1 S 4
4
Max yitok eb filisteo te caẍail trato
1A yet tu' max wajbaj oc ba eb filisteo, cax max yak'on eb owal yetok conob Israel. Yuj tu' max wajban pax ba eb israel, cax max oc eb makon sat eb, max watx'nen aj eb campamento bay cawilal Eben-ezer. Axa eb filisteo max watx'nej aj eb campamento bay Afec. 2Max eltok eb filisteo satak eb israel yuj yak'on owal, cax max ayc'ay eb israel yuj eb, ay mi 4,000 eb max cami. 3A yet max meltzoj eb israel bay campamento, max yalon eb yicham winakil conob: ¿Tzet wal yuj xan max on beklay yuj Jehová yul k'ab eb filisteo ti' tinani'? Ton jiek caẍail trato Jehová ayic' bay Silo, yet watx' chi toj Cham jetok yin owal, cax chon col-lay yuj bay eb ajc'ul tu', ẍi eb.
4Yuj tu' xan max yatok eb juntzan chekbej bay Silo yet max bet yiontek eb caẍail trato Jehová, Cham Yajaw Yin Masanil, Cham ayic' is trono yiban eb querubín. Tzakan oc Ofni, c'al Finees is c'ajol cham Elí yintak caẍail trato Jehová tu'. 5A yet max apni oc te caẍa tu' bay campamento, caw wal max tzalojbi eb masanil, max bil wal tx'otx' tx'otx' yuj yel yaw eb.
6A yet max yaben eb filisteo yel yaw eb israel yin tzalojc'ulal, max yalon eb: ¿Tzet yuj xan caw wal chi oc aw bay campamento eb hebreo? ẍi eb.
Axa max yaben eb tol a caẍail trato Jehová max apni oc bay campamento tu'. 7Max yalon eb yin xiwc'ulal: Max apni oc is diosal eb bay yul campamento. ¿Tzet ok jun tinani'? ¡Ok'bal on c'ul! C'amto junelok caytu' chi jun axca ti'. 8¡Ok'bal on c'ul! ¿mac ok on colon bay juntzan dios caw wal ay is may tu'? A eb max c'ayon el eb aj Egipto bay tz'inan tx'otx' yetok masanil pojanil yailal. 9A tinani xin, co tec'bajek co ba, yetok wal masanil jipalil ok jak'on owal, yet watx' c'am chon can yul k'ab eb hebreo ti', axca max yun eb yul co k'ab, ẍi eb. 10Lajwi tu', max oc lemnaj eb filisteo, cax max ayc'ay eb israel yuj eb; yinxa elilal max yun paxtok eb bay yatut. Caw wal tx'ial eb max cami; axca mi junok 30,000 eb. 11Max yiontok eb filisteo te caẍail trato Dios, max mak'on cam eb Ofni c'al Finees eb c'ajol cham Elí. 12A jun soldado yin is tribual Benjamín max colchaj can el xol owal tu', cax max toj bay conob Silo yet jun c'ual tu'. Max tzilontok is pichil, c'al yaon ajtok tx'otx' xol xil is jolom yuj tx'oxon el cusc'ulal. 13A yet max apni oc xin, chotan ay cham Elí yiban jun chem bay ti' be, yechbanen tzet ok ujok, yujtol ayoc yin bilc'ulal yuj te caẍail trato Dios. Axa yet max apni oc jun soldado tu' bay Silo, cax max yalon tzet yayji bay eb anima, max el yaw masanil conob. 14-1598 abilxa is k'inal cham Elí, xan c'amxa wal chi uj yiloni. A yet max yaben yel yaw eb anima tu' max yaloni:
—¿Tzet yayji eb chi weklabi tu'? ẍi cham. Yin wal yanej jun soldado tu' max apni ocok, cax max yalon bay cham Elí tu':
16—Petoj in xol owal, yin elilal max yun in tita, ẍi jun soldado tu'. Max yalon cham Elí bay:
—¿Tzet wal max uji? ẍi.
17Max yalon bay cham:
—Tol max on el bay eb filisteo, cax tom jantak anima max cam xol conob. Max cam c'apax eb a c'ajol, a ton Ofni c'al Finees, cax max yionpaxcantok eb filisteo te caẍail trato Dios, ẍi nak.
18A yet max yaben cham Elí tzet max yal jun soldado tu' yuj tzet max utlay te caẍail trato Dios tu', cax max toj pac'naj cham yintak chem bay ti' puertail conob tu', cax max ec' tx'umnaj nuk', max cami yujtol al is mimanil, cax icham winakxa cham. Cawinak abil max yak' yajawil yiban conob Israel. 19Axa ix alibej, yistzil Finees, toxa ok watx'jok c'ul ix, yuj tu' xan a yet max yabeni, tol max ilaytok te caẍail trato Dios, max cam pax cham yalib, c'al yichamil, a wal yet tu', cax max tit yail c'ul ix, max aljixac'al yune' ix. 20A yet max yilon eb xal chi ilon watx'ji c'ul ix tu' tol toxa chi cam ix, max yalon eb bay: Manchak ach xiwi, ilabi mayal alji jun a winak unin, ẍi eb xal; palta majxa tak'wok ix, axca tol c'amxa chi yabej. 21Icabod*fn* max yak' ix yik yune' max alji tu', max yalon ix: C'amxa is mimanbilal israel tinani', ẍi ix. Yujtol max ilaytok te caẍail trato, max cam pax yalib c'al yichamil ix, 22yuj tu' max yala': C'amxa mimanbilal israel, yujtol max ilaycantok te caẍail trato Jehová, ẍi ix.
Currently Selected:
1 S 4: ATBYK89
Highlight
Share
Copy
Want to have your highlights saved across all your devices? Sign up or sign in
Kanjobal (Q’anjob’al) © Sociedad Bíblica de Guatemala 1989