Gálatas 2
2
Attho poꞌpsheññexhno allsensarethneshaꞌ eꞌñe pokteꞌ eñchet Pablo
1Allempoña oꞌ meterrerr xharraꞌ char poechena paꞌtatspaꞌ oꞌ alla awerrnerr Jerusaléño epan ñamha masheñ Bernabé. Ñamha oꞌ nanemh masheñ Tito. 2Napaꞌ awerrnerr alla tharroꞌmar ateth oten Yompor. Allempoña nexhap Jerusaléñopaꞌ neserrpareꞌtatosanet ora allowen ñeñth ateth oꞌ neserrpareꞌtatwe ñeñth ama judioneshayaye. Neñotach ñamha jerusaléñoꞌmarneshaꞌ ñeñth ateth neserrpareꞌtatyeñ acheñeneshaꞌ eꞌñe yameꞌñeñotha Cristopaꞌ oꞌch yekeshperra. Ñewa, ñanompaꞌ neserrpareꞌtach ñeñth amhchaꞌtarethetyetsa Jerusaléño eꞌñe ñaptheto. Napaꞌ tharroꞌmar notanet ateth allochñapaꞌ atthoch neñoch ñatoꞌ pokteꞌch entapretnet ñeñth ateth nepena, allochñapaꞌ attho neserrpareꞌtatyenpaꞌ amatheꞌ eꞌñe orrena neserrpareꞌtyeno. 3Allempoña neserrpareꞌtatwanet atethpaꞌ eꞌñe pokteꞌ eñchet ñeñth ateth neserrpareꞌtyen. Ñeñthoꞌmarña amaꞌt alloꞌtsen masheñ Tito ñeñth ama judioneshayayepaꞌ amaꞌt eꞌñe poesheñarrothetapaꞌ amaña eseshayeꞌ notaye netsorrachepaꞌtoꞌ masheñ Tito tharroꞌmar ñapaꞌ ama judioneshayaye.#2.3 Añ ñoñets “atsorrareth”, añ ñeñth otets ateth yexheꞌth judioneshaꞌ. Ñeñthpaꞌ ateth: Ñerraꞌm allempo eñalletena asheñorrotholleshaꞌ ñeñth eꞌñe judioneshaꞌpaꞌ añña pomporpaꞌ oꞌch tsorrateñet poꞌchtso. Ñewa, ñeñth tsorratenetpaꞌ emathollach oꞌch xhapaꞌmoen poꞌpsokmatño. Ñewa, poꞌchtso allchaꞌ tsorret asheñorrothollpaꞌ all eꞌñech potherethollo eꞌñe poñoth paꞌrrmathollo. 4Tharraña amaꞌt allempopaꞌ ama eñallñeña ñeñth thorrapoꞌ yentyenpaꞌ añña poesheñaꞌtetspaꞌ oꞌ wapyesa yesho. Ñamha ñetpaꞌ amaꞌt otenetañ awoꞌ ameꞌñerret ateth ñerraꞌm ya tharraña eꞌñe aꞌnawapaꞌ moeneñetañ awoꞌch nonayet ñoñets ñeñth nanak thorrapoꞌ yenten. Ñetpaꞌ añekpa wapoet aꞌnawa oꞌch eꞌmonayet attho yapaꞌ yoten eꞌñe yameꞌñeñotha Cristo Jesúspaꞌ oꞌch yekeshperra. Tharraña ñetpaꞌ aña moeneñetañ oꞌch alla nerrnayet judioneshaꞌ pokthaphña ñeñth nanak thorrapoꞌ yenten. 5Tharraña yapaꞌ ama yemnataneto amaꞌt eꞌñe mamesha, tharroꞌmar yapaꞌ ama yemno oꞌch alla yaꞌpoꞌpoñetamperres ñeñth kowen ñoñets ñeñth eꞌñe poꞌñoxh alloch yekeshperra.
6Allempoña neñotach amhchaꞌtarethneshaꞌ ñeñth Jerusaléñoꞌtsaꞌyen ñeñth ateth oꞌ nephowapaꞌ tharraña amaña erroth otneto ñeñthoꞌ nepalltena ñeñthchaꞌ ateth nepha. Ñewa, poꞌñoxh napaꞌ ama nepallteno oꞌch eꞌmhñotaten amhchaꞌtareth tharroꞌmar ama ñaptha amhchaꞌtareth pokteꞌ entenoña Yompor. Ñeñthoꞌmarña ñeñth paꞌmhchaꞌtarethneshar penet ñeñth ameꞌñetsa amaña erroth otneto ñeñthoꞌ nepalltenmeñ ñeñthchaꞌ ateth nepha. 7Añña ñetpaꞌ eꞌñe pokteꞌ entnet, tharroꞌmar oꞌ eñochet napaꞌ poꞌñoxh allsensarethen oꞌch neserrpareꞌtach acheñeneshaꞌ kowen ñoñets, amaꞌt ñeñth ama judioneshayaye. Atthekma ñamha masheñ Pedro allsensareth oꞌch serrpareꞌtan kowen ñoñets judioneshakop, napaꞌxhoꞌña atthekma allsensarethen oꞌch neserrpareꞌt kowen ñoñets añekop ñeñth ama judioneshayaye. 8Tharroꞌmar ñeñthara Yompor ñeñth llesenseꞌ Pedro oꞌch serrpareꞌtatan judioneshaꞌ, napaꞌxhoꞌña ñeñthara Yompor ñeñth nellsenseꞌ namha oꞌch neserrpareꞌtach ñeñth ama judioneshayaye.
9Ñeñthoꞌmarña ñeñth amhchaꞌtarethetyetsa ateth ñerraꞌm masheñ Jacobo ñamha masheñ Pedro ñamha masheñ Juanpaꞌ ñetpaꞌ eꞌñe eñochet poꞌñoxh napaꞌ Yompor oꞌ yenpoerren. Ñeñthoꞌmar ñetpaꞌ eꞌñe kowen agapyet epan masheñ Bernabé. Pagapoeñothetaypaꞌ orratyet pot poꞌkowenroth atthoch yeñotannaꞌta eꞌñe atthekma yokthapeꞌchen Yomporekop. Allempoña ñetpaꞌ eꞌñe pokteꞌ entyet yeserrpareꞌtachepaꞌtoꞌ ñeñth ama judioneshayaye, ateth ñerraꞌm ñetpaꞌ oꞌch serrpareꞌtachet ñeñth judioneshaꞌ. 10Ñetpaꞌ aña patherr otyet, es yapaꞌyesepaꞌtoꞌ wokchañneshaxhno; ñeñthña amaꞌt napaꞌ eꞌñe pokteꞌ neñch namha.
Allempo Pablopaꞌ moeneꞌ cheꞌptareꞌtan Pedro
11Tharraña allempo xhap ñamha masheñ Pedro Antioquíopaꞌ napaꞌ xha moeneꞌ necheꞌptareꞌch allempo yeserrpareꞌten parro, tharroꞌmar allempo ñapaꞌ añ pha ñeñth ama pokteyaye. Ñeñthpaꞌ ateth pha, 12allempo eꞌñe errteꞌ xhets masheñ Pedro Antioquíopaꞌ ñapaꞌ allentha rrallmeꞌchapretosan ñeñth ama judioneshayaye. Tharraña allempoña xhaxhaꞌt ñamha poesheñaꞌtets ñeñth wetsa masheñ Jacoboeshothpaꞌ allempoña masheñ Pedropaꞌ oꞌwañ rrallmeꞌchapretan ñeñth ama judioneshayaye, tharroꞌmar ñapaꞌ añ mechaꞌten ñeñth kotheneꞌ judioneshaꞌ pokthaphña. Ñeñthoꞌmarña eꞌñe allempopaꞌ oꞌwañ rrallmeꞌchapretanet, ñamha oꞌwañ yemtanet. 13Añpaꞌxhoꞌña judioneshaꞌ ñeñth ameꞌñetsapaꞌ ñetpaꞌxhoꞌña oꞌ ateth phaꞌyeset ñamet ñeñth ateth pena masheñ Pedro. Ñeñthoꞌmarña allempopaꞌ amaꞌt masheñ Bernabépaꞌ oꞌ phachet ñamha ñeñth ateth penet ñet. Poꞌñoxhpaꞌ amaꞌt eñoteñetañ ama ateth aphapawo. 14Tharraña allempo nentanet ama eꞌñe paxharroyeꞌ peneto ñeñth kowen ñoñets ñeñth poꞌñoxh Yompor poꞌñoñ allempoña napaꞌ ateth noch masheñ Pedro eꞌñe alloꞌtsaꞌyen allowen acheñeneshaꞌ, ñeñthpaꞌ ateth noch: “Phapaꞌ amaꞌt judioneshapeñpaꞌ tharraña oꞌ pephowa ñeñth ateth pena ñeñth ama judioneshayaye, theꞌñapaꞌ esoꞌmareꞌtña phañapaꞌ pemneñ oꞌch penoñña ñeñth ama judioneshayaye añ ñoñets ñeñth ateth anareth judioneshakop ñeñth amaꞌt phapaꞌ ama attheyeꞌ pepeno ateth anareth añ ñoñets.”
Amaꞌt judioneshaꞌpaꞌ eꞌñech atthekma aꞌkeshphatarethterret ñerraꞌm ameꞌñeretchaꞌ Jesús
15Yapaꞌ eꞌñe judionaꞌtareshoth eꞌñalletñay. Tharraña yapaꞌ ama attheyayye ñerraꞌm ñeñth ama judioneshayaye ñeñth nanak ochñath. 16Tharroꞌmar ya amaꞌt judioneshaypaꞌ yeñoteñ eꞌñe yameꞌñeñotha Jesucristopaꞌ oꞌch pokteꞌ enterrey Yompor, ñeñthpaꞌ ama añotheyaye oꞌch eꞌñe yephowa ñeñth ateth anareth judioneshakop. Añña eꞌñe yameꞌñeñotha Jesucristopaꞌ oꞌch pokteꞌ enterrey Yompor, ñeñthoꞌmarña oꞌ yameꞌñera Cristo, tharroꞌmar yeñoteñ eꞌñe yetsoteñotha ñeñth ateth anareth judioneshakoppaꞌ amach pokteꞌ enterrye Yompor amaꞌt poesheñarrotheya.
17Ñamha theꞌ yapaꞌ eꞌñe yameꞌñeñoth Cristopaꞌ yeñoteñ eꞌñech pokteꞌ enterrey Yompor. Tharraña amaꞌt atarr yeyemteñapaꞌ xhokmach yentena yapaꞌ ochñathey. Ñeñthoꞌmarña sapaꞌ xhatheꞌ sotenapañ Cristopaꞌ ñeñththeꞌña ochñaꞌtatañtetsa. Tharraña ñeñthpaꞌ amakaꞌye attheyaye. 18Tharraña ñerraꞌm oꞌch alla yokthapeꞌcherrerr ora allowen ñoñets ñeñth ateth anareth judioneshakop ñeñth oꞌ yepoeswanom awañapaꞌ elloña allempopaꞌ oꞌch alla yenterra yapaꞌ nanak ochñathey. 19Tharroꞌmar ñeñth ñoñets ñeñth ateth anareth judioneshakop awathpaꞌ theꞌ napaꞌ neñoteñ ñeñthpaꞌ ama añekpayaye atthoch oꞌch yaꞌkeshphaterra yañeña. Ñeñthoꞌmarña ya ñeñthey oꞌ yameꞌñera Cristo yapaꞌ oꞌ yaꞌypoꞌñamper atthochña theꞌpaꞌ oꞌch yokrrerra kowen Yomporekop eꞌñe yeyoxhrowen. 20Ñeñthoꞌmarña yapaꞌ oꞌ yekexhpaꞌwerr ateth moenatseꞌtatyesyeꞌth yechets. Ñeñthoꞌmarña oꞌ eꞌñe ateth yeperra ñerraꞌmrratheꞌ oꞌ korsoꞌtamperryet epay Cristo. Theꞌpaꞌ amaꞌt ora yokrrenañpaꞌ tharraña ama yayeꞌ korretso, añña Cristo ñeñth yechorrenayapaꞌ ñeñthña korretsa theꞌ yechtso. Theꞌpaꞌ eꞌñe yeyemteñoth Yompor Poechemerpaꞌ yokrrena eꞌñe kowen arr patsro, tharroꞌmar ña yemorrenterraya, ñamha ña rromats yokop. 21Ñeñthoꞌmar theꞌpaꞌ ama yemno oꞌch yewaporeꞌterrñañ Yompor poemoereña attho apoey Poechemer alloch yekeshperra. Tharroꞌmar ñerraꞌm eñalleñ atthoch yekeshperrañ eꞌñe yetsoteñotha ñoñets ñeñth ateth anarethpaꞌ ñeñthepñapaꞌ attho rroma Cristopaꞌ amatheꞌ es sherbeno.
Currently Selected:
Gálatas 2: ame
Highlight
Share
Copy
Want to have your highlights saved across all your devices? Sign up or sign in
© 2014, Wycliffe Bible Translators, Inc. All rights reserved.