Gn 34
34
Yabixal ix Dina
1Axa ix Dina, yune' Lea yetok cham Jacob, max toj ix ulail bay xolak eb ix ix bay jun lugar tu'. 2A cham Hamor heveo, yajaw yayji yul conob tu'. Ay jun is c'ajol chi yik Siquem; a' max ilon oc ix, cax max etnelay ix yuj yin ak'bil puralil. 3Caw wal max camxac'al el c'ul yin ix, xan max montej yin camc'ulalil. 4Max yalon bay cham Hamor is mam axca ti':
—Asi' k'an jun ix k'opoj ti', chi wochej chin mojay yetok, ẍi nak.
5Caxc'al max yab Jacob tol mayal etnelay is cutz'in yuj nak Siquem tu', c'amc'al tzet max yal cham masantac'al max meltzojtek eb is c'ajol yin iloj calnel. 6Yak'ban tu', axa cham Hamor, is mam Siquem, max bet il-lay cham Jacob yuj. 7A yet max yaben eb nak is c'ajol Jacob tu' tzet max uji, max meltzojtek eb, caw wal max cus c'ul eb, max tit yowal eb, yujtol caw wal miman jun yobtakil max yun nak Siquem tu' yin is yinatil Israel, yujtol max yetnej nak ix is cutz'in cham Jacob. Caw wal man is mojok chi yun jun tu'. 8Axa cham Hamor max k'anjab yetok eb nak, max yaloni:
—A nak in c'ajol Siquem caw wal chi camel c'ul nak yin ix e yanab; yuj wal tu' elok yin e c'ul mojayokab nak yetok ix. 9Cax axq'uijan tol ac'al on oc e yetok; axca tu' chon mojay yetok eb ix e cutz'in ayex ti', cax chex mojay c'apax yetok eb ix co cutz'in ayon ti'. 10Cajayanek co xol ti', bekan ex sat co tx'otx' ti', aek oc e txon, manek e tx'otx', ẍi cham Hamor.
11Max yalon c'apax nak Siquem tu' bay cham mam ix Dina tu' c'al bay eb nak is nuej ix.
—Ok wak' ayex tzanc'al tzet che k'an ayin. 12C'amc'al yelapnok caxc'al miman tzet chi wak' yintak axcac'alta' chi yak' eb anima cax xiwil sabalej chi je' wak'oni, asan tatol chi cha e c'ul chin mojay yetok ix, ẍi nak Siquem tu'.
13Yujtol mayal etnelay yanab eb tu' yuj, cax max tak'wi eb nak c'ajol cham Jacob yin cabsatil bay nak Siquem c'al bay cham Hamor. 14Max yalon eb axca ti':
—C'am chi je' jak'on janab on bay junok winak tol man ak'bilok circuncidar; q'uixwil mi chi juncan on axca tu'. 15Asan tatol chi cha' e c'ul axca jayji oc ti' on, yamita chi je' chi jak' ix ayex, yujtol ayon ti' circuncidado jayji on. Ta chi je' e c'ul chex ak'lay circuncidar yetok masanil winak ay e xol tu', 16axca tu' chi je' e yion eb ix co cutz'in on, cax chi je' c'apax jion eb ix e cutz'in, catatu' chi je' jayji e xol cax junxanej conobal chi junej. 17Ta c'am che yikej e yak'on circuncidar e ba xin, chon elon cayti' cax chi jiontok ix janab ti' jetok on, ẍi eb nak.
18Axa cham Hamor yetok is c'ajol tu' max chaon c'ul eb axca yalon eb nak tu'. 19Majxac'al ec' tiempo, yujtol max canxac'al is c'ul nak yin ix is cutz'in cham Jacob tu'. A nak Siquem tu' asan nak miman yelapnok xol is yuninal cham Hamor, c'al xol is yican. 20Yin aymanil max toj nak yetok is mam bay puertail conob bay chi waj ba anima, max c'oli yalon el eb axca ti' bay eb winak:
21A juntzan winak ti' watx' is nabal eb, ok cajay eb nak co xol ti' c'al yaon oc eb nak is txon bay co conobal ti'. Xiwil tx'otx' bay chi je' yayji eb nak. Chi je' co mojay yetok is cutz'in eb nak, cax chi je' c'apax mojay eb nak yetok co cutz'in. 22Asan xin, chi yochej eb nak tol co masanil ayon winak on ti' chi jak' circuncidar co ba, axca is beybal eb nak, axca tu' junnej conobal chi jun yetok eb. 23A masanil is tzet yetal eb nak c'al masanil is jobbejal no' eb nak tu', jetc'al masanil, asan toc'al chi co tak'wej bay eb, yet watx' chi can eb co xol, ẍi cham Hamor yetok Siquem.
24Masanil eb nak tol tz'akanxa nabal, max cha c'ul eb tzet max yal cham Hamor c'al nak Siquem, xan max ak'lay circuncidar eb nak masanil. 25Axa Simeón c'al Leví is c'ajol cham Jacob, is nuej ix Dina, max toj eb bay conob tu' yet cabjial tu' yak'ban ya'toc'al ay eb winak bay tu' yuj max ak'lay circuncidar eb. Cax max apni oc eb nak cawan tu' bay conob tu', max oc ijan eb nak mak'on cam eb nak ya'ay tu' masanil yetok espada, yujtol man naanok yuj eb aj conob tu'. 26Cax max mak'on cam eb nak cham Hamor yetok Siquem is c'ajol. Lajwi tu' max yion eltek eb nak ix Dina yul yatut nak Siquem, axa paxtek eb nak tu'. 27Max lajwi tu', max apni masanil eb nak c'ajol cham Jacob tu', palanc'al yec' eb nak yiban eb camnak tu', max yion eltek eb nak masanil is tzetak yetal eb anima tu', caywal tu' max yun paktzen eb yuj max yetnej eb is yanab eb nak. 28Masanil tzet ay yul conob tu' c'al tzet ayil najat max yitok eb, calnel, wacax c'al burro. 29Max yelk'anentok eb masanil tzet ay yulak na, max yiontok eb nak eb yaliẍ unin c'al eb ix ix. 30Palta max yalon cham Jacob bay Simeón c'al bay Leví axca ti':
—Caw wal ayex che yak' somchaj el in c'ul. A tinani', masanil eb nak cajan bay juntzan lugar ti', masanil eb nak cananeo c'al eb nak ferezeo, caw wal ok chichon oc is c'ul eb nak win. Ok mi wajbaj oc ba eb nak, cax ok yak'on eb nak owal jetok. Caw wal jaywannej pax ch'an co winak ayic' jetok, tekan ok con is mak'cam eb nak co masanil, ẍi cham Jacob tu'.
31Max tak'wi eb nak axca ti':
—¿Tom ay is leyal chi yetnej eb nak ix janab ti', cax chi yuten nak winak tu' axcaxac'al junok ajmul ix? ẍi eb nak.
Currently Selected:
Gn 34: ATBYK89
Highlight
Share
Copy
Want to have your highlights saved across all your devices? Sign up or sign in
Kanjobal (Q’anjob’al) © Sociedad Bíblica de Guatemala 1989