2 Tantara 35
35
Nanao fankalazana ny Paska i Jôsià
(Jereo 2 Mp 23.21-23)
1Dia nanao fankalazana ny Paska i Jôsià ho voninahitry ny TOMPO; ary tamin’ny volana voalohany, andro faha-14, no namonoan’ny olona ny biby ho an’ny sakafo Paska. 2Dia nampirisihin’i Jôsià hijoro amin’ny anjara raharahany avy ny mpisorona ary nampahereziny hanao ny fanompoam-pivavahana ao an-tranon’ny TOMPO. 3Ary ny levita izay natao hampianatra ny Israelita rehetra sady efa voatokana ho an’ny TOMPO dia nitenenany hoe:
–Ianareo natao hametraka ny Vatamasin’ny Tompo ao amin’ny tempoly, izay nataon’i Salômôna zanakalahin’i Davida sady mpanjakan’i Israely, dia efa tsy milanja azy intsony izao; koa ankehitriny manompoa ny TOMPO Andriamanitrareo sy manompoa an’ilay Israely vahoakany; 4ary samia mitsinjara araka ny tarikareo sy ny antokonareo avy ianareo, fa izany no fepetra voasoratr’i Davida mpanjakan’i Israely ary koa i Salômôna zanakalahiny#35.4 Jereo 8.14; 1 Tan 23–26.. 5Ary makà toerana ao amin’ny tempoly, araka ny fitsinjaran’ny tarik’ireo vahoaka mpiray firenena aminareo ary araka ny fitsinjaran’ny tarikareo samy levita. 6Natao hamono ny biby ho an’ny sakafo Paska ianareo ka midiova tena ary mivonòna hiasa ho an’ny mpiray firenena aminareo mba hanatontosana ny fankalazàna araka ny teny izay nampitain’ny TOMPO tamin’ny alalan’i Mosesy.
7Ny vahoaka izay vory teo dia nomen’i Jôsià zanak’ondry sy zanak’osy hatao sakafo Paska: 30 000 no isan’ireo biby ireo, ary mbola niampy omby telo arivo, samy avy amin’ny fananan’ny mpanjaka. 8Ny mpandraharahan’i Jôsià koa dia nanome biby ho an’ny vahoaka sy ho an’ny mpisorona ary ho an’ny levita. I Hilkià sy i Zakarià ary i Jehiela izay samy mpiandraikitra ny tranon’Andriamanitra, dia nanome ondry aman’osy 2 600 ary omby roa arivo ho an’ny mpisorona mba hatao soron’ny Paska. 9Ireo filohan’ny levita, izany hoe ry i Kônanià sy i Semahià ary i Natanaela mirahalahy mbamin-dry i Hasabià sy i Jehiela ary i Jôzabada, dia nandroso ondry aman’osy dimy arivo ho an’ny levita mba hatao soron’ny Paska.
10Dia nizotra toy izao ny fanompoam-pivavahana. Samy teo amin’ny toerany avy ny mpisorona, ary samy teo amin’ny antokony avy ny levita, araka ny baikon’ny mpanjaka. 11Dia novonoin’ny olona ny biby ho an’ny sakafo Paska; ny ran’ireo biby ireo dia noraisin’ny mpisorona ka nararany teo amin’ny alitara; ary ny levita kosa nanoditra ireo biby voavono. 12Rehefa nomena ny olona ny anjarany araka ny tarika sy fianakaviana teo amin’ny teraky ny firenena, dia navahana kosa ny sorona dorana manontolo hatolotra ho an’ny TOMPO, araka izay voasoratra ao amin’ny bokin’i Mosesy. Ary toy izany koa tamin’ny omby. 13Ny zanakondrin’ny Paska dia natsatsika tamin’ny afo araka ny fanao#35.13 Jereo Eks 12.8-9.; fa ny fanatitra masina hafa kosa nandrahoina tao anaty vilany sy vilanibe ary kaseraola, dia nozaraina faingana tamin’izay rehetra teraky ny firenena israelita. 14Taorian’izay ny levita vao nanamboatra ny sakafo Paska ho an’ny tenany sy ny mpisorona; ireo mpisorona taranak’i Aharôna manko nanolotra ny sorona dorana manontolo sy ny sabora mandra-pahalin’ny andro, ka dia izany no nahatonga ny levita hanamboatra ny sakafo Paska ho an’ny tenany sy ny mpisorona taranak’i Aharôna. 15Ireo mpihira, taranak’i Asafa, dia teo amin’ny toerany araka ny fepetra nataon’i Davida ary koa nataon’i Asafa sy i Hemàna mbamin’i Jedotòna izay samy mpanoro hevitra ny mpanjaka#35.15 Jereo 1 Tan 25.1.; ary ny mpiandry varavarana dia teo amin’ny isam-bavahady. Noho ireo tsy afaka niala tamin’ny fanompoany, dia ny levita namany koa no nanamboatra ny sakafo Paska ho azy. 16Dia nizotra toy izany tamin’io andro io ny fanompoana ny TOMPO mba hankalazana ny Paska sy hanolorana ny sorona dorana manontolo eo ambony alitaran’ny TOMPO, araka ny fepetra nataon’i Jôsià mpanjaka.
17Ny Israelita izay vory teo dia nankalaza ny Paska tamin’izany vaninandro izany, ary koa ny fety fihinanana ny mofo tsy misy leviora#35.17 Jereo Eks 12.1-20. nandritra ny fito andro. 18Fa tsy nisy Paska nankalazaina toy izany teo amin’i Israely, na dia hatramin’ny andron’i Samoela mpaminany aza; ary ny mpanjaka rehetra tamin’i Israely dia tsy nisy nankalaza ny Paska tahaka izay nataon’i Jôsià sy ny mpisorona ary ny levita mbamin’ny mponin’i Jerosalema sy ny Jodeanina rehetra ary ny Israelita hafa izay vory teo. 19Tamin’ny taona faha-18 nanjakàn’i Jôsià no nankalazana izany Paska izany#35.19 Jereo 34.8..
Fiafaran’ny nanjakàn’i Jôsià
(Jereo 2 Mp 23.28-30)
20Ankoatra izany rehetra izany, nony efa voavoatran’i Jôsià ny tempoly, dia niakatra i Nekao mpanjakan’i Ejipta mba hiady any Karkemisy eo amoron’i Eofrata; tamin’izay i Jôsià no niainga hifanehatra aminy. 21I Nekao kosa naniraka olona ho any aminy hanao hoe:
–Tsy natao hifamely akory izaho sy ianao, ry mpanjakan’i Joda! Tsy ady aminao izao ataoko anio izao, fa amin’ny fahavaloko; sady nasain’Andriamanitra handeha faingana aho. Koa aza toherinao Andriamanitra Izay momba ahy, fandrao matiny ianao.
22Kanefa i Jôsià tsy niova hevitra fa nitady izay hiadiana tamin’i Nekao; tsy nety nihaino ny teny izay nampilazain’Andriamanitra an’i Nekao izy, fa nody olon-kafa mba tsy ho fantatra ka nandeha niady taminy ihany tao amin’ny lemak’i Megidao#35.22 Jereo 2 Mp 9.27 sy nta.. 23Ary nahavoa an’i Jôsià mpanjaka ny mpandefa tsipîka, ka hoy ity mpanjaka tamin’ny manamboninahiny:
–Ento miala eto aho, fa voa mafy.
24Dia nesorin’ny manamboninahiny tamin’ny kalesy nisy azy i Jôsià ka napetrany teo amin’ny kalesy hafa ary nentiny ho any Jerosalema. Dia maty izy, ka rehefa nalevina tao am-pasan-drazany, dia nisaonan’ny mponin’i Jerosalema sy ny Jodeanina hafa rehetra.
25I Jeremià dia nanao hira fitomaniana an’i Jôsià; ny mpihira rehetra koa na lahy na vavy dia mahatsiahy an’i Jôsià mandraka androany, rehefa manao hira fitomaniana, satria nanjary fanao teo amin’i Israely izany; ary indreo efa voasoratra ho anisan’ny hira fitomaniana ireny hira ireny#35.25 Mety ho nirakitra rijan-teny maro dia maro fahiny ny bokin’ny Fitomaniana. Ny rijan-teny eo am-pelatanantsika ankehitriny dia tsy perikôpa mitatitra ny nahafatesan’i Jôsia; ary Jer 22.10 dia filazana miserana izany..
26Ny sisa amin’ny tantaran’i Jôsià ary koa ny asa soa nataony araka ny voasoratra ao amin’ny lalànan’ny TOMPO, 27eny, ny tantaran’i Jôsià, na tamboalohany na tafara, dia voasoratra ao amin’ny Bokin’ireo mpanjakan’i Israely sy i Joda#35.27 Jereo 16.11 sy nta..
Currently Selected:
2 Tantara 35: DIEMDC
Highlight
Share
Copy
Want to have your highlights saved across all your devices? Sign up or sign in
Dikanteny Iombonana Eto Madagasikara © Malagasy Bible Society, 2004.