Gálatas 3
3
Eꞌñe yameꞌñeñotha Cristopaꞌ oꞌ yekeshperra, ama añ yetsoteñothe ñoñets ñeñth ateth anareth judioneshakop
1Sapaꞌ nanak, galacioꞌmarneshachaꞌ, sepanteñ. Poꞌñoxh sa oꞌkaꞌye xha shekaset atthoña theꞌ sapaꞌ oꞌwañ sameꞌñenaña ñeñth eꞌñe poꞌñoxh alloch yekeshperra. Amaꞌt awaña allempo yeserrpareꞌtatensaꞌpaꞌ yapaꞌ añ yeñotatwas attho poꞌñoxh Jesucristopaꞌ oꞌ akorsoꞌtamphsarethta eꞌñe yokop. Ñeñthña poꞌñoxh sameꞌñaña sa allempo. 2Ñeñthoꞌmarña theꞌpaꞌ nemneñ oꞌch neñotatas amaꞌt añ patherr ñoñets: Sapaꞌ eꞌñe seyemteñoth ñeñth Cristo poꞌñoñ atthoña chorrasaña Parets Poekamkëñ. Amaña añotheyeꞌ chorraso eꞌñe setsoteñoth añ ñoñets ñeñth ateth anareth judioneshakop. 3Esoꞌmareꞌtña sapaꞌ nanak sepanteñ. Attho sa awañapaꞌ añ seyemtena Parets Poekamkëñ ñeñth awamenkath aphañpaꞌ esoꞌmareꞌtña theꞌñapaꞌ oꞌch alla seyemterrerr eꞌñe sañeña setsotateñ. 4Eꞌñewachñakaꞌ orrena atarr semoeroxhetyesa. Poꞌñoxh ñatoꞌ ñeñthpaꞌ amatheꞌ eꞌñe orrenayaye ñerraꞌm oꞌch alla sokthapeꞌcherr kowen. 5Ñamha allempo Yomporpaꞌ chorratasa Poekamkëñpaꞌ ñapaꞌ añ orrtatonas partsoteñets eꞌñe sesho. Ñewa, ñeñthpaꞌ amakaꞌye añotheyeꞌ orrto eꞌñe sa setsoteñoth ñeñth ateth anareth judioneshakop, ñeñthpaꞌ añothkaꞌyeña orrta eꞌñe sameꞌñeñotha ñeñth ateth yeserrpareꞌtatwas.
Abrahampaꞌ eꞌñe poeyemteñoth Yomporpaꞌ oꞌ pokteꞌ eñch Yompor
6Ñewa, Abrahampaꞌ nanak yemtaneꞌth ñeñth ateth och Yompor, ñeñthoꞌmarña Yomporpaꞌ eꞌñe pokteꞌ eñcheꞌth. 7Ñeñthoꞌmarña yeñoteñ ñeñth nanak yemtenaya ñeñth ateth oten Yompor ñeñthña Yomporpaꞌ eꞌñe pokteꞌ enteñ ateth ñerraꞌm poechemereshanet Abraham. 8Yomporpaꞌ eꞌñe eñotweꞌth awathotheñ amaꞌt ñeñth ama judioneshayayepaꞌ oꞌch ameꞌñeret esempo, ñamha eꞌñe pameꞌñeñothetpaꞌ pokteꞌch enterranet. Ñeñthoꞌmarña amaꞌt awathotheñpaꞌ eꞌñe anwareth poꞌñoño. Yomporpaꞌ ateth otan Abraham: “Eꞌñe peshothpaꞌ oꞌch nebensareꞌtampes allowen paꞌnamen acheñ.” Ñeñthoꞌmarña yeñoteñ amaꞌt awathotheñ Yomporpaꞌ serrpareꞌtataneꞌth Abraham ñeñth kowen ñoñets alloch yekeshperra. 9Ñeñthoꞌmarña yeñoteñ theꞌpaꞌ allowen ñeñth ameꞌñenaya Cristopaꞌ eꞌñe atthekma kowenoꞌtsenakma ateth ñerraꞌm Abraham ñeñth nanak ameꞌñayeꞌth Yompor awath.
10Tharraña allowen ñeñth yemtenaya ñoñets ñeñth ateth anareth judioneshakop oꞌch eꞌñe etsotwet ñetñapaꞌ oꞌ anarethtet allowenetpaꞌ aꞌkoñchatarethtetchaꞌ tharroꞌmar ateth anwareth Yompor poꞌñoño amaꞌt awathotheñ, ñeñthpaꞌ ateth oten: “Allowen ñeñth ama etsotwenaye eꞌñe poktakma allowen allpon ñoñets ñeñth ateth anareth kellko, ñamha ñerraꞌm ama phoweto allowen ñeñth ateth anarethpaꞌ aꞌkoñchatarethtetepaꞌch.” 11Ñeñthoꞌmarña yeñoteñ amach pokteyeꞌ enterrye Yompor eꞌñe yemneññotha oꞌch yetsotwa añ ñoñets ñeñth ateth anareth, tharroꞌmar amach errothenoth yetsotwo ora allpon ñeñth ateth anareth. Ñeñthoꞌmarña amaꞌt poesheñarrotheyapaꞌ amach pokteyeꞌ enterrye Yompor. Ñeñthoꞌmar amaꞌt Yompor poꞌñoñopaꞌ ateth anwareth awathotheñ, ñeñthpaꞌ ateth oten: “Eꞌñe yeyemteñotha Yompor ñapaꞌ oꞌch pokteꞌ enterrey atthoch ello yokrrerra errponowañen.” 12Tharraña ñeñth ñoñets ñeñth ateth anareth judioneshakoppaꞌ ama attheyeꞌ oteno, ñeñthpaꞌ ateth oten: “Ñerraꞌm yephowenchaꞌ eꞌñe poktakma ñeñth ateth anarethpaꞌ eshekchaꞌ ello yokrrerra errponowañen.”
Cristopaꞌ eꞌñe pokteꞌ eñch atthoch ñach arrnomarethtatsa yokop
13Ñoñtsopaꞌ amaꞌt oꞌpatatenyañ koñcheñets tharraña Cristopaꞌ ñaña koñcherrtsa eꞌñe yokop atthochña yapaꞌ amach yekoñcherro. Ñeñthpaꞌ yeñoteñ tharroꞌmar amaꞌt awathotheñpaꞌ ateth anwareth Yompor poꞌñoño, ñeñthpaꞌ ateth oten: “Amaꞌt erraꞌtsena acheñer poepenkateñmeꞌchatset xho echañchet tsachopaꞌ ñeñthpaꞌ aꞌkoñchatarethchaꞌ entyes acheñeneshaꞌ.” 14Ñeñthoꞌmarña yeñoteñ eꞌñe pameꞌñeñothet Jesucristopaꞌ oꞌch eñalleta atthoch Yomporpaꞌ eꞌñech pokteꞌ entanet ñamet ñeñth amaꞌt ama judioneshayaye, atthekma peꞌth awathotheñ Yompor eꞌñe pokteꞌ entaneꞌth Abraham. Ñamha eꞌñe yameꞌñeñothpaꞌ atthoña eñall atthoch chorrerrya alloweney Parets Poekamkëñ, ateth Yomporpaꞌ otan awath Abraham.
Ñeñth ateth Yomporpaꞌ otan awath Abraham ñeñthchaꞌ ateth phoñ
15Ñewa, masheñneshachaꞌ ñamha noxhaneshachaꞌ theꞌpaꞌ oꞌch alla neñotaterrserr poꞌpoñ. Ñewa, ñatoꞌ oꞌch netmaꞌntacha ñeñth ateth yokrrena añ patsro. Ateth ñerraꞌm poesheñarr yakmapaꞌ oꞌch aꞌpoktachet epoet poꞌpsheñeñ, oꞌch kellkatet, allothpaꞌ oꞌch kellkaꞌwet paꞌsoꞌcheñ all, allochñapaꞌ amach errothenoth eseshaꞌ aꞌpoꞌpoñeterroye poꞌñoñ ñeñth ateth oꞌ kellkatwet, ñamha atthoch amach eseshaꞌ waporeꞌterroye poꞌñoñ. Ateth yepena yamha amaꞌt acheñaya ateth petsa ellowatheꞌñakaꞌ Yomporpaꞌ ama poeno poꞌñoñ. 16Yompor awathpaꞌ ateth otan Abraham ñeñthchaꞌ ateth phoñ eꞌñe poesheñarroth poꞌmhrenñoth. Tharraña ama allowenayeꞌ poꞌmhrenñekop ateth oche, eꞌñe poesheñarrokpa ateth och, ñeñthpaꞌ yeñoteñ ñeñthara ñeñth Cristotats. Ñeñthpaꞌ atthekma oten amaꞌt awathotheñ Yompor poꞌñoñ. 17Añmapaꞌ ñeñthña ateth neyxhatenes. Ñewa, yapaꞌ yeñotweñ attho Yomporpaꞌ aꞌpoktachet amaꞌt awathotheñ epoet Abraham. Allothñapaꞌ allempo oꞌ met cuatrocientos treinta charpaꞌ allempoñapaꞌ xhap allempoch anarethta añ ñoñets judioneshakop ñeñth ateth kellkanet Moisés. Tharraña amaꞌt oꞌ anarethta añ ñoñets ñeñth kellkanet Moiséspaꞌ tharraña ñeñthpaꞌ yeñoteñ amach errotheno waporeꞌtatereto ñeñth ateth oꞌ anarethetwa ñeñth ateth oꞌ aꞌpoktatwa Yompor epoet Abraham amaꞌt awathotheñ, tharroꞌmar Yomporpaꞌ ama poenesho poꞌñoñ. 18Ñamha ñerraꞌm eñalleñ atthoch yekeshperrañ eꞌñe yetsoteñotha añ ñoñets ñeñth ateth kellkaꞌ awath Moiséspaꞌ ñeñthepñapaꞌ amatheꞌ palltenañe atthoch Yomporpaꞌ otan awath Abraham oꞌch eñalleta eꞌñe ña poꞌmhrenñoth poesheñarr ñeñthchaꞌ yaꞌkeshphaterreꞌ eꞌñe yameꞌñeñotha ñeñth ateth oteney.
19Añ ñoñets ñeñth ateth net allempopaꞌ ñeñthpaꞌ ateth pha: Yomporpaꞌ awoꞌt moeñan poꞌmhllañotheñnaneshar atthoch ñetpaꞌ oꞌch eñoranaꞌchet Moisés atthoch ñach aꞌmhteꞌ añ ñoñets judioneshakop. Tharraña añ ñoñetspaꞌ eꞌñe tharrempowa sherbhaꞌ allempo wapa Cristo ateth Yompor otan awath Abraham. Eꞌñe poꞌñoxh yameꞌñeñoth aꞌkeshphaterreychaꞌ. Theꞌ ellonethpaꞌ oꞌch neñotatas ñeñthekop nanña elloneth Moisés poꞌñoñ. Ñewa, ñeñthpaꞌ añekpa anarettha atthoch yeñoch ñeñth allpon ochñaꞌteñets enten Yompor ñamha atthoch ñeñthchaꞌ yeñotateneꞌ ñerraꞌm esempo oꞌ yephowa ñeñth ama pokteyeꞌ enteno Yompor. 20Tharraña allempo Yomporpaꞌ eñoranaꞌtana Abraham ñeñthchaꞌ ateth phoñpaꞌ allempopaꞌ eꞌñe ña oteꞌ allameꞌtets. Allempo Yomporpaꞌ ama eseshaꞌ oto poꞌpsheñeñ ñeñthchaꞌ aꞌmhtawet añ ñoñets.
Añ ñoñets ñeñth ateth anareth awathotheñ judioneshakop añekopña sherben ñeñthchaꞌ yameꞌñaterraya Cristo
21Ñewa, ñatoꞌ sapaꞌ oꞌch soten, ñeñthepñapaꞌ añ ñoñets ñeñth ateth kellkanet Moiséspaꞌ taꞌ, xhotheꞌ epatenan Yompor poꞌñoñ ñeñth ateth otan awath Abraham. Ñeñthpaꞌ amakaꞌye attheyaye. Tharroꞌmar ñerraꞌm eñalleñ eꞌñech ñoñtsotha ñeñth ateth anareth oꞌch etserrataterrnayeñ kowen yeyoxher Yomporekoppaꞌ amatheꞌ palltenañeña poꞌpoñ atthoch pokteꞌ enterrey Yompor; ñeñthpaꞌ eꞌñetheꞌ ñoñtsotha ñeñth ateth anarethpaꞌ oꞌch pokteꞌ enterryeñ Yompor, tharraña ñeñthpaꞌ ama attheyaye. 22Tharroꞌmar Yompor poꞌñoñ ñeñth anwareth awathotheñpaꞌ oteney, alloweneypaꞌ eꞌñe yoꞌchñaꞌtwen, amach errothenoth eꞌñe yetsotwoñe ñeñth ateth anareth Yomporekop. Ñeñthoꞌmarña ñeñthpaꞌ ama añekpayaye alloch yekeshperra. Añña eꞌñe yameꞌñeñotha Jesucristopaꞌ oꞌch yekeshperra, ñeñthara Cristo ñeñth ateth Yomporpaꞌ otan awath Abraham.
23Awath allempo ama wenaꞌ Cristo ñeñthchaꞌ yameꞌñerrapaꞌ amach errothenoth yaꞌypoꞌñerro añ ñoñets ñeñth ateth anareth. Attha yepeꞌth tharrempowa allempo wapa Cristo atthoña eꞌñe yameꞌñeñotha ñapaꞌ oꞌwañchaꞌ alloꞌna amhchaꞌnoxhta ñoñets yokop. 24Ñewa, ñatoꞌ oꞌch netmaꞌntacha ateth. Añ ñoñets ñeñth ateth anareth judioneshakoppaꞌ ña yekwamphsayeꞌth awath. Ñeñthpaꞌ tharrempowa ateth pha allempo wapa Cristo, ñamha añ ñoñetspaꞌ añekpa sherbhaꞌ atthoch ameꞌñaterrya Cristo, allochñapaꞌ eꞌñe yameꞌñeñotha ñapaꞌ oꞌch pokteꞌ enterrey Yompor. 25Tharraña theꞌña oꞌ yameꞌñera Cristopaꞌ ama yepallteno ñeñthchaꞌ alloꞌna yekwamphseꞌ.
Eꞌñe yameꞌñeñothpaꞌ atethchaꞌ enterrey Yompor ñerraꞌmrratheꞌ eꞌñe poechemerey Abraham
26Tharroꞌmar theꞌpaꞌ eꞌñe yeparrokmateñoth Cristo Jesúspaꞌ oꞌch poechemer perrey alloweney Pompor, tharroꞌmar eꞌñe yameꞌñeñoth Poechemer. 27Ñamha allowenes ñeñthes oꞌ sapatarethterra eꞌñe sameꞌñeñoth Cristopaꞌ oꞌ chorrerrsa Cristo. 28Ñamha theꞌpaꞌ eꞌñe yeparrokmateñoth epay Cristo, Yomporpaꞌ ama poꞌpoñeꞌttsokmayeꞌ entenye, eꞌñe atthekma enteney alloweney, amaꞌt judioneshaꞌ, amapaꞌ ñeñth ama judioneshayaye, amapaꞌ ñeñth atarwasatareth eꞌñe attha, amapaꞌ ñeñth ama atarwasataretheye eꞌñe attha. Eꞌñe atthekma enteney alloweney amaꞌt asheñorrey, amaꞌt ñamha koyaneshaꞌ. Tharraña Yomporpaꞌ eꞌñe atthekma enteney. Tharroꞌmar eꞌñe yeparrokmateñoth epay Cristo Jesús eꞌñe poesheñaꞌttsoypaꞌ oꞌch eꞌñe yeparrokmatwa alloweney eꞌñe parro. 29Ñamha ñerraꞌm yapaꞌ Cristonaꞌtareypaꞌ añña Yomporpaꞌ eꞌñe ateth enteney ñerraꞌmrratheꞌ poꞌmhreneñ peney Abraham. Ñeñthoꞌmarña yapaꞌ oꞌch yagapapreter ñeñth ateth Yomporpaꞌ otan awath Abraham ñeñthchaꞌ ateth aꞌnacha.
Currently Selected:
Gálatas 3: ame
Highlight
Share
Copy
Want to have your highlights saved across all your devices? Sign up or sign in
© 2014, Wycliffe Bible Translators, Inc. All rights reserved.