Proverbios 4
4
Taq'uiel ta sventa ac'o cotquintic c'usi lec ta pasel
1Jnich'nab, a'yo lec ava'yic c'u x'elan chaxchanubtasoxuc li atotique;
tuc'ulanic lec, yu'un jech chlic bijubanic batel.
2Yu'un lec li chanubtasel chacac'boxuque,
mu me xach'ay ta avo'ntonic li chanubtasel cu'une.
3Li vu'une ja' jech ololun to'ox ec;
li jtot jme'e toj lec la xc'uxubinun.
4Li jtote ja' jech la xchanubtasun chac li'i:
“Comtsano me ta avo'nton ti c'u x'elan chajchanubtasote;
ch'uno me li jmantal chacalbote, jech lec chabat.
5Ja' me c'ano li abijile xchi'uc ti oyuc c'usi lec xana'e;
mu me xajip xaten ta avo'nton li c'usitic chacalbote.
6Mu me xajip ta avo'nton, yu'un ja' chaxchabiot;
tsotsuc me sc'oplal chava'ay, yu'un ja' chastojobtasot.
7Ja'uc no'ox me toj tsots sc'oplal chava'ay li abijile;
ja' me c'ano ti chabijube; yu'un ja' tsots sc'oplal ta scotol li c'usitic oy avu'une.
8C'ano me, jech lec chbat ac'oplal yu'un;
c'upino me, jech cha'ich'at ta muc' yu'un.
9Ja' chayac'bot lec xnichimal ajol;
ja' jech chc'ot jech chac c'u cha'al acorona yu'un”, xiyutun li jtote.
10Jnich'on, a'yo me, ch'amo lec ava'ay li c'usi chacalbote,
jech ta xnatub lec avorail.
11Laj xa cac'bot lec avil li be sventa bijubtasele;
laj xa cac' xanovan batel ta tuq'uil be.
12Me ja' te chaxanov o batele, mu'yuc bu chamac ta be;
ac'o me cha'anilaj batel, mu'yuc chabosi avacan.
13Ac'o me lec ta avo'nton li chanubtasel cu'une, mu me xacomtsan;
chabio me lec, yu'un ja' sventa acuxlejal.
14Mu me ja'uc xatambe batel sbe li boch'otic bolique;
mu me xa'och batel yo' bu chanovic li boch'otic chopolique.
15Jelovan no'ox, mu me ja'uc xatam batel;
voc'o aba, ja' tamo o batel li be atamoje.
16Yu'un li stuquique mu x'och svayelic ti me mu'yuc spasic c'usi chopole;
mu'yuc vayel ta yo'ntonic ti me mu xyal ta lum junuc yu'unique.
17Yu'un ja' xa sve'el cha'yic o li c'usi chopole;
ja' xa yuch'um cha'yic o li eleq'ue.
18Yan li sbe boch'otic tuc' yo'ntonique lec sac jaman jech chac c'u cha'al chvoc' tal yibel vinajel ta jujun sobe,
jech ta c'unc'un tsacub batel ja' to c'alal sac xa o lec li osile.
19Yan li sbe boch'otic chopolique ja' jech chac c'u cha'al ic' osil,
jech mu xilic bu tsbosi yacanic.#Sal 1.6.
20Jnich'on, tuc'ulano lec li c'usitic chacalbote;
ts'e'ano lec achiquin ta ya'yel li mantal chacalbote.
21Mu me xch'ay ta avo'nton;
comtsano lec ta yut avo'nton.
22Yu'un ja' slequilalic chc'ot li boch'otic chich'ic ta muq'ue;
ja' sventa xpoxil sbec'talic chc'ot.
23Li c'usi tsots sc'oplal ta scotole ja' tsc'an chanop lec li c'usi chatic' ta avo'ntone,
yu'un ja' te chlic tal li acuxlejale.
24Mu me xloc' ta ave li c'usitic chopole;
comtsano me li epalc'ope.
25Tuc' no'ox xaq'uel osil;
mu me yalel muyeluc li asate.
26Q'uelo me lec ti bu chavac' batel avacane;
ja' me te xabat ti bu tuq'uil bee.
27Mu me xatselbuj ta yolon be xchi'uc ta yac'ol be;
mu me xavac' batel avacan ti bu chopole.
Currently Selected:
Proverbios 4: TZE97
Highlight
Share
Copy
Want to have your highlights saved across all your devices? Sign up or sign in
Tzotzil Chenalhó DC Bible © Sociedad Bíblica de México, a. c., 2002.