2 Tantara 34
34
Ny nanjakàn’i Jôsià. Fanitsiana ara-pivavahana
(Jereo 2 Mp 22.1-2; 23.4-20)
1Feno valo taona i Jôsià fony tonga mpanjaka; ary naharitra 31 taona no nanjakany tao Jerosalema#34.1 Jereo Jer 3.6.. 2Nanao izay mahitsy eo imason’ny TOMPO i Jôsià; ka narahiny ny toetran’i Davida razambeny, fa tsy mba nivily hiala tamin’izany izy.
3Tamin’ny taona fahavalo nanjakàny, fony i Jôsià mbola zatovolahy, no nanombohany nitady an’ilay Andriamanitr’i Davida razambeny; ary efatra taona taorian’izany kosa no nanombohany nanadio ny fanjakàn’i Joda sy ny tanànan’i Jerosalema mba tsy hisy toeram-panasinana na tsatokazo fanajana an’i Aserà, ary tsy hisy sarin-tsampy voasokitra na mivongana intsony. 4Noravana teo anatrehan’i Jôsià ny alitaran’ireo andriamanitra Bahala; nazerany ny fandoroana vovo-javamanitra teo amboniny; novakivakiny ny tsatokazo fanajana an’i Aserà mbamin’ireo sarin-tsampy voasokitra na mivongana#34.4 Jereo 33.3-7; 2 Mp 21.3-7.; ary notorotoroiny ho lasan-ko vovoka izany rehetra izany ka nafafiny teny amin’ny fasan’ireo efa nanolotra sorona tamin’ireny andriamani-tsiizy ireny. 5Nisy aza taolan’ny mpisorona amin’ny sampy mihitsy no naroso hodorana teo amin’ny alitara fisoronany#34.5 Jereo 1 Mp 13.2.. Dia toy izany no nanadiovan’i Jôsià ny fanjakàn’i Joda sy ny tanànan’i Jerosalema.
6Tany amin’ny tanàna manasita sy efraimita ary simehônita ka hatrany amin’ny tanàna naftalita mbamin’ny faritra manodidina azy avy 7dia noravan’i Jôsià koa ny alitara; nokapakapainy ny tsatokazo fanajana an’i Aserà ary ny sarin-tsampy voasokitra mba hotorotoroina ho lasan-ko vovoka. Nazerany ny fandoroana vovo-javamanitra eran’ny tanin’i Israely manontolo; izay vao niverina ho any Jerosalema izy.
Ny nahitan’ny mpisorombe ny bokin’ny lalàna
(Jereo 2 Mp 22.3-10)
8Tamin’ny taona faha-18 nanjakàn’i Jôsià, iny izy mbola manadio ny tany sy ny tempoly iny, dia i Safàna zanakalahin’i Atsalià ary koa i Mahaseià komandin’ny tanàna sy i Jôà zanakalahin’i Jôahaza sady mpitondratenin’ny mpanjaka no nirahiny mba hamboatra ny tranon’ny TOMPO Andriamaniny. 9Dia nankany amin’i Hilkià mpisorombe izy telo lahy ary nanome azy ny vola naterin’ny olona tao an-tranon’Andriamanitra; io vola io dia ny levita mpiandry varavarana no nanangona azy tamin’ny Manasita sy ny Efraimita mbamin’ny Israelita tavaratra sisa rehetra, ary koa tamin’ny Jodeanina sy ny Benjaminita rehetra mbamin’ny mponin’i Jerosalema. 10Natolotr’izy telo lahy teo am-pelatanan’ny mpianto-draharaha voatendry hiandraikitra ny tranon’ny TOMPO izany vola izany, ary nampiasain’ireo tamin’ny asa fanamboarana sy fanamafisana io trano io; 11dia nanomezany karama ny mpandrafitra sy mpandatsa-bato izany sy nividianany vato voapaika na hazo sakamandimby sady nanatevenana ny efitrano izay navelan’ireo mpanjakan’i Joda hihasimba. 12Nahatoky tokoa ny fomba fiasan’ny olona, teo ambany fifehezan’ireto levita ireto: dia i Jahata sy i Hôbadià tamin’ny taranak’i Merarỳ, ary koa i Zakarià sy i Mesolama tamin’ny taranak’i Kehata. Nisy levita hafa, izay samy mpiangaly zava-maneno avokoa#34.12 Toa nisy asa sasantsasany izay narahina mozika mingadongadona ny fanatontosana azy., 13ka natao tonian’ny mpitondra entana sy mpibaiko ny mpiasa rehetra araka ny anton-draharahany avy; ary tamin’ny levita koa dia nisy mpanoratra sy mpifehy ary mpiandry varavarana.
14Tamin’iny famoahana ny vola naterina tao an-tranon’ny TOMPO iny, no hitan’i Hilkià mpisorona ny Bokin’ny Lalànan’ny TOMPO#34.14 Araka ny fironan-kevitry ny mpanoratra ny 1 sy 2 Tantara, dia tokony ho ny Pentateoka (Genesỳ –Deoterônômy) no Bokin’ny Lalàna. Ampit 2 Mp 22.8 sy nta., izay nampitaina tamin’ny alalan’i Mosesy. 15I Safàna mpanoratra no nitenenan’i Hilkià ka nilazany fa ny Bokin’ny Lalàna dia hitany tao an-tranon’ny TOMPO. Dia natolotr’i Hilkià an’i Safàna ny boky; 16i Safàna kosa nitondra izany ho any amin’ny mpanjaka sady nanao tatitra taminy nilaza hoe:
–Ireo mpanomponao dia eo am-panatontosana ny andraikitra rehetra nasainao nosahaniny. 17Efa voaangon’ireo mpisorona ny vola izay azo tao an-tranon’ny TOMPO ka natolony teo am-pelatanan’ny mpianto-draharaha sy teo am-pelatanan’ny mpiasa.
18Dia nilazan’i Safàna koa ny mpanjaka hoe:
–Misy boky nomen’i Hilkià mpisorombe ahy ity!
Ary novakiny teo anatrehan’ny mpanjaka izany.
Nasain’i Jôsià hanontaniana i Holdà mpaminanivavy
(Jereo 2 Mp 22.11-20a)
19Nony ren’i Jôsià mpanjaka ny teny tao amin’ny Lalàna, dia nandriatra fitafiana izy; 20ary nomeny baiko i Hilkià, sy i Ahikama zanakalahin’i Safàna, ary i Habdôna zanakalahin’i Mikà mbamin’i Safàna mpitantsoratra sy i Hasaià mpandraharahany ka nilazany hoe:
21–Ndeha anontanio ny TOMPO ho ahy sy ho an’ny olona sisa tavela eto Israely sy Joda ny amin’ny teny raketin’io boky vao hita io. Ireo razantsika manko tsy nitandrina ny tenin’ny TOMPO sady tsy nanao araka izay rehetra voasoratra anatin’io boky io, hany ka mafy ny fahatezerana atosakin’ny TOMPO amintsika.
22Dia nankany amin’i Holdà mpaminanivavy i Hilkià sy ireo olon-kafa voatendrin’ny mpanjaka. I Holdà, izay nonina tao Antanambaon’i Jerosalema, dia vadin’i Saloma zanakalahin’i Tôkehata sy zafikelin’i Hasrà sady mpitahiry ny fanamiana masina#34.22 Jereo 2 Mp 22.14 sy nta. tao an-tempoly. Koa rehefa niresaka tamin-dravehivavy ry i Hilkià, 23dia nasainy miteny amin’ny mpaniraka azy hoe: «Izao no lazain’ny TOMPO Andriamanitr’i Israely: 24‹Indro Aho hahatonga loza amin’ity tanàna ity sy ny mponiny, dia ny ozona rehetra voasoratra ao anatin’ilay boky izay novakîna teo anatrehan’ny mpanjakan’i Joda. 25Efa nandao Ahy manko ny mponin’i Jerosalema sady nampanetona sorona ho an’ny andriamani-kafa, ary nampahatezitra Ahy tamin’ny sampy rehetra nataon’ny tanany. Izany no hitosahan’ny fahatezerako amin’ity tanàna ity ka tsy mbola hitoniany. 26Fa ny mpanjakan’i Joda, izay naniraka anareo hanontany Ahy TOMPO, dia anambarao fa Izaho TOMPO Andriamanitr’i Israely dia milaza izao: 27Ny amin’ny teny izay efa renao, dia nino anatra ianao ka niaiky heloka teo anatrehako, rehefa nihaino ny teniko ny amin’ity tanàna ity sy ny mponiny. Ary satria niaiky heloka teo anatrehako ianao ka nandriatra fitafiana sady nitomany, dia efa nihaino anao koa Aho; teny hentitra avy amiko TOMPO izany. 28Indro hangoniko any amin’ny razanao ianao ary ho voapetraka am-pasanao hombàm-piadanana, ka tsy mba hahita maso ny loza rehetra hamelezako ity tanàna ity sy ny mponiny.»
Nohavaozin’i Jôsià ny fanekempihavanana tamin’Andriamanitra
(Jereo 2 Mp 22.20b–23.3)
Dia nitondra izany valinteny izany ho an’ny mpanjaka i Hilkià sy ireo namany. 29Ary nandefa iraka i Jôsià hanainga tsy an-kanavaka ny loholon’i Joda sy i Jerosalema mba ho vory. 30Dia niaraka nankao an-tranon’ny TOMPO ireo mbamin’ny lehilahy rehetra sy ny mponina rehetra tao Jerosalema, izany hoe ny mpisorona sy ny levita ary ny sarambabem-bahoaka rehetra na kely na lehibe. Novakin’i Jôsià teo anatrehan’ny besinimaro ny teny rehetra tao anatin’ny bokin’ny fanekempihavanana, dia ilay boky izay hita tao an-tranon’ny TOMPO. 31Ary nitsangana teo ambonin’ny lampihazo voatokana ho azy ny mpanjaka, dia nanavao fanekempihavanana teo anatrehan’ny TOMPO mba hanarahan’ny tsirairay ny TOMPO sy hitandrina ny didiny sy ny fepetrany ary ny lalànany amin’ny fony manontolo sy ny fanahiny manontolo, ka hampiharany ny tenin’ny fanekempihavanana izay voasoratra ao amin’io boky io. 32Avy eo dia nasainy nanome toky ny olona rehetra izay tao Jerosalema mbamin’ny Benjaminita. Izany no nahatonga ny mponin’i Jerosalema hitondra tena araka ny fanekempihavanana nataon’Andriamanitra, dia ilay Andriamanitry ny razany. 33Taorian’izay dia nofoanan’i Jôsià avokoa ny fombam-tsampy maharikoriko tamin’ny tany manontolo izay an’ny Israelita sady notereny ny mponina rehetra teo amin’i Israely mba hanompo ny TOMPO Andriamaniny. Tamin’ny andro rehetra niainan’i Jôsià dia tsy mba nialan’ny olona ilay TOMPO Andriamanitry ny razany.
Currently Selected:
2 Tantara 34: DIEMDC
Highlight
Share
Copy
Want to have your highlights saved across all your devices? Sign up or sign in
Dikanteny Iombonana Eto Madagasikara © Malagasy Bible Society, 2004.