ sí’g lé. 12Togə́bè ɓa maji kar yeḛ gə́ ə̰ji ta mée’g pana: Neḛ n’aar tar lé tɔs kəmee dɔ rəa’g, nà a kɔd koso. 13Né gə́ rara ɓa gə́ naa sí lé naa gar síje togə́bè tɔ, ɓó al dɔ siŋga dee el. Ala lé to njemeenda londoŋ ndá yeḛ a kya̰ né gə́ naa sí karee al dɔ siŋga sí el nɛ yeḛ nja a kar sí siŋga sí ləm, yeḛ a ra rəw kar sí dumje ne dɔ né gə́ naa sí lé tɔ.
14Yee gə́ bèe ɓa, ma m’ula sí ne, seḭ gə́ ma m’unda sí dan kəm’g lé mba kar sí saaje rɔ sí rɔ magə-poleje’g. 15Ma m’oo sí gə́ njékəmkàrje ɓa ma m’wɔji ne sə sí taje neelé tɔ. Naaje ta gə́ ma m’pa lé ooje tɔ. 16 Ŋgo-kai-né gə́ Ala tɔr ne ndia dɔ sí’g gə jeḛ n’tɔr ne ndu sí dɔ’g lé see to né gə́ ɔm meḛ sí na̰’d sad gə məs Kristi lé el wa. Muru gə́ jeḛ j’wa n’gaji lé see to né gə́ ɔm sí na̰’d gə darɔ Kristi lé el wa. 17To gə́ muru lé to gə́ kára ba ya ndá jeḛ gə́ n’to dəwje bula kara n’toje ne darɔ gə́ kára ba to: mbata jeḛ lai jeḛ mbo̰ na̰ dɔ muru gə́ kára’g lé ya mba kiŋgaje gajee gə́ wɔji dɔ sí dɔ sí.
18Aa ooje, ta gə́ wɔji dɔ deḛ gə́ to Israɛlje gə goo darɔ dee lé: deḛ gə́ d’usɔ da nékulje gə́ d’inja gə́ məs lé see deḛ d’ɔm meḛ dee na̰’d sad gə loo-nékinjaməs lé el wa . 19See ma m’pa banwa. Da nékulje gə́ deḛ tɔl dee pole ne magəje əsé darɔ magəje lé see ma m’pana: To gə́ kankəmné wa. Wah! ma m’pa bèe el. 20Ma m’pana: Né gə́ njépole-magəje pole ne magəje lé deḛ d’inja gə́ məs d’ar ndilje gə́ yèr lé ɓó d’ar Ala el. Togə́bè ɓa, ma m’ndigi kar sí ɔmje meḛ sí na̰’d sad gə ndilje gə́ yèr lé el . 21Seḭ asjekəm kaije né gə́ mee ŋgo-kai-né’g lə Mbaidɔmbaije gə korè gə ka̰ ndilje gə́ yèr na̰’d el ləm, seḭ asjekəm sije ta ka nésɔ’g lə Mbaidɔmbaije gə korè gə ka̰ ndilje gə́ yèr lé el ləm tɔ. 22See j’a kɔs gel kəmkəḭ lə Mbaidɔmbaije wa. See siŋga sí ur dɔ kea̰’g wa .
23Néje lai lé d’ɔg loo ra el, nɛ néje gə́ na̰je lé to kəm ra el tɔ. Néje lai lé d’ɔg loo ra el, nɛ néje gə́ na̰je a kar sí undaje siŋga sí dɔ maree’g el tɔ . 24Maji kar dəw kára kara saŋg né gə́ wɔji dɔ maji ləa-yeḛ gə karee el nɛ maji kar nana kara saŋg né gə́ wɔji dɔ maji lə maree ya.
25Dakas daje lai gə́ ndogo loo-ndogo-da’g lé maji kar sí sɔje gə́ sɔ ɓó dəjije gelee gə meekaar el. 26Mbata naŋg neelé gə néje lai gə́ to keneŋ lé to gə́ ka̰ Mbaidɔmbaije ya .
27Ɓó lé dəw gə́ un mée el lé ɓar sí ɓar nésɔ ɓa ndigi kawje səa kəi ləa ndá néje lai gə́ d’un d’ar sí lé maji kar sí sɔje gə́ sɔ ŋga ɓó dəjije gelee gə meekaar el ŋga. 28Nɛ ɓó lé dəw ula sí pana: Né gə́ neelé d’inja gə́ məs pole ne né ndá maji kar sí sɔje el gə mbəa-yeḛ gə́ njekula sí taree ləm, gə mba meḛ sí gə́ to kərm ləm tɔ. 29Ma m’pata nee gə mba meḛ sí-seḭ el nɛ ma m’pa gə mba mee yeḛ gə́ raŋg.
See ban ɓa né gə́ ma m’oo gə́ né gə́ m’askəm ra lé m’a kar meekaar lə marm ɔgm dɔ’g wa. 30Ɓó lé m’usɔ né ɓa m’ra Ala oiyo dɔ’g ŋga see ndɔlee a kwa dɔm gə mba ri ɓəi wa.
31Bèe ndá lé né gə́ sɔje əsé né gə́ aije əsé né gə́ rara gə́ seḭ raje kara maji kula ne rɔnduba dɔ Ala’g lé. 32Maji kar sí ilaje Jibje əsé Grekje əsé Eglisə lə Ala kag el, 33raje to gə́ ma kara m’ula rɔm ndubu gə mba ra dɔ néje’g lai gə mba taa ne kəm dəwje lai ɓó m’saŋg né gə́ wɔji dɔ maji ləm-ma gə karm el. M’saŋg né gə́ wɔji dɔ maji lə koso-dəwje bura mba kar dee d’aji ne.
Currently Selected:
1 Njé gə́ Kɔrḭtə 10: SBA2015
Highlight
Share
Copy
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.