2 Tantara 33
33
Ny nanjakàn’i Manase
(Jereo 2 Mp 21.1-18)
1Feno 12 taona i Manase fony tonga mpanjaka; ary naharitra 55 taona no nanjakany tao Jerosalema. 2Nanao izay ratsy eo imason’ny TOMPO izy#33.2 Jereo Jer 15.4. ka naka tahaka ny fanompoan-tsampy maharikoriko fanaon’ireo firenena izay noroahin’ny TOMPO teo anoloan’ny Israelita. 3Naorin’i Manase indray manko ny toeram-panasinana izay efa noravan’i Hezekià rainy ka nananganany alitara ho an’ireo Bahala sady nanaovany tsatokazo fanajana an’ireo Aserà; dia niankohofany sy nanaovany fanompoam-pivavahana koa ireo planeta aman-kintana eny ana habakabaka. 4Ary nanorenany alitara hafa aza tao an-tranon’ny TOMPO, dia tao amin’ilay nolazain’ny TOMPO hoe: «Ao Jerosalema no hitoetra mandrakizay ny voninahitro#33.4 Jereo 2 Sam 7..» 5Tao anatin’ny kianja roa amin’ny tranon’ny TOMPO tokoa no nanorenany alitara hafa ho fanajana ireo planeta aman-kintana eny ana habakabaka; 6ary na ireo zanany lahy aza dia natolony ho sorona dorana#33.6 Jereo 2 Mp 16.3 sy nta. teo an-dohasahan’i Bena-Hinôma#33.6 lohasahan’i Bena-Hinôma: eo atsimon’i Jerosalema.. Ankoatra izany dia mbola nanandro sady nisikidy sy nanao ody mahery izy, ary naka hevitra tamin’ny olona tsindrian-javatra sy mpanao fitokavana. Dia nahery nanao izay ratsy eo imason’ny TOMPO izy, ka nampahatezitra Azy. 7Izay sarin-tsampy voasokitra nampanamboarin’i Manase dia napetrany tao an-tranon’Andriamanitra, izay efa nolazain’Andriamanitra tamin’i Davida sy i Salômôna zanany hoe: «Ato amin’ity trano ity sy eto Jerosalema izay nofidiko tamin’ny foko israelita rehetra no hampitoerako mandrakizay ny voninahitro. 8Koa tsy hampirenireny ny Israelita hiala amin’ny tany izay efa notendreko ho an’ny razany Aho, raha imasoany hotandremana izay rehetra nandidiako azy, izany hoe ny lalàna manontolo sy ny baiko ary ny fitsipika nampitaiko tamin’ny alalan’i Mosesy#33.8 Jereo 2 Mp 21.8 sy nta..» 9Kanjo nampivaona ny mponin’i Jerosalema sy ny Jodeanina i Manase mba hanao ratsy mihoatra noho ny firenena izay naringan’ny TOMPO teo anoloan’ny Israelita.
10Niteny tamin’i Manase sy ny vahoakany ny TOMPO, nefa tsy noraharahainy akory. 11Dia nasain’ny TOMPO ho tonga hamely azy ny mpitari-tafiky ny mpanjakan’i Asiria; ary nosamborin’ireo i Manase ka nasiany masombỳ sady nogadrany rojo halimo ary nentiny nankany Babilôna#33.11 Tamin’izay i Babilôna dia teo ambany fifehezan’i Asiria. . 12Rehefa nianjadiam-pahoriana mafy izy, vao nitaraina tamin’ny TOMPO Andriamaniny sady niaiky heloka teo anatrehan’ilay Andriamanitry ny razany 13ka nifona taminy. Dia nandeferan’ny TOMPO izy sy nohenoiny vavaka ary nampodîny ho any Jerosalema hanohy ny maha mpanjaka azy. Tamin’izay no nieken’i Manase fa ny TOMPO no hany Andriamanitra.
14Taorian’izany i Manase dia nanao manda teo ivelan’ny Tanànan’i Davida, dia teo andrefan’ny loharanon’i Gihôna#33.14 loharanon’i Gihôna: jereo 1 Mp 1.33 sy nta.. Nitandavana nanaraka ny lohasahan-driaka izany manda izany ka tafapaka hatrany amin’ny Vavahadin’ny Hazandrano#33.14 Vavahadin’ny Hazandrano: teo amin’ny manda lafiny avaratry ny tempoly. rehefa nanodidina an’i Hôfela#33.14 Hôfela: jereo 27.3 sy nta.; avo dia avo no nanaovany azy. Ary nanendreny komandin’ny miaramila ireo tanànamimanda rehetra tao Joda. 15Dia nesoriny avy ny andriamani-kafa sy ny sampy tao an-tranon’ny TOMPO; ary nariany teny ivelan’ny tanàna ny alitara rehetra izay naoriny teo an-tendrombohitra misy ny tranon’ny TOMPO sy tao Jerosalema. 16Naveriny amin’ny laoniny indray ny alitaran’ny TOMPO ka nanolorany sorom-pihavanana sy sorom-pisaorana teo amboniny; ary nodidiany hanompo ny TOMPO Andriamanitr’i Israely ny Jodeanina. 17Mbola nanao sorona teny amin’ny toeram-pisoronana hafa ny olona, saingy ho an’ny TOMPO Andriamaniny ihany no nanolorany izany.
18Ny sisa amin’ny tantaran’i Manase, indrindra ny vavaka#33.18 Misy tokoa tonom-bavaka antsoina hoe Vavak’i Manase izay anisan’ny lahatsoratra deôterôkanônika (na apôkrifa) ankatoavin’ny Ortôdôksa sy Anglikanina sasantsasany. nataony tamin’Andriamaniny sy ny tenin’ireo mpahita izay niteny azy tamin’ny anaran’ny TOMPO Andriamanitr’i Israely, dia voarakitra ao amin’ny Asan’ireo mpanjakan’i Israely. 19Ny vavaka nataon’i Manase sy ny nileferan’Andriamanitra taminy ary ny antsipirian’ny fahotana amam-pahadisoana rehetra vitany mbamin’ny faritra nanorenany toeram-panasinana sy nasiany tsatokazo fanajana an’i Aserà ary nananganany sarivongan-tsampy fony izy tsy mbola niaiky heloka, dia voasoratra ao amin’ny Asan’i Hôzay. 20Rehefa lasa nodimandry any amin’ny razany kosa i Manase, dia nalevina tao amin’ny sahany. Ary i Amôna zanany lahy no nanjaka nandimby azy.
Ny nanjakàn’i Amôna
(Jereo 2 Mp 21.19-26)
21Feno 22 taona i Amôna fony tonga mpanjaka; ary naharitra roa taona no nanjakany tao Jerosalema. 22Nanao izay ratsy teo imason’ny TOMPO izy tahaka an’i Manase rainy. Fa ny sarivongan-tsampy rehetra nataon’i Manase rainy dia nanoloran’i Amôna sorona sy nanaovany fanompoam-pivavahana; 23kanefa tsy mba niaiky heloka teo anatrehan’ny TOMPO tahaka ny nataon’i Manase rainy izy, fa vao mainka nanota bebe kokoa aza.
24Nikomy tamin’i Amôna ireo manamboninahiny ka namono azy ho faty tao an-dapany. 25Fa mba nataon’ny mponin’i Joda maty kosa izay rehetra nikomy tamin’i Amôna mpanjaka; ka dia i Jôsià zanany lahy no voatendriny ho mpanjaka handimby azy.
Currently Selected:
2 Tantara 33: DIEMDC
Highlight
Share
Copy
Want to have your highlights saved across all your devices? Sign up or sign in
Dikanteny Iombonana Eto Madagasikara © Malagasy Bible Society, 2004.