Proverbios 6
6
Taq'uiel ta sventa boch'o tstic' sba ta spojel j'iluvil
1Jnich'on, me oy chava'an aba ta piarol yu'un li boch'o lec xac'opan aba achi'uque,
o me oy chavac' ave ta sventa boch'ouc no'oxe,
2laj xa achuc aba o ta scoj li avee;
te xa tiq'uil lacom o ta scoj li c'usi laj avale.
3Jnich'on, ti c'u x'elan xu' chacolta aba ta ora
ta sventa ti laj xa achuc aba ta stojol achi'ile,
ja' jech xapas chac li'i:
Batan, bat bic'tajeso aba, c'anbo vocol; coltao aba loq'uel ta sventa li c'usi laj avale.
4Mu me teuc no'ox ch'an xachi;
mu me teuc no'ox x'och avayel.
5Jatovan loq'uel ta anil jech chac c'u cha'al te'tical chij c'alal chich' nutsele;
coltao aba loq'uel jech chac c'u cha'al jcot mut c'alal chich' yaquele.
Taq'uiel ta sventa boch'otic ch'ajic
6Jaracan, ch'ajil vinic, q'uelo lec avil li xinichetique;
otquino lec avil li c'usitic tspasique, jech xu' oy c'usi chachan te.
7Li stuquique mu'yuc jpasmantal,
mu'yuc ajvalil yu'unic, mu'yuc boch'o ch-albatic li c'usi tspasique.
8Pero lec sna' stsob sve'elic ta yorail q'uepelaltic;
lec sna' stsob c'usi tstunic ti c'alal yorail c'aoje.
9¡Ch'ajil vinic, ta'lo xa li vayele!
¡Ta'lo xa li mochleje!
10Yu'un c'alal chavay, c'alal chanicubaje,
c'alal chamey no'ox ac'ob chacux avo'ntone,
11ja'o ta xc'ot ta atojol li me'onal jech chac c'u cha'al jcotcovil ti ch-elc'aje;
lec chapal chtal jech chac c'u cha'al j'elec' ti lec chapal chtal xchi'uc yabtejebe.#Pr 24.33-34.
C'u x'elan stalel chopol cristiano
12Li boch'o chopol, ti mu'yuc lec c'usi oy ta yo'ntone,
puru va'lupat c'op chloc' ta ye;
13tspas sat sventa chlo'lavan,
tspas senyail ta sc'ob,
yu'un mu xac' ta a'yel c'usi oy ta yo'nton.
14Solel boliben o li sjole;
scotol c'ac'al puru chopol c'usi tsnop tspas;
puru sa' c'op oy ta yo'nton.
15Ja' yu'un ta anil no'ox xu' chtal tsots svocol;
ta anil no'ox xu' chcham, mu xa stac' tspoj sba o.
Sc'oplal c'usi ven chopol chil Muc'ul Dios
16Oy vacchop c'usi tspas cristiano ti chopol chil li Muc'ul Diose;
ma'uc no'ox, oy vucchop li c'usi toj chopol yo'nton yu'une:
17ja' li boch'o tstoy sba c'u x'elan sq'uel osile,
ja' li boch'o puru epalc'op tspase,
ja' li boch'o tsmil xchi'il ti mu'yuc smule,
18ja' li boch'o chopol c'usi tsnop ta yo'ntone,
ja' li boch'o chbat ta anil xchi'uc yacan ta spasel c'usi chopole,
19ja' li j'epalc'op testigoe ti mu meleluc c'usi chale,
ja' li boch'o tsocbe sjol xchi'iltaque.
Stojol mulivajel
20Jnich'on, ch'uno me li mantal chayalbot atote;
ich'bo me ta muc' li chanubtasel yu'un ame'e.
21Te me oyuc o ta avo'nton;
te xanats'in o jech chac c'u cha'al anats'.#Pr 1.8-9.
22Ja' chastojobtasot batel bu chabat, ja' chaxchabiot c'alal chavay;
ja' chasc'opanot c'alal chajulov.
23Yu'un li mantale ja' luz c'otem, li chanubtasele ja' sac osil c'otem;
li tuq'uibtasel xchi'uc li chanubtasele ja' sbelal cuxlejal c'otem.#Sal 119.105.
24Ja' sventa chascoltaot yu'un jech mu xastsalot li chopol antse,
jech mu xalaj ta lo'lael yu'un yan ants ti toj lec ya'yel li sc'ope.
25Mu me xpich'aj avo'nton yu'un li st'ujumale;
mu me slo'labot avo'nton ti c'u x'elan chasq'uelote.
26Yu'un li vinique ja' no'ox jech chich' lo'lael jech chac c'u cha'al jxox pan yu'un li jmulavil antse;
jech ta x'u'ninat o yu'un li antse xchi'uc c'alal ta xch'ulel.
27Me oy boch'o chac' c'oc' ta sna yo'ntone,
ta persa chc'ac' li sc'u'e.
28Me oy boch'o chanov ta ac'altique,
ta persa chc'ac' li yacane.
29Ja' jech li boch'o ta sc'opanbe yajnil xchi'ile,
ta persa tstoj smul.
30Jech chac c'u cha'al li boch'o ta x'elc'aje,
persa ta stoj me ivinaje, ac'o me ta scoj vi'nal i'elc'aj.
31Persa ta stoj vucub velta,
persa chac' scotol li c'usi oy yu'une.
32Ja' yu'un li boch'o chmulivaj xchi'uc yajnil xchi'ile, muc bijuc;
ja' no'ox tsa' svocol stuc.
33Xu' ta sta majel xchi'uc tsots q'uexlal;
j'ech'el ta soc o sc'oplal.
34Yu'un li yit'ixal yo'nton viniquetique ja' jech chac c'u cha'al c'oc';
mu'yuc xa perdón o yu'un ti c'alal yorail tsc'an tspac sutele.
35C'usiuc ch-ac'bat sventa chich' lecubtasbel yo'nton, mu xa sc'an o;
mu xa xlecub o yo'nton, ac'o me ep matanaletic ch-ac'bat.
Currently Selected:
Proverbios 6: TZE97
Highlight
Share
Copy
Want to have your highlights saved across all your devices? Sign up or sign in
Tzotzil Chenalhó DC Bible © Sociedad Bíblica de México, a. c., 2002.