Gálatas 4
4
Attho Cristopaꞌ aꞌwañamperran acheñeneshaꞌ attho amhchaꞌnoxhtaneteꞌth awath ñoñets ñeñth ateth anareth
1-2Ñeñth notenespaꞌ ñatoꞌ oꞌch netmaꞌntacha ateth. Ñerraꞌm poesheñarr yakma eñall poechemer, esempoña oꞌch poꞌnerr allempoch oꞌpaterrana ora allpon echen pompor. Ñewa, amaꞌt yeñoteñ ñapaꞌ oꞌch oꞌpaterrana ora allpon echen pomporpaꞌ tharraña allempo ama poꞌnenaꞌpaꞌ amach es oꞌpatenaꞌ amaꞌt koñeꞌtha. Ñamha allempo ama poꞌnenaꞌpaꞌ amach errothenoth es phaꞌyesoña eꞌñe ñotha, tharroꞌmar allempopaꞌ xhokma eñall poesheñarr ñeñth kowampeneꞌ, ñamha allempopaꞌ xhokmach es tsaꞌteññañet ñeñth cheshar. Allempoña ateth penapaꞌ xhach ottena ñerraꞌmrratheꞌ attha ñañreteñet, amaꞌt ora allpon echeneñ pomporpaꞌ ñokpañ. Tharraña esempoña xhap pompor ponañcho allempoch poꞌn poechemerpaꞌ allempoñapaꞌ oꞌch agapan ora allpon echen pompor. 3Ñeñthpaꞌ ateth yepeꞌth yamha awath. Allempopaꞌ ateth yepeꞌth ñerraꞌmrratheꞌ cheshaneshaꞌ. Ñamha allempopaꞌ aña yameꞌñatayeꞌth ñeñth pokthaphña phaꞌyeseꞌth awathnaneshaꞌ arr patsro. 4Tharraña allempoña oꞌ etsota allempo onañcheꞌ awath Yomporpaꞌ oꞌ moeñonay Poechemer arr patsro. Arrñapaꞌ eñalletach poesheñarr koyaneshaꞌ ñeñth judionaꞌtar. Añña ñoñets ñeñth ateth anareth judioneshakoppaꞌ nanak amhchaꞌnoxhteꞌth allempo amaꞌt ñokop. 5Tharraña Cristopaꞌ añekop eñalleta atthoch aꞌwañamperrey attho amhchaꞌnoxhtena añ ñoñets yokop. Ñeñthpaꞌ añekop ateth pha atthoch poechemer perrey Yompor.
6Theꞌña Yomporpaꞌ oꞌ poechemer perrey ñeñthoꞌmar oꞌ moeñerrnay Poekamkëñ ñeñthchaꞌ yexherrtsa yeyoxhro. Ñeñthña Poechemer Poekamkëñpaꞌ ñeñthchaꞌ yeñotateneꞌ ñerraꞌm esempo yexhoreꞌch amaꞌt Paretspaꞌ eꞌñe pokteꞌ oꞌch yoch, “Apa.” 7Ñeñthoꞌmarña theꞌpaꞌ yeñoteñ oꞌ poechemer perrey Yompor, ama poeñañrayaya penye. Ñeñthoꞌmar yeñoteñ ñerraꞌm poꞌñoxh oꞌ poechemer perrey Yompor, yapaꞌ yoꞌpatapreterach ora allpon oꞌpatatenya theꞌ Yompor.
Ñerraꞌm yapaꞌ oꞌch alla yeyemterrerr añ ñoñets ñeñth ateth anareth judioneshakoppaꞌ ñeñthpaꞌ eꞌñech orrena nanak yethorrerra
8Awath allempo ama señoterraꞌ ñeñth eꞌñe poꞌñoxh Yomporpaꞌ aña seyomporer sepeꞌth ñeñth poꞌñoxh ama Yomporeyaye. Sañapaꞌ ñeñtha nanak ameꞌñataseteꞌth. 9Tharraña theꞌpaꞌ oꞌ senterr ñeñth eꞌñe poꞌñoxh Yompor, amapaꞌ ñatoꞌ oꞌch yot, Yomporpaꞌ oꞌ enterres sa. Theꞌñapaꞌ esoꞌmareꞌtña semneñ oꞌch alla sepoerrerra, oꞌch alla sameꞌñerra añ kothaphñats ñeñth ama es sherbeno sañapaꞌ alloꞌch poꞌnoxh sekeshperra. Esoꞌmareꞌt semneñña oꞌch alla sethorrerrerr nanak ñeñth eꞌñe orrena. 10Ñamha sapaꞌ xhokma sonañchaꞌyen yeth ñeñthchaꞌ ateth setsotayen atthoꞌch sekeshperrañ —poemhaꞌtets arrorr, ñamha patheꞌtets char, amapaꞌ allempo xhokma koshena judioneshaꞌ. 11Ñeñthoꞌmarña nellkëñothpaꞌ ateth noten, ñeñth attho nethorrena awaña sokoppaꞌ ñatoꞌ amach es sherberro.
Arrpaꞌ all yerpatanet attho ñetpaꞌ eꞌñe kowen agapet allempo ñanom asenaꞌ Galacio
12Theꞌpaꞌ oꞌch masheñneshachaꞌ ñamha noxhaneshachaꞌ notas, atarr nemneñ oꞌch sokthapeꞌcherr ateth nokthapeꞌchen na. Tharroꞌmar napaꞌ oꞌ naꞌypoꞌñerrñañ judioneshaꞌ pokthaphña. Theꞌpaꞌ oꞌ nokthapeꞌcherr ñeñth ateth sepeꞌth awath sa, allempo ama sokthapeꞌcherrñañaꞌ judioneshaꞌ pokthaphña. Awañmoꞌcha allempo alloꞌtsenen seshopaꞌ eꞌñe kowen semoeraꞌneꞌth. 13Sapaꞌ señotwenen attho napaꞌ allempo ñanom nexhap seshopaꞌ napaꞌ xha natsnaꞌtos ñeñthoꞌmar allempopaꞌ eñall atthoch neserrpareꞌtatas añ ñoñets alloch yekeshperra. 14Ñamha amaꞌt añ atsnañtsorpaꞌ nanak sosey nenteñpaꞌ tharraña sapaꞌ ama setsenaꞌtno, ñamha ama saꞌypoꞌñaꞌno. Elloña sapaꞌ oꞌ sagapoen eꞌñe kowen ateththeꞌña ñerraꞌm Yompor poꞌmhllañotheñer wetsa sesho, ñamha eꞌñe ateth sagapoen ñerraꞌmrratheꞌ naña Jesucristotets. 15Ñewa, theꞌpaꞌ esoꞌmareꞌtña oꞌwañ tama sokshaꞌna. Awañmoꞌchapaꞌ nanak semoeraꞌneꞌth, ñamha allempopaꞌ amaꞌt esa nepalltapaꞌ sañapaꞌ oꞌchxhoꞌ sapoen, ñamha amaꞌt añchaꞌ nepalltañeꞌth neklleꞌpaꞌ napaꞌ neñotenes ñerraꞌm errothenoth serrothañ seklleꞌpaꞌ amaꞌt ñeñthpaꞌ ñeñththeꞌ sapnoñeꞌth. 16Ñatoꞌ sapaꞌ xhatheꞌ sotenapañ xhotheꞌ oꞌ neꞌmoñeꞌtas, tharroꞌmar napaꞌ oꞌ neserrpareꞌtatas ñeñth eꞌñe poꞌñoxh ateth noten.
17Poꞌpotantañ ñeñth seyxhateneꞌ judioneshaꞌ pokthaphñapaꞌ amaꞌt nanak maꞌyoxhrenetañ sokoppaꞌ tharraña ñeñthpaꞌ ama añekpayaye atthoch yenpaset eꞌñe poꞌñoxh. Ñetpaꞌ añekpa mopaꞌtenset atthoch oꞌch sokshapretanet nanak eꞌñe ñañeñeta. 18Ñewa, napaꞌ eꞌñe pokteꞌ nenteñ oꞌch yemneñ acheñeneshaꞌ oꞌch koshapretenyet ñerraꞌm poꞌñoxh añekop yemaꞌyoxhrena atthoch yeyenpanet eꞌñe poꞌñoxh. Ateth napaꞌxhoꞌña nemneñ xhokmach sokshapretna amaꞌt allempo ama alloꞌtsenye parro. 19Eꞌñe nemorrenteñothes ateth nentenes ñerraꞌmrratheꞌ nechemereshas, ñamha theꞌpaꞌ alla nemoeroxhterrerr sokop. Ateth nanen atserr ateththeꞌña koyaneshaꞌ atsotenaya poeꞌmar. Tharraña napaꞌ xhokmach nemoeroxhta esempowach eꞌñe chorrasa Cristo, atthoch ñach sokthapeꞌchaterreꞌ eꞌñe poktakma kowen. 20Eswakaꞌ alla neneꞌ thayekma sesho atthotheꞌ neserrpareꞌtatas eꞌñe kowen, allochñapaꞌ amatheꞌ xha moeneꞌ necheꞌptareꞌtaso. Tharraña ñeñthpaꞌ amach errothenoth, poꞌñoxhpaꞌ xhokma sellkatenen.
Theꞌpaꞌ eꞌñe yameꞌñeñoth Cristopaꞌ oꞌwañchaꞌ yeyemta añ ñoñets ñeñth ateth anareth; ñeñthpaꞌ añ tomaꞌntena Agar ñamha Sara
21Ñewa, theꞌpaꞌ oꞌch seꞌmhñoten sa ñeñthes moenets oꞌch alla seyemterra añ ñoñets ñeñth ateth anareth awathotheñ. Sapaꞌ amaꞌt señoteñe ñeñth ateth oten añ ñoñets ñeñth ateth anareth. 22Ñewa, theꞌpaꞌ oꞌch neñotatas ñeñth ateth oten ñoñets ñeñth ateth anwareth Yompor poꞌñoño awathotheñ. Ñeñthpaꞌ ateth oten: Abrahampaꞌ eñall epsheña poechemer. Poesheñarrpaꞌ arroth chemereꞌt poeñañreshoth ñeñth paꞌtarwasañer peꞌth. Ñeñth koyaneshaꞌpaꞌ añ sochena Agar. Poꞌpsheñeññapaꞌ eꞌñe poethaporeshoth chemereꞌt ñeñth ama paꞌtarwasañreyaye. 23Ñeñth poechemer ñeñth eñalletatsa poeñañreshothpaꞌ ateth eñalleta ñeñth eꞌñe atthekma yeyexhkëna alloweney acheñey. Tharraña poꞌpoñ poechemer ñeñth eñalletatsa poethaporeshoth ñeñth ama paꞌtarwasañreyaye ñeñthpaꞌ añekop eñalleta atthoch etsota Yompor poꞌñoñ ñeñth ateth otan awathotheñ Abraham. 24Ñeñth ateth phapaꞌ ñeñthpaꞌ añ yexhateney tharroꞌmar añ epsheñoꞌmar koyaneshaꞌpaꞌ añ tomaꞌntena attho Yomporpaꞌ epsheñoth aꞌpoktatonay. Ñeñth Agarpaꞌ añ tomaꞌntena attho Yomporpaꞌ eñoranaꞌtanet awath Sinaíphno. Allempotheñ anarethta añ ñoñets ñeñthchaꞌ ateth etsotetañ. Ñeñthña ñoñetspaꞌ añ tomaꞌntena Agar, tharroꞌmar ña poechoyoreshaꞌpaꞌ aña amhchaꞌnoxhtanaꞌtenawet añ ñoñets ñeñth ateth anareth. 25Agarpaꞌ poꞌñoxh shallchenana aspeneth Sinaípen ñeñth Arabioꞌtsen. Ñamha ñeñthara Agarpaꞌ tomaꞌntenana judioneshaꞌ ñeñth paꞌnetser peneꞌ Jerusaléñ. Tharroꞌmar allowen judionaꞌtarpaꞌ themeꞌttsen aña amhchaꞌnoxhtanaꞌtenawet añ ñoñets ñeñth ateth anareth awathotheñ. 26Tharraña ñeñthey ameꞌñenaya Cristopaꞌ añ ñoñets ñeñth ateth anareth awathotheñpaꞌ ama amhchaꞌnoxhteno yokop. Eꞌñe yameꞌñeñotha alloweney Cristopaꞌ eꞌñe kowenoꞌtseney. Ñamha ñeñthpaꞌ eꞌñe kowen yenteñ ateth ñerraꞌmrratheꞌ yachor. Ñamha ñeñthpaꞌ atethchaꞌ netmaꞌntatererr ateth: Eꞌñe yeparrokmateñoth alloweney epay Cristopaꞌ eꞌñe atthey ñerraꞌm Yompor paꞌnetser etserra Jerusaléñ, ñamha ñeñthpaꞌ eꞌñe ateth yenteñ ñerraꞌmrratheꞌ yachor. 27Ñeñthoꞌmarña ateth anwareth Yompor poꞌñoñ awathotheñ, ñeñthpaꞌ ateth oten tomaꞌnteñtso:
Koshepaꞌ koyaneshaꞌ moexhoph ñeñth ama achyoreꞌtño, ñamha poksheñeshothpaꞌ rranareꞌtepaꞌ ñeñth amaꞌt awathapaꞌ ama patsotarano poeꞌmar, tharroꞌmar amaꞌt añ koyaneshaꞌ ñeñth akexhpareth mameꞌ (ñeñthara Sarapaꞌ) shonteꞌch acheñeneshaꞌ pachor perreꞌ. Elloch metanerran allpon poechoyor echen ñeñth agapoeꞌ poerrollar (ñeñthara Agar).
Ñeñth ñoñetspaꞌ añ tomaꞌntena attho theꞌpaꞌ yameꞌñeñoth Cristo ñeñthña nanak sherbets atthoch atonterra acheñ ñeñthchaꞌ poeyochreshaꞌ perr Yompor. Tharraña ñoñets ñeñth ateth anareth awathotheñpaꞌ ñeñthpaꞌ ama tama sherbeno atthoch atonterra ñeñthchaꞌ poeyochreshaꞌ perr Yompor.
28Ñewa, oꞌch notas masheñneshachaꞌ ñamha noxhaneshachaꞌ, alloweney ñeñthey ameꞌñenaya Cristo, yapaꞌ atthey ñerraꞌm Abraham poechemer ñeñth Isaac ñeñth eñalletatsa atthoch etsota Yompor poꞌñoñ ñeñth ateth otoñ pompor Abraham. Tharroꞌmar yapaꞌxhoꞌña atthoña yeꞌñalleterra ello atthoch etsota Yompor poꞌñoñ ñeñth ateth oteꞌth amaꞌt awathotheñ. 29Tharraña ñeñth eñalletatsa awath ñeñth eꞌñe atthekma yeyexhkëna alloweney acheñey (ñeñth sochet Ismael) ñapaꞌ xhokma eꞌmoñeꞌtaneꞌth ñeñth eñalletatsa attho etsota Yompor poꞌñoñ. Atthekmach perra ñamha theꞌ. Ñeñthchaꞌ eñalleterrtsa ñeñth eꞌñe atthekma yeyexhkëna alloweney acheñey ñeñthara ñeñth moeneneꞌ oꞌch etsotan judioneshaꞌ pokthaphña ñetpaꞌ xhokmach eꞌmoñeꞌtenyet ñeñthey eñalleterrtsa Yompor Poekamkëñoth. 30Ñewa, amaꞌt señoteñeña ñeñth ateth oteney Yompor poꞌñoñ ñeñth anwareth awathotheñ. Poꞌñoxh oteney attho Yomporpaꞌ otan awath Abraham ñeñthpaꞌ ateth och: “Oꞌch pewaporeꞌch peñañra epoet poechoyor, tharroꞌmar ña poechoyorpaꞌ amach es oꞌpatapretapho, amach attheyeꞌ pho poechoyor ñeñth eñalletatsa pethaporeshoth ñeñth ama phaꞌtarwasañreyaye.” 31Ñeñthoꞌmarña theꞌ masheñneshachaꞌ ñamha noxhaneshachaꞌ oꞌch alla noterrserr: Ama pallteno oꞌch yameꞌña judioneshaꞌ pokthaphña. Ñatoꞌ oꞌch netmaꞌntacha ateth: Ama poechoyoreyayye Abraham poeñañra ñeñth paꞌtarwasañer eꞌñe attha. Añña poechoyorey Abraham poethapor ñeñth ama paꞌtarwasañreyaye. Ñeñthara ñeñth yoten eꞌñe yameꞌñeñotha Cristopaꞌ eꞌñech kowenoꞌtseney.
Currently Selected:
Gálatas 4: ame
Highlight
Share
Copy
Want to have your highlights saved across all your devices? Sign up or sign in
© 2014, Wycliffe Bible Translators, Inc. All rights reserved.