Proverbios 5
5
Staq'uiel alab nich'nabetic sventa mu xlajic ta lo'lael yu'un jmulavil ants
1Jnich'on, a'yo me ava'yic li bijubtasel cu'une;
tuc'ulano me lec li tojobtasel cu'une.
2Yu'un jech chachan stuc'ulanel lec aba,
jech xu' avu'un chac'opoj lec ta sventa abijil.
3Yu'un li sc'op jmulavil antse toj lec xa chi' ya'lel jech chac c'u cha'al spom muc'ta pom;
li sc'opojele tsc'unibtas co'ntontic jech chac c'u cha'al aceite.
4Pero li c'usi ta jtatic yu'une toj ch'a jech chac c'u cha'al ch'ail vomol;
ja' toj ech'em chyayijesvan jech chac c'u cha'al machita ti lec juxbil xcha'jotal yee.
5Yu'un ja' xa stamoj batel li lajebale;
ta sbelal xa yavil animaetic oy batel li yacane.
6Mu'yuc xa ta yo'nton o li sbelal cuxlejale;
mu xa xil me chopol li be stamoj batele.
7Ja' yu'un, jnich'nab, a'yo lec ava'yic li c'usi chcale;
mu me xach'ay ta avo'ntonic li chanubtasel chacalboxuque.
8Mu me xanopaj batel ta stojol li chopol antse;
me jutuc mu me xanopaj batel ta sti' sna,
9yu'un jech mu xbat ta yan li alequilale,
jech mu xavac'be yu'unin li boch'o ja' no'ox tsc'an tspoje.
10Jech mu yanuc boch'o tsbalin li avocol ataravajoe,
jech muc ta snauc yan cristiano oy li avabtele;
11jech mu xlic avoc'ta aba ti c'alal chacham xae,
ti c'alal ta soc xa batel li abec'tale.
12Mu jechuc chlic aval: “¿C'u yu'un la jbaj li tojobtasele?
¿C'u yu'un mu'yuc stu laj ca'ay li taq'uiele?
13¿C'u yu'un muc jtuc'ulanbe sc'op li boch'o la xchanubtasune?
¿C'u yu'un muc jts'e'an jchiquin ta stojol li boch'o la sbijubtasune?
14Jutuc xa mu lilaj o, jutuc xa mu lich'ay o
ta stojol scotol li jchi'iltaque”, xachi.
15Ja' lec te no'ox xasicubtas o avo'nton ta vo'
ti te oy ta apozo atuque.
16Mu me buyuc no'ox xamal li vo' chloc' ta anio'e;
mu me jeche'uc no'ox xamal batel ta xoraltic.
17Li pozo xchi'uc li vo'e ja' avu'un atuc;
mu me xavac' ta yan.
18Toj jun yutsil li nio' avu'un atuque;
cuxetuc no'ox avo'ntonic o achi'uc li avajnil ono'ox ta aqueremale.
19Ja' ti toj lec ac'anoj ti toj c'upil sba jech chac c'u cha'al jcot me' te'tical chij ti toj xcuxet no'ox yo'ntone.
Junuc no'ox avo'nton scotol c'ac'al ti jech lec sc'anojote;
cuxetuc no'ox avo'nton o ti lec chasc'upinote.
20Jnich'on, mu lecuc me chach'ay aba yu'un li yan antse;
mu lecuc me xameyet achi'uc, me chavolbe xchu' li ch'ayemal antse.
21Yu'un li Muc'ul Diose sq'ueloj scotol c'usitic tspas li cristianoetique;
mu xch'ay sat ti bu chac' batel jujujet yacanique.
22Li boch'otic chopolique te macal chc'otic ta scoj sbolilic;
te chucul chc'ot ta scoj smul stuquic.
23Te chchamic o ta scoj ti muc xtuq'uibique;
te chch'ayic o ta scoj li sbolilique.
Currently Selected:
Proverbios 5: TZE97
Highlight
Share
Copy
Want to have your highlights saved across all your devices? Sign up or sign in
Tzotzil Chenalhó DC Bible © Sociedad Bíblica de México, a. c., 2002.