Mateo 22
22
Qodaloqtenaxana so' n'onáxac 'me qode'quelégue
1Qana'chi so' Jesús ỹitaxa v'iỹílaxalégue da' d'aqtaxan, ỹauót'ai jen' daloqtenaxana, 'enaaco':
2—Da' l'onataxanaxac ñi' Dios 'me net'ague da' piỹem, jeda'me 'ená'am ga' net'a 'me ỹí'et ga' liqui'ỹáxac da' de'quelégue ga' l'onáxac ga' lec'óxot. 3Qana'chi ỹamaq so' lamaxa'spi da' ỹip'iỹéna ỹima so' liqui'ỹáxau'pi. Qaláxasa jeso'me qaỹa 'te janac. 4Qana'chi ỹitaxa ỹamaq so' lamaxa'spi laỹi, 'enapego', 'enaaco': “'Oñíỹapega qomle jega'me ñiuánaxau'pi da' sóxote saqátaxaata't da' niqui'ỹáxac. Sóxote samaxasoxolégue da' qoỹalaat so' ỹilo huaca qataxa jen'me ỹ'axadaic ỹilopi. Sóxote da' ỹimeta't da' niqui'ỹáxac. 'Anc'áchii'uo qomle da' n'onáxac.” 5Qaláxasa jeso'me sétaaque niqui'ỹáxau'pi sa ỹalaq. Na'chidáta da' 'uo so' ỹic'átee'ga ga' n'aléua, qataxa 'uo so' ỹic'áta ga' neuodénaqa', 6qataxa so' laỹi ỹaconé'uo so' lamaxa'spi so' net'a, qana'chi ỹi'uaxáatac, cha ỹivíd'a da' ỹalaat. 7Qana'chi jeso' net'a ỹátaqta jalcote da' lalemataic. Qana'chi ỹamaq so' nesoxonaqapi, da' qaidi qoỹalaat ỹima jeso' laataxanaxaicpi qataxa da' ỹigóoue ỹima na' l'emecpi. 8Ỹim, qana'chi jeso'me 'enapego' so' lamaxa'spi, 'enaaco': “Da' n'onáxac sóxote da' ỹima ỹim, qaláxasa na' te'me ñiuánaxau'pi sa taiỹet da' huétauo. 9'Oquíỹi qomle, 'oquíỹiilo naua' naq'aicolqa. Qana'chi 'anpodáiỹi ỹima jen'me 'auloỹalégue, da' qaidi nec'áte'uo jeda'me n'onáxac.” 10Qana'chi jeso'me namaxa'spi jec da' 'equeelo naua' naq'áico. Qana'chi ỹimata'a't ỹima jen' ỹilalégue. 'Uo na' sa nó'in da' lasoxoc qataxa jen' n'óota da' lasoxoc. Qana'chi ỹátaqta saqatelégue so' niqui'ỹáqa' jen' siỹaxadipi.
11Qana'chi so' net'a p'áuo da' dec'atenaxaneuó'o jeso'me nip'iỹéñiisecpi. Qana'chi ỹilalégue so' siỹaxaua 'me huétauo da' sa ỹaadíñi gaua' nouo 'me taiỹet da' qoỹaleeuó'o ga' n'onáxac. 12Qana'chi 'enapego' jeso'me, 'enaaco': “'Am ỹaqáỹa, ¿tóoqo'chi da' 'anp'áuo joca'li da' sa 'auaadíñi gaua' 'adeuo 'me taita da' 'ouétaaue ga' n'onáxac?” Qaláxasa jeso'me sa ỹ'at. 13Qana'chi so' net'a 'enapego' jen' ỹilotalégue so' niqui'ỹáxala', 'enaaco': “Ñíjo' siỹaxaua 'aucondiỹa't qomle naua' lichil qataxa naua' loua'. Ỹim, qana'chi 'auasaqáiỹi'ỹa na' n'álaxa na' p'áiỹi, 'me huá'ña qomle da' noỹin qataxa ỹiuoga't naua' lodaitel da' naỹaliaxa.” 14Qá'a naỹi ỹátaqta jalcote jen'me qoỹiỹáxanee'ga, qaláxasa sa lamai' qomle jegaa'me ỹátaqta niquiỹáqa.
Qodenataxáatapeec da' neseeténataguec so' net'a
(Marcos 12.13-17; Lucas 20.20-26)
15Qana'chi so' fariseopi jec da' detaxaỹapíỹi ga' lasoxoc da' sétaaque qoỹa'uo ga' chiỹoqóchiỹi lasouaxaset so' Jesús da' ỹinat. 16Huá'a, qana'chi 'uo na' qonamaxa na' lapaxaguenatacpi na' fariseopi qataxa jen'me ỹalcapíỹi na' quétapegue' jeso' net'a Herodes, qaidi 'enapéga so' Jesús, 'enaaco':
—'Am 'me 'am paxaguenataxanaxaic, qo'mi saỹátenaq da' 'am ỹátaqta 'eesoda naua' 'ad'aqtaqa, qataxa 'auapaxaguenataxáatapeec da' ladíquiaxac da' 'ónaxaic nasoxoc 'me ỹiỹamaxaden ñi' Dios, qataxa sa 'auqo'cha jega'me 'enaac jen' siỹaxadipi, qá'a 'am sa 'auloỹi da' ỹ'oqóchiỹi lasoxoc jen' siỹaxadipi. 17Ỹa qo'mi 'au'axatema ga' 'adeenataxac da' senataxanaqátapeec 'me 'éetojo': ¿Séetapega ỹiỹamqáchiiñi da' qoỹiseeten jiñi'me let'a na' net'alpi Roma lé'ec, 'uootaxa sa ỹañoxot?
18Qaláxasa so' Jesús ỹátaqta ỹaatetoot'eguet jeda'me sa nó'in leenataxac jeso'me. Qana'chi 'enapéga, 'enaaco':
—'Ami 'me 'oñíitapega da' 'ami 'eesoda, ¿tóoqo'chi da' jaỹim 'auapiiñíitac? 19Ỹa jaỹim 'aualoxóñiỹa qomle jaga'me laicaua lai 'me laso'vi da' qoỹiseeten ga' net'a.
Qana'chi qondó'uo jaso' 'oonole denario. 20Joca'li ma'le ỹic'aten, qana'chi so' Jesús ỹinat so' siỹaxadipi, 'enaaco':
—¿Jái'chogamaxa latáxasoxoc 'me huetalégue jánjo'? qataxa ¿jái'chogamaxa lenaxat jidi'me nedetalégue?
21Qana'chi jeso'me siỹaxadipi 'enaaco':
—Na'chiñi ñi' let'a na' net'alpi Roma lé'ec.
Qana'chi so' Jesús 'enaaco':
—'Auañimii qomle jiñi'me let'a na' net'alpi ga' lalémaxaset, qataxa ñi'me Dios 'auañimii qomle jega'me mai'chi lalémaxaset.
22Joca'li qodemachíchiỹi dójo', qana'chi jeso'me siỹaxadipi ỹátaqta ỹ'aalát'ec. Qana'chi qoỹaxañi jeso'me, qana'chi jeso'me siỹaxadipi jec.
Qodenataxáatapeec ga' lasoxoc da' nec'aliséguem ga' siỹaxaua
(Marcos 12.18-27; Lucas 20.27-40)
23Qana'chiso so' nolo' da' 'uo so' saduceopi 'me nec'áta so' Jesús. Qá'a jeso'me sa ỹ'amaqten da' qonec'alaxadiséguem na' sóxote ỹileupi. Qana'chi jeso'me ỹinatétac so' Jesús, 'enaaco':
24—'Am 'me 'am paxaguenataxanaxaic, jeso'me Moisés joca'li 'enaac da' 'uootaxa 'uo ga' siỹaxaua da' huó'on, da' ỹivíta da' ỹileu 'uootaxa qaỹa 'te lec'óxot, qana'chi ga' laqáỹa ỹitaxa 'uoneguet jaga' la'ỹoxoua, da' qaidi ỹa'uo ga' lec'óxot jeso'me laqáỹa 'me sóxote ỹileu. 25Qana'chi da' mai'chi senqáta huo'oi joca'li saua' siete naqáỹa'. Jeso' nepíloxot da' huó'on, qaláxasa ỹileu. Jeso'me qaỹa 'te lec'óxot, qana'chi jaso' loua n'on'aguet so' laqáỹa. 26Qaláxasa na'chi 'ená'am jeso'me laqáỹa, jeso'me ỹileu. Qataxa jec so' laqáỹa laqáỹa. Qana'chi quet'ot dójo', cha ỹivíd'a jeso'me p'áteegue jesaa'me siete naqáỹa'. 27Joca'li ma'le nimíchidiñi ỹiméda jesaa'me, qana'chi p'áteegue da' ỹileu jaso'me ỹauo. 28Da' ỹivíta da' qonec'alaxadiséguem jen' napa'lpi, qana'chi ¿jái'chogamaxa ga' ỹátaqta loua jaso'me ỹauo, qá'a ỹima jeso'me naqáỹadipi 'uoneguet jaso'me?
29Qana'chi so' Jesús 'enaaco':
—'Ami ỹátaqta 'ausómiỹaac, qá'a sa 'auaỹáchiñii' naua' nidii's l'aqtaqa ñi' Dios qataxa da' l'añaxac jiñi'me. 30Qá'a qomle ỹivíta da' qonec'alaxadiséguem na' napa'lpi, qana'chi qaỹa 'te ga' huó'on, qataxa qaỹa ga' ỹ'onáxan jaga' lec'oqte, qá'a jen'me 'ená'am na' lamaxa'spi ñi' Dios 'me net'ague da' piỹem. 31Qataxa dójo' lasoxoc qomle qonec'alaxadiséguem na' napa'lpi, qaa'le ¿séetapega sa 'autaxaỹaxañiỹo' da' mai'chi l'aqtac ñi' Dios? 'Me 'enaac: 32“Jaỹim 'me na'chaỹim netamnaxala' so' Abraham, so' Isaac, qataxa so' Jacob.” 'Ená'te da' netamnaxala' jiñi'me jen'me napa'lpi, na'chínata jen'me nec'alétaiỹi.
33Joca'li demachíchiỹi dójo' na' siỹaxadipi, qana'chi ỹátaqta ỹ'aalátapeeque naua' lapaxaguenataxanaxaco jeso'me.
Da' namaxasóxonaxac 'me ỹátaqta ỹágueegue da' qoỹalaxalégue
(Marcos 12.28-34)
34So' fariseopi joca'li ỹaỹáten so' Jesús da' qaỹa ga' ladic qa'en jen' lenataxanaxacpi so' saduceopi, qana'chi jeso'me ỹima'a't da' detaxaỹapega't. 35Qana'chi 'uo so' 'oonolec huétauo 'me dapaxaguenataxáatapeec na' naqátaxacpi, jeso'me sétaaque da' ỹapiỹen so' Jesús. Qana'chi ỹinat, 'enaaco':
36—'Am 'me 'am paxaguenataxanaxaic, ¿jái'chogamaxa ỹátaqta ỹágueegue da' qoỹalaxalégue jen'me naqátaxacpi?
37Qana'chi so' Jesús 'enaaco':
—“Ỹátaqta 'auauotec ñi' 'adesaliaxanec Dios, ỹimo'ot 'auen jana' 'adiquidiaqte, qataxa da' 'anchaalataxac, qataxa da' 'adeenataxac.” 38Naqaida jeda'me 'uáichiiñi qataxa ỹágueegue da' qoỹalaxalégue ỹima jénjo' namaxasóxonaxacpi. 39Qataxa da' laqáỹa 'me na'chi 'ená'am jeda'me 'eet'oi: “'Auauotec ga' 'adaqáỹa, 'auéet'em da' mai'chi 'anauotela't.” 40Naqainaua naua' dos namaxasóxonaxaco, na'chinaua naua' lamol ỹima jen'me naqátaxacpi 'me chiỹoqóchiỹi joca'li so' Moisés qataxa jen'me lapaxaguenataxanaxacpi jeso'me l'aqtáxanaxanecpi ñi' Dios.
¿Jái'chogamaxa lec'óxot ga' net'a nec'alaxaqui?
(Marcos 12.35-37; Lucas 20.41-44)
41Qana'chi joca'li maliaxa huet'a't so' fariseopi, 42qana'chi so' Jesús ỹinat jeso'me, 'enaaco':
—'Ami, ¿Jái'chogamaxa 'éeta ga' 'adeenataxaquii jega'me qoỹ'axátet'aguet net'a 'me nec'alaxaqui? ¿Jái'chogamaxa lec'óxot jega'me?
Qana'chi jeso'me fariseopi 'enapega'to':
—Jega'me lec'óxot so' qadet'a David.
43Qana'chi so' Jesús 'enapego' jeso'me, 'enaaco':
—Qalqaiga ¿tóoqo'chi so' David joca'li ỹ'aqtaxanaxan so' Espíritu Santo, qana'chi ỹimatá'ac jega'me da' lesaliaxanec? Qá'a so' David 'enaaco':
44Ñi'me qadesaliaxanec Dios 'enapéga jiñi'me ỹisaliaxanec, 'eet'oi:
'Onet'ague qomle jen' ỹoic,
tetoqo' ma'le sacho'to naua' 'adapia'te jen'me 'anp'aguénoqo'tpi.
45¿Hua'ago' jogamaxa 'éeta jega'me net'a 'me nec'alaxaqui da' lec'óxot so' David, qá'a jeso'me 'enapéga lesaliaxanec?
46Qana'chi qaỹa ga' ỹ'at jeso'me fariseopi da' 'chi 'oonolec ga' l'aqtac. Qana'chi chiỹoqóchii'ña jeso'me nolo' da' qaỹa ga' ỹinatétac jeso'me.
Currently Selected:
Mateo 22: PLGNT93
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen-GB.png&w=128&q=75)
Want to have your highlights saved across all your devices? Sign up or sign in
Nuevo Testamento Pilagá © Sociedades Bíblicas Unidas, 1993.