1 S 5
5
A bay eb filisteo max tojcan te caẍail trato
1A bay Eben-ezer max yitok eb filisteo te caẍail trato Dios, cax max apni oc yuj eb bay Asdod. 2Maxc'al apni oc yuj eb xin, max yaon octok eb bay yul templo is diosal eb chi yik Dagón, bay c'atan diosal eb tu' max yaay eb te'. 3Axa yet junxa k'inibalil max apni oc eb aj lugar tu' bay templo Dagón tu', max yilon eb, tol pac'an ay is diosal eb tu' bay sat tx'otx', bay satak te caẍail trato Jehová. Max yion aj eb, max yaon ajtok eb bay is lugar junelxa. 4Axa yet max apni pax oc eb yet junxa c'ual, pac'anxa pax ay is dios eb tu' bay sat tx'otx' bay satak te caẍail trato Jehová, pojnakxatok is jolom, c'al is k'ab, axa tu' c'otancan eltok bay marcoal puerta, axac'al is mimanil maj pojtok. 5Yuj tu' xan yettax tu', a yet chi octok eb sacerdote yet Dagón yetokc'al eb ayilwom bay yul templo tu', c'am chi yay eb yakan yiban marcoal puerta.
6Max lajwi tu xin, cax max alay oc yailal yiban eb aj Asdod tu' yuj Jehová, c'al yiban masanil anima bay yul is makbej tu'. Max pitzc'oj aj ilya' yin eb anima tu', tol chi malaj c'unal eb yuj, chi aj quisk'oy, cax chi cam eb yuj. 7A yet max yilon eb yailal max yatek Jehová, max yalon eb: Maj je' cancan caẍail trato Diosal eb israel cayti'; ilab tol caw wal yobxac'al chi yun jayoc yailal jiban yuj, cax chi etax pax co diosal yuj, ẍi eb.
8Yuj tu' max yatok eb k'anej bay eb yajawilal conoblak filisteo tu', tol chi wajbaj oc ba eb k'anjabok. Max yalon eb.
—¿Tzet chi jut is caẍail trato is Diosal eb israel ti'? ẍi eb.
—Iektok bay conob Gat, ẍi eb.
Axa yiontok eb tu'. 9A yet max lajwi yiontok eb, max yak'on pax Jehová jun miman xiwc'ulal bay yiban conob tu', cax max pitzc'oj aj quisk'oy tu' yin eb icham anima, c'al yin eb unin. 10Yuj tu' xan max yitok eb te caẍa tu' bay Ecrón. A yet max apni oc te' bay tu', max aj pax yaw eb anima bay tu' max yalon eb: Max e yitek te caẍail trato is Diosal eb israel cayti' yet chon c'aylay el yuj, ẍi eb.
11Max cam eb anima bay conob Ecrón tu' yuj xiwilal, c'al yuj miman yailal max yak' Jehová yiban eb, xan max awtelaytek masanil eb yajawil conob filisteo, cax max yalon eb bay eb: Iektok te caẍail trato Diosal eb israel ti'. Ak'ek meltzoj bay eb, axa ta chi yunej chon cam yuj co masanil, ẍi eb.
12Caw wal najat chi el yaw eb yuj yailal ayoc yiban, axa eb c'amto chi cami, caw wal yobxac'al yayji eb yuj quisk'oy tu'.
Currently Selected:
1 S 5: ATBYK89
Highlight
Share
Copy
Want to have your highlights saved across all your devices? Sign up or sign in
Kanjobal (Q’anjob’al) © Sociedad Bíblica de Guatemala 1989