2 Tantara 32
32
Ny nanafihan’i Saneheriba ny fanjakàn’i Joda
(Jereo 2 Mp 18.13; Is 36.1)
1Taorian’izany zava-nitranga sy fanehoam-piraiketam-po tamin’Andriamanitra izany, dia tonga tao Joda i Saneheriba mpanjakan’i Asiria ary nanao fahirano ny tanànamimanda ka nikendry haka azy. 2Rehefa hitan’i Hezekià fa tonga i Saneheriba ka nikasa hamely an’i Jerosalema, 3dia niara-nidinika tamin’ny manampahefana sy ny mpitari-tafika izy ny amin’ny tokony hanampenana ny loharano rehetra any ivelan’ny tanàna; ka niandanian’ireo ny mpanjaka. 4Dia vory maro ny olona ka nanampina ny loharano rehetra sy ilay renirano mikoriana anaty lakan-drano ambanin’ny tany#32.4 ilay renirano... tany: ny loharanon’i Gihôna izay namoaka rano nankany amin’ny lohasahan-driaka Kidrôna (jereo 1 Mp 1.33 sy nta.). Notampenan’i Hezekià izany fandehanany mankany Kidrôna izany fa notarihiny hankao an-tanàna ny rano tamin’ny alalan’ny lakan-drano ambanin’ny tany (jereo and 30 ary koa 2 Mp 20.20 sy nta).. Hoy manko ireo anakampony hoe: «Tsy tokony hahita izao rano be izao ny mpanjakan’i Asiria, rehefa tonga eto!»
5Nentanin-kerimpo hatrany i Hezekià ka nampanamboatra izay rehetra rava tamin’ny manda sady nampanisy tilikambo teny amboniny sy manda hafa koa teo ivelany; nampanamafisiny ny toerana Milao#32.5 Milao: jereo 1 Mp 9.15 sy nta. tao an-Tanànan’i Davida ary lefona aman’ampinga betsaka no nampanefeny. 6Dia nanendry mpitondra miaramila izy mba hifehy ny mponina tao an-drenivohitra.
Ary nasain’i Hezekià ny besinimaro hivory teo amin’ny toera-malalaka akaikin’ny vavahadin’ny tanàna ka nanaovany teny fampirisihana hoe: 7«Mahereza ka matanjaha. Aza matahotra na mivadi-po eo anoloan’ny mpanjakan’i Asiria sy ny hamaroan’ny miaramila rehetra izay entiny; fa misy hery lehibe kokoa miaraka amintsika noho ny miaraka aminy. 8Herin’olombelona no miaraka aminy, fa ny TOMPO Andriamanitsika kosa no miaraka amintsika; Izy no hanampy antsika sy hisahana ny adintsika.»
Dia izany tenin’i Hezekià mpanjakan’i Joda izany no nianteheran’ny mponina teo an-drenivohitra.
Fihantsian’i Saneheriba ny mponin’i Jerosalema
(Jereo 2 Mp 18.17-37; Is 36.2-22)
9Taorian’izay dia nanao fahirano an’i Lakisy#32.9 Lakisy: jereo 2 Mp 14.19 sy nta. i Saneheriba mpanjakan’i Asiria ary koa ny tafiny manontolo. Avy ao i Saneheriba no naniraka manamboninahitra hankany Jerosalema ho any amin’i Hezekià mpanjakan’i Joda sy ho any amin’ny Jodeanina rehetra nonina tao an-drenivohitra. Ka hoy ny hafatra nampitain’ireto iraka hoe:
10–Izao no lazain’i Saneheriba mpanjakan’i Asiria: «Mba inona izao itokianareo izao no dia miaritra fahoriana ato Jerosalema ianareo? 11Tsy i Hezekià ihany va no manambosy anareo hanolo-tena ho faty mosary sy hetaheta ka milaza fa ny TOMPO Andriamanitrareo no hamonjy anareo tsy hiharan’ny fahefàko? 12Kanefa io Hezekià io koa no nandrava ireo toeram-pisoronana aman’alitarany, ka nandidy ny mponin’i Joda sy i Jerosalema mba tsy hanao fanompoam-pivavahana afa-tsy eo anoloan’ny alitara tokana ary tsy handoro sorona hanetona afa-tsy eo ihany? 13Tsy fantatrareo va izay nataon’ireo razako sy ny tenako tamin’ny firenena hafa rehetra eto an-tany? Moa nisy nahavonjy ny taniny tsy hiharan’ny fahefàko ve ireo andriamanitry ny firenen-kafa? 14Ny andriamanitr’ireo firenena efa naringan’ny razako ireo dia tsy nisy nahavonjy ny olony tsy hiharan’ny fahefàko, ka dia hahavonjy anareo tsy hiharan’ny fahefàko va ny Andriamanitrareo? 15Ankehitriny àry, aza mety hofitahin’i Hezekià na ho voasodokany tahaka izao ianareo; aza matoky azy ianareo. Tsy nisy manko andriamanitra, tany amin’ny firenena amam-panjakana isan-tokony, izay nahavonjy ny olony tsy hiharan’ny fahefàn’ireo razako na ny fahefàko; noho izany, ireo andriamanitrareo#32.15 ireo andriamanitrareo: araka ny and 11 sy 14 ary 17 dia fantatr’i Saneheriba fa Andriamanitra tokana no ananan’ny Israelita; kanefa ity hoe ireo andriamanitrareo dia mety avy amin’ny hoe saika ny firenen-kafa fahizay no manompo andriamanitra maro; ny dkt tranainy rehetra dia manao hoe ilay Andriamanitrareo. koa tsy hahavonjy anareo tsy hiharan’ny fahefàko.»
16Ary ny manamboninahitra nirahin’i Saneheriba dia nanohy niteny ratsy nanohitra ny TOMPO Andriamanitra sy nanohitra an’i Hezekià mpanompony.
Notsiratsirain’i Saneheriba ny Tompo
(Jereo 2 Mp 19.14-19; Is 37.14-20)
17Dia nanoratra taratasy koa ity mpanjakan’i Asiria mba hihantsiana ny TOMPO Andriamanitr’i Israely sy hanarabiana Azy. Ka hoy izy hoe: «Tsy nahavonjy ny olony tsy hiharan’ny fahefàko ny andriamanitr’ireo firenena hafa teto an-tany; noho izany, ny Andriamanitr’i Hezekià dia tsy hahavonjy koa ny olony tsy hiharan’ny fahefàko.»
18Ankoatra izany, ireto irak’i Saneheriba ireto dia niantso tamin’ny feo mahery sady araka ny fiteny jodeanina teo anatrehan’ny mponin’i Jerosalema izay teny ambonin’ny manda; ny hampitahorany sy hampangorohoroany azy mba hahazoany ny tanàna no anton’izany. 19Ary ny fitenenany an’ilay Andriamanitr’i Jerosalema koa dia toy ny fitenenany an’ireny andriamanitry ny firenena any an-tany hafa ireny, izay sarivongana asan-tanan’olona ihany.
Fandosiran’ny Asirianina sy fahafatesan’i Saneheriba
(Jereo 2 Mp 19.15, 35-37; Is 37.15, 36-38)
20Noho izany toe-javatra izany dia nivavaka i Hezekià mpanjaka sy i Isaià mpaminany zanakalahin’i Amôtsa, ka niantso vonjy tamin’Andriamanitra. 21Ny TOMPO kosa naniraka anjely, izay nandringana ny miaramila maherifo rehetra sy ny manamboninahitra ary ny komandy teo an-tobin’ny mpanjakan’i Asiria. Ka dia lasa nody tamin-kenatra i Saneheriba; ary nony niditra tao an-tranon’ny andriamaniny izy, dia ireo zanany naterany ihany no namono nahafaty azy tao tamin’ny sabatra.
22Toy izany no namonjen’ny TOMPO an’i Hezekià sy ny mponin’i Jerosalema tsy ho azon’i Saneheriba mpanjakan’i Asiria na ho azon’ny fahavalo hafa rehetra; ary nanomezany azy fiadanana tamin’ny sisin-tany manodidina. 23Olona maro no nitondra fanatitra ho an’ny TOMPO tao Jerosalema ary koa fanomezana ho an’i Hezekià mpanjakan’i Joda; ka nanomboka tamin’izay i Hezekià no nalaza teo imason’ny firenen-drehetra manodidina.
Fiafaran’ny nanjakàn’i Hezekià
(Jereo 2 Mp 20.1-21; Is 38.1-8; 39)
24Tamin’izany andro izany dia narary efa saiky maty i Hezekià; koa dia nivavaka tamin’ny TOMPO izy, ary novaliany sady nanaovany zava-mahagaga. 25I Hezekià kosa tsy mba namaly araka izay soa efa natao taminy; fa niavonavona am-po izy ka niharan’ny fahatezeran’Andriamanitra ny tenany mbamin’i Joda sy i Jerosalema. 26Kanefa, na dia efa niavonavona am-po aza ity mpanjaka, dia niaiky heloka izy mbamin’ny mponin’i Jerosalema; ka tsy niharan’ny fahatezeran’ny TOMPO ireo, fony fahavelon’i Hezekià.
27Harena amam-boninahitra be dia be tokoa no nananan’i Hezekià. Ka nanao trano firaketana izy hametrahany ny volafotsy sy ny volamena, ny vatosoa sy ny zava-manitra ary ny ampinga#32.27 Ny ampinga izay voalaza ho anisan’ny zavatra sarobidy dia toa fitaovana fandravahana vita volamena angamba (ampit 1 Mp 10.16-17). mbamin’ny fanaka sarobidy isan-karazany; 28nanao trano fitahirizam-bokatra izy, dia vokatra toy ny vary sy ny divay ary ny menaka; ary nanao trano fisoko izy ho an’ny biby fiompy samy hafa sy nanao trano ho an’ny ondry aman’osy. 29Nanao tanàna maro ho an’ny tenany koa i Hezekià sady nanana ondry aman’osy ary omby betsaka, satria nomen’Andriamanitra fananana be dia be izy.
30I Hezekià ihany koa no nanampina ny lakan-drano ambony ao amin’ny loharanon’i Gihôna ka nampandeha azy ambanin’ny tany mba hidina mahitsy ho any andrefan’ny Tanànan’i Davida#32.30 Jereo 2 Mp 20.20 sy nta..
Nambinina tamin’ny asany rehetra i Hezekià. 31Noho izany, rehefa nandefasan’ny manampahefana babilônianina iraka izy mba hanontany momba ny zava-mahagaga nitranga teo amin’ny taniny#32.31 Toa ilay zava-nitranga voatantara ao amin’ny 2 Mp 20.8-11 izany., dia navelan’Andriamanitra hanao saim-pantatra izy mba hisedrany azy ka hahalalany izay toetrany rehetra.
32Ny sisa amin’ny tantaran’i Hezekià sy ireo soa nataony dia voasoratra ao amin’ny boky milohateny hoe Fahitàn’i Isaià mpaminany zanakalahin’i Amôtsa #32.32 Fahitàn’i... Amôtsa: jereo Is 1.1. ary ao amin’ny Bokin’ireo mpanjakan’i Joda sy i Israely#32.32 Jereo 16.11 sy nta.. 33Rehefa lasa nodimandry any amin’ny razany kosa i Hezekià, dia nalevina tao amin’ny faritra ambony eo amin’ny fasan’ireo taranak’i Davida; tamin’izay ny mponin’i Jerosalema sy ny Jodeanina hafa rehetra dia samy nanome voninahitra azy. Ary i Manase zanakalahin’i Hezekià no nanjaka nandimby azy.
Currently Selected:
2 Tantara 32: DIEMDC
Highlight
Share
Copy
Want to have your highlights saved across all your devices? Sign up or sign in
Dikanteny Iombonana Eto Madagasikara © Malagasy Bible Society, 2004.