2 TUI 5
5
Sa lako ko Neamani kivei Ilaisa, me vakabulai mai na nona vukavuka, 1-19. Sa la'ki lasu ko Kiesai kivei Neamani, ka qai tauvi koya na vukavuka, 20-27.
1Ia ko Neamani, na kapiteni ni nonai valu na tui Siria, sa tamata vakaturaga e mata ni nona turaga, ka sa dokai ni sai koya ka vakabulai Siria kina ko Jiova: a sa tamata qaqa e nai valu, ia sa tauvi vukavuka. 2Ia era a lako yani vakamataivalu eliu na kai Siria, ka kauta vakabobula yani e dua na goneyalewa lailai mai na nodra vanua na Isireli; a sa dauqarava na wati i Neamani ko koya. 3A sa kaya ko koya vua na nona marama, Isa lei na Kalou, ke sa tiko mada na noqu turaga vei koya na parofita mai Samaria! ena qai vakabulai koya ko koya mai na nona vukavuka. 4A sa lako e dua, ka tukuna vua na nona turaga, ka kaya, Sa vosa vakaoqo na goneyalewa, o koya sa kau mai na vanua ko Isireli.
5A sa kaya ko tui Siria, Mo vakarau, mo lako sara, ia ka'u na vola e dua nai vola mo kauta vua na tui Isireli. A sa lako yani ko koya, ka kauta vata kaya e tini na taledi siliva, ka ono na udolu na koula, kei nai sulu me rauta vakatini. 6A sa kauta nai vola ko koya vua na tui Isireli, ka sa vaka, Oqo, ni sa yaco vei iko nai vola oqo, raica, ka'u sa tala vei iko na noqu tamata ko Neamani, mo vakabulai koya kina mai na nona vukavuka. 7Ia ni sa wilika oti nai vola ko tui Isireli, sa dresuka na nonai sulu, a sa kaya, Oi au beka na Kalou, me'u ia na veivakamatei kei na veivakabulai, sa talaki kina vei au na tamata oqo me'u vakabula e dua na tamata mai na nona vukavuka? ia dou kila mada, ka raica, ni sa via vakatubu ca vei au ko koya.
8Ia ni sa rogoca ko Ilaisa na tamata ni Kalou ni sa dresulaka na nonai sulu ko koya na tui Isireli, sa talaki vua na tui, ka kaya, A cava ko sa dresulaka kina na nomu i sulu? me lako mada mai vei au ko koya, me kila ni sa dua na parofita e Isireli. 9A sa lako mai ko Neamani kei na nona ose kei na nona qiqi vakaturaga, a sa tu mai na katuba ni vale i Ilaisa. 10A sa tala e dua nai talaki vei koya ko Ilaisa, ka kaya, Mo ni la'ki sili vakavitu e na Joritani, ena qai bula tale mai na lewemu, ia ko na savasava mai. 11A sa cudru ko Neamani, ka lako tani, ka kaya, Raica, ka'u a vakasama, ni na curu dina mai vei au ko koya, ka tu, ka masuta na yaca i Jiova na nona Kalou, ka yalovaka na ligana e cake e na tikina, ka vakabula na vukavuka: 12Sa sega li ni vinaka cake ko Epana kei Paripari, na uciwai mai Tamasiko, e na wai kecega ni Isireli? me'u kua li ni sili kina, ka savasava mai? a sa vuki rubu ko koya, ka lako vakacudrucudru yani. 13A ra sa toro voleka ko ira era sa qaravi koya, ka vosa vua, ka kaya, Na tamaqu, kevaka ka vakarota vei kemuni e dua na ka levu na parofita, ko na sega li ni cakava? ia sa dodonu vakalevu cake, ni sa kaya ko koya vei kemuni, Mo sili, ka ko na savasava. 14Sa qai lako sobu ko koya, ka silimi koya vakavitu e na Joritani, me vaka na nona vosa na tamata ni Kalou: a sa bula tale na lewena me vaka na lewe ni gone lailai, a sa savasava mai ko koya.
15A sa lesu tale ko koya vua na tamata ni Kalou, o koya kei ira kece na nona lewe ni sala, a sa la'ki tu ga e matana: ka kaya, Raica, au sa qai kila ni sa sega e dua na Kalou e vuravura taucoko, e Isireli duaduaga: ia oqo, mo taura mada e dua nai loloma maivei au na nomu tamata. 16A sa kaya ko koya, Me vaka sa bula ko Jiova, o koya ka'u sa tu e matana, ka'u na sega ni taura. A sa cikecike ko koya me taura; a sa bese ko koya. 17A sa kaya ko Neamani, Ia kevaka ko sa sega ni via taura, me soli mada vei au na nomu tamata eso na qele, e kauta rawa e rua na meule; ni'u na sega ni vakacabora tale koi au na nomu tamata nai soro kama, se dua nai madrali, vei ira na kalou tani, vei Jiova duaduaga: 18me kakua ni cudruvi au na nomu tamata ko Jiova e na vuku ni ka oqo, ni sa curu na noqu turaga ki na bure kalou i Rimoni me soro maikina, a sa ravita na ligaqu, ia, ni ka'u sa cuva e na bure kalou i Rimoni; io, ni ka'u sa cuva e na bure kalou i Rimoni, me kakua mada ni cudruva na nomu tamata ko Jiova e na vuku ni ka oqo. 19A sa kaya vua ko koya, Mo lako e na vakacegu. A sa lako vakalailai yani ko koya.
20A sa vaka ko Kiesai, na cauravou i Ilaisa na tamata ni Kalou, Raica, sa lomani Neamani oqo na kai Siria ko koya na noqu turaga, ka sega ni taura mai vua na ka sa kauta mai ko koya: me vaka sa bula ko Jiova, ka'u na cicimuri koya, ka kauta mai vua e dua na ka. 21A sa cicimuri Neamani ko Kiesai. Ia ni sa raici koya ko Neamani ni sa cicimuri koya tiko, sa sobu mai na qiqi vakaturaga me la'ki tavaki koya, a sa kaya, Dou sa vinaka tiko, se segai? 22A sa kaya ko koya, Sa vinaka saka: sa talai au na noqu turaga, ka kaya, Raica, sa qai lako walega mai vei au e le rua na cauravou, maivei ira na luvedra na parofita, mai na ulu-ni-vanua ko Ifireimi: mo ni solia mada vei rau e dua na taledi siliva, kei nai sulu me rauta vakarua. 23A sa kaya ko Neamani, Sa vinaka, mo kauta e rua na taledi. A sa cikevi koya, ka vauca e rua na taledi siliva e na taga e rua, kei nai sulu me rauta vakarua, ka tauca vei rau e le rua na nona tamata; a rau sa colata, ka sa liutaki koya. 24Ia ni sa yaco ko koya ki na vanua-cecere, sa taura mai vei rau, ka kotora e loma ni vale: ka talai rau yani na tamata, a rau sa lako. 25A sa lako ko koya, ka tu e matana na nona turaga. A sa kaya vua ko Ilaisa, O sa lako maivei, Kiesai? A sa kaya ko koya, Sa sega na vanua sa lako kina na nomu tamata. 26A sa kaya vua ko koya, Sa sega beka ni lako na yaloqu ni sa lesu tale na tamata mai na nona qiqi vakaturaga me tavaki iko? Sa gauna li oqo mo taura kina na siliva, ka taura nai sulu, kei na olive, kei na were-ni-vaini, kei na sipi, kei na pulumokau, kei ira na tamata, kei ira na vada? 27Ena kabiti iko kina na vukavuka i Neamani, kei ira na nomu kawa ka tawa mudu. A sa lako tani ko koya mai vua ka sa tauvi vukavuka, sa vaka na uca-vulavula.
Currently Selected:
2 TUI 5: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific