2 TUI 6
6
Sa nawa na kaukamea, 1-7. Sa tukuna ko Ilaisa na ka e nakita na tui Siria, 8-13. Sa tala nai valu levu na tui Siria ki Tocani, a ra sa vakamatabokotaki, ka ra tuberi ki Samaria, 14-23. Sa kabai tale ko Samaria, ka levu kina na dausiga, 24-33.
1A sa kaya vei Ilaisa ko ira na luvedra na parofita, Raica mada, eda sa tiko osooso ga e na nodai tikotiko oqo: 2tou lako mada ki na Joritani, ka me da dui kauta maikina e dua na kau, ia me da vakacokotaka maikea e dua na nodai tikotiko, me da tiko kina. A sa kaya ko koya, Dou lako yani. 3Sa kaya e dua, Mo yalovinaka mada, mo ni lako vata kei keitou na nomuni tamata. Sa kaya ko koya, Au na lako ga. 4A sa lako vata kei ira ko koya. Ia ni ra sa yaco ki na Joritani, era sa ta kau. 5Ia ni sa taya tiko e dua na kau e dua vei ira, sa lutu ki wai na matau; a sa tagi ko koya, ka kaya, Isa, noqu turaga! ni sa kerei ga na matau. 6Sa kaya na tamata ni Kalou, Sa lutu evei? A sa vakatakila vua ko koya na tikina ka lutu kina. A sa taya ko koya e dua na taba ni kau, ka biuta ki kea; ka sa nawa na kaukamea. 7A sa kaya ko koya, Mo taura cake mada. A sa dodoka yani na ligana, ka taura.
8A sa vala kei ira na Isireli ko tui Siria, ka bose vata kei ira na nona tamata, ka kaya, E na tikina vaka ena tiko kina na noqu i tikotiko ni valu. 9A sa talaki vei tui Isireli ko koya na tamata ni Kalou, ka kaya, Mo qarauni iko, mo kakua ni lako voli e na tikina vaka: ni ra sa lako sobu kina na kai Siria. 10A sa talaki ko tui Isireli ki na tikina ka tukuna ka vakasalataka vua na tamata ni Kalou, ka vakabulai koya maikea, e segai walega ni vakadua se vakarua.
11A sa rarawa sara na yalo i tui Siria e na vuku ni ka oqo; a sa kacivi ira na nona tamata, ka kaya vei ira, Dou na sega beka ni vakatakila vei au, se ko cei vei keda sa totaki koya na tui Isireli? 12A sa kaya e dua vei ira na nona tamata, Sa segai, noqu turaga na tui; ia ko Ilaisa, na parofita ka tiko vei ira na Isireli, sa dautukuna vua na tui Isireli na vosa ko sa cavuta lo e na nomu loqi ni moce. 13A sa kaya ko koya, Dou la'ki raica, se sa evei ko koya, me'u talaki ka kauti koya mai. A sa tukuni vua, Sa tiko mai Tocani ko koya.
14A sa tala ki kea eso na ose, ka so na qiqi-ni-valu, kei nai valu levu: a ra sa lako e na bogi, ka buku na druadrua ni koro. 15A sa sou e na mataka na nona dauveiqaravi na tamata ni Kalou, ka curu yani, ka raica, sa buku na druadrua ni koro e nai valu, kei na ose, kei na qiqi-ni-valu. A sa kaya vua na nona cauravou, Isa noqu turaga! a cava me daru cakava? 16A sa kaya ko koya, Kakua ni rere: ni ra sa lewe vuqa era sa tiko kei kedaru, ka lewe lailai era sa tiko kei ira. 17A sa masu ko Ilaisa, ka kaya, Kemuni Jiova, mo ni vakayadrata mada na matana, me rai rawa ko koya. A sa vakayadrata na matana na cauravou ko Jiova; a sa rai ko koya: ka raica, sa oso na ulu-ni-vanua e na ose, kei na qiqi bukawaqa, era tiko vakavolivoliti Ilaisa. 18Ia ni ra sa lako sobu vua, sa vakamamasu vei Jiova ko Ilaisa, ka kaya, Mo ni yaviti ira mada na tamata oqo, me ra mataboko. A sa yaviti ira ko koya me ra mataboko, me vaka na vosa i Ilaisa. 19A sa kaya vei ira ko Ilaisa, Sa sala tani oqo; a sa koro tani oqo: dou muri au, ka'u na kauti kemudou vua na tamata dou sa vakasaqara tiko. A sa kauti ira ki Samaria. 20Ia ni ra sa yaco ki Samaria, sa kaya ko Ilaisa, Kemuni Jiova, mo ni vakayadrata na matadra na tamata oqo, me ra rai rawa. A sa vakayadrata na matadra ko Jiova, a ra sa rai rawa; ka raica, era sa tiko e loma i Samaria.
21Ia ni sa raici ira ko tui Isireli, sa kaya vei Ilaisa, Na tamaqu, me'u yaviti ira, me'u yavita ira, ne? 22A sa kaya ko koya, Mo kakua ni yaviti ira: ko na yaviti ira li ko sa vakabobulataka e na nomu i seleiwau kei na nomu dakai? mo tauca e matadra na kakana kei na wai, me ra kana ka gunu, ka lako yani vua na nodra turaga. 23A sa cakava vei ira ko koya e dua na magiti levu: a ra sa kana ka gunu, a sa talai ira yani ko koya, a ra sa lako vua na nodra turaga. A sa sega ni lako tale mai ki na nodra vanua na Isireli na nodra veimataivalu na kai Siria.
24Sa oti na ka oqo, sa vakasoqona vata na nonai valu taucoko ko Peni-etati na tui Siria, ka lako cake, ka buku na druadrua ki Samaria. 25A sa ka levu na dausiga mai Samaria: ka raica, sa buku tiko na druadrua, ka sa volitaki kina e dua na ulu ni asa e na siliva e walusagavulu, kei na de ni ruve sa tolu na paidi e na siliva e lima.
26Ia ni sa lako voli e na dela ni bai ko tui Isireli, sa tagi vua e dua na yalewa, ka kaya, Mo ni veivuke, noqu turaga na tui. 27A sa kaya ko koya, Kevaka e sega ni vukei iko ko Jiova, au na vukei iko rawa maivei? mai na rara ni sila, se nai keli-waini? 28A sa kaya vua ko koya na tui, O sa vakaevei? A sa kaya ko koya, Sa kaya vei au na yalewa oqo, Mo solia na luvemu me daru kania edaidai, edaru na qai kania na luvequ e na mataka; 29ia keirau a vakasaqa na luvequ, ka kania: ka'u a qai kaya vua e na mataka, Mo solia na luvemu, me daru kania: a sa vunia na luvena ko koya. 30Ia ni sa rogoca ko koya na tui na nona vosa na yalewa, sa dresulaka na nonai sulu; (a sa lako voli ko koya e dela ni bai;) a sa rai yani ko ira na tamata, ka raica, sa vakaisulu e loma ko koya e nai sulu taga. 31A sa kaya ko koya, Me cakacaka vakakina vei au na Kalou, ka vakaikuritaka talega, ke sa toka vei Ilaisa na luve i Safati na uluna edaidai.
32A sa tiko e nona vale ko Ilaisa, a ra sa tiko kaya ko ira na qase; a sa tala yani e dua na tamata na tui: ni sa bera ni yaco vei koya nai talaki, sa kaya ko koya vei ira na qase, Dou sa raica, se segai, ni sa talatala na luve ni dauveivakamatei ko ya me tamusuka na uluqu? dou raica, ni sa lako mai na tamata, dou sogota na katuba, ka biligi koya matua mai na katuba: sa sega li ni muri koya mai na vadugu ni yavana na nona turaga? 33Ni ra sa veivosaki tiko ko ira, raica, sa lako sobu mai nai talaki vei koya, a sa kaya vua, Raica, sa maivei Jiova na ca oqo; me'u waraki Jiova tiko e na vuku ni cava?
Currently Selected:
2 TUI 6: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific