Gn 35
35
Max yalon Dios watx' k'anej yiban Jacob bay Betel
1Max yalon Dios bay cham Jacob: Elan cayti', cax chach tojcan bay Betel, a tu' cha watx'nej aj junok altar ayin. A bay tu' max in tx'oxaj in ba ayach yet ipan elaj bay oẍtak Esaú, ẍi bay.
2Cax max yalon cham Jacob bay eb yetbi c'al bay eb yuninal, yetokc'al bay masanil eb nak ajun yetok axca ti':
—Iek el masanil juntzan comon dios ayic' e xol, cax chex achinwi, che q'uexon e pichil e masanil. 3Tonek yin aymanil bay Betel. A bay tu' ok in watx'nej jun altar yuj wion can Dios, Cham max colwaj wetok yet wal ayin oc yin in bilc'ulal, cax max colwajc'al Cham wetok bayc'al max quin eq'ui, ẍi Jacob.
4Axca tu' max yun yak'on eb is diosal ayic' yetok bay cham Jacob c'al yetok ch'en yutxiquinej, axa cham Jacob max mukon aytok bay cawilal yich jun te matx'ji' ay is cawilal Siquem. 5A yet max el eb bay tu', a Dios max ak'on xiwc'ulal yiban masanil conoblak ay is cawilal tu', yuj tu' maj tzakloj eb yintak eb.
6Max apni oc cham Jacob yetok masanil eb anima ibil oc yuj bay jun lugar chi yik Luz, ac'al oc jun conob tu' chi ikon c'apax Betel, bay yul yet Canaán. 7A tu' max watx'nej aj cham jun altar, cax max yak'on yik jun lugar tu' El-Betel*fn* yujtol a yet max elaj bay yuẍtak, a bay tu' max tx'ox ba Dios bay. 8A c'apax bay tu' max cam xal Débora, xal max ilon ch'ib xal Rebeca, cax max mukon aytok eb bay cawilal yich jun te matx'ji', is cawilal Betel; axa cham Jacob, max ak'on yik jun lugar tu', Matx'ji' yet Cusc'ulal.
9Yet max jay Jacob bay Canaán petoj bay Padan-aram max tx'oxon pax ba Dios bay junelxa, max yalon Cham watx' k'anej yiban. 10Caywal ti' max yut yalon axca ti':
Ach ti' chek Jacob, palta tinani' majxa ek axca tu'; axa a bi ok ekcan tinani' Israel, ẍi Dios.
Yet max lajwi q'uexon Dios is bi tu', 11max yalon bay axca ti':
Ayin ton Dios in chi je' wuj masanil; xiwil ok yun onenal, cax xiwil ok yun enatil. A en ok el jun nación, cax xiwil conob ok yun pojaxtok, a xol enatil tu' ayc'al eb rey ok elok.
12A tx'otx' tx'otx' max wak' bay Abraham, c'al bay Isaac, chi wak' c'apax ayach. Ok wak'on pax tx'otx' bay eb enatil, ẍi Dios bay cham Jacob.
13Yet max el Dios bay max k'anjab yetok cham Jacob, 14axa sayon cham Jacob tu' jun miman ch'en k'atan yayji, cax max wabancan aj ch'en bay max k'anjab yetok Dios. Max secon ay aceite c'al vino yiban ch'en yin ofrendail bay Dios. 15Max yak'on yik Betel jun lugar tu'.
Is camichal xal Raquel
16Lajwi tu', max bekcan eb jun lugar tu'. Ayto wal yapni oc eb bay Efrata, cax max watx'ji c'ul xal Raquel; yinxac'al yatakil max yun jay jun unin tu'. 17Yet wal ayoc xal yin is bilc'ulal yuj yaben yail, axa xal partera max aloni: Manchak ach xiwi, mayal alji junxa a winak unin, ẍi xal. 18Palta yet toxa chi cam xal yuj jun unin tu', maxto yak'can yik Benoni;*fn* axa cham Jacob xin, Benjamín max yak' cham yika'.
19Caywal tu' max yun cam xal Raquel. Max mukaycan bay yul beal Efrata, a ton jun lugar tu' chi yik Belén tinani'. 20Cax max watx'nejcan aj waan cham Jacob jun cimiento yiban bay max mukay is mimanil xal, a ton jun tu' chi tx'oxon bay mukan xal Raquel tinani'.
21Axa beyc'altoj cham Israel tu', max watx'nej aj is campamento bay sataktok Torre yet Edar. 22Yak'ban cajan ec' cham Israel bay jun lugar tu xin, axa nak Rubén is c'ajol cham, max way yetok xal Bilha is cab yistzil is mam tu', cax max yabaj cham tzet max yunej.
Eb nak is c'ajol cham Jacob
(1 Cr 2.1-2)
Lajcawan eb nak is c'ajol cham Jacob: 23A eb nak is c'ajol yetok Lea a ton Rubén, nak babel winak, nak Simeón, Leví, Judá, Isacar c'al Zabulón. 24A pax eb nak is c'ajol cham yetok Raquel, a ton José c'al Benjamín. 25A pax eb nak is c'ajol yetok xal Bilha, xal is chekbej xal Raquel, a ton Dan c'al Neftalí. 26C'al eb nak yetok xal Zilpa, xal is chekbej xal Lea, a ton Gad c'al Aser. A ton eb ti' is c'ajol Jacob max alji bay Padan-aram.
Is camichal cham Isaac
27Max toj cham Jacob yil Isaac is mam bay is cawilal is tx'otx' cham Mamre, bay is conob Arba, chi yik c'apax Hebrón. A bay tu' max cajay ec' Abraham c'al Isaac. 28180 abil is k'inal cham Isaac yet max cami. 29Caw ichamxa yet max cami; axa Esaú c'al Jacob, eb is c'ajol, max mukoni.
Currently Selected:
Gn 35: ATBYK89
Highlight
Share
Copy
Want to have your highlights saved across all your devices? Sign up or sign in
Kanjobal (Q’anjob’al) © Sociedad Bíblica de Guatemala 1989