Matiye 14
14
Əmta na Yohanna məgəɗ baptem
(MAR 6:14-29; LUK 3:19-20; 9:7-9)
1Pay daska, Herodə məlĩ na Galile aprəm wəna Yesu. 2Anah sit gewleɗ nan na: ɗəfəŋ Yohanna məgəɗ baptem naki dəsil səka əmta, vini asan də gbogboŋ naɗɗa sekeneɗ azani.
3 #
LUK 3:19,20 Vi Herodə armak Yohanna. Aɓrukuko, azganək a fərsəna aka batamət Herodiya guluk na Filip məlməni. 4#MƏS 18:16; 20:21Vi Yohanna anah sən na: Tive tay abok ka kəɗiyətgən ɓa. 5Herodə aŋgəl kawbayən kəta, ya geslne adak viyit ɗiyi, vi tay əɗiynən Yohanna va məskəleŋ.
6Səza əzləra na pay muwa Herodə agapə, wətət Herodiya təskələk abet ɗiy en məyet dəpaska. Annekək zə Herodə diyɗa. 7Asway sətək napsət an tədassoh pakə. 8Yaŋ mat təreɗta, təɗi mat na: Apsu ki Yohanna məgəɗ baptem addəv hĩlĩwe. 9Assanək məlyã, ya vi əsway nani gəm viyit ɗiy məyeti, aɗiyək wən nan dəpsətəŋgən an təssõhu. 10Yaŋ aslən ətaw ki Yohanna məgəɗ baptem sə fərsəna. 11Məkini kiyən addəv hĩlĩwe, yaŋ məpsət waŋ goruk nakə, təkiy sət mata. 12Gewleɗ nan pohu, agəmənək kigəbayni, andəkənən. Yaŋ addoŋ aprəman sənən Yesu.
Yesu azəmgitik ɗiy gabal sle
(MAR 6:30-44; LUK 9:10-17; YOH 6:1-14)
13Səza Yesu aprəm wən nani, asilik sə təki nani, ambatək də bəlay, vi kawmbat kapta-muyã takərgəni. Ɗiy aprəmnənka, agilyoŋguk sə walaŋgit gəlaɗe gugriɗ neti, asbanənək də tilti. 14Səza Yesu aprik səddəv bəlay, awlek ɗiy diyɗa, awələk sahã aketi, ambəlgitik məs gbəgbaɗe neti.
15Adan moskoy agəɗə, gewleɗ nan poh azani, aɓsənən na: təkiyəŋ kapta-muyã yi, ya pay atoŋko. Apsit tive sit ɗiyəŋ dəmbataŋ a walaŋgit gəlaɗe dəlbahaŋgən zəga nawzəm sən kiyti. 16Yaŋ Yesu anah sit na: Wəray tay dəddoŋgən ɓa, munokum zək nokum məpsit əzəma. 17Yaŋ aɓsənən na: Zəga tay avam aŋ ɓa, abbər moŋgosok sle gəm kilifeŋge sula. 18Yesu anah sit na: Məki siw aŋka. 19Yaŋ aɗi wən nan sit ɗiy dəssoŋgən aka kevile. Agim moŋgosokɗe sle neki gəm kilif sula, aziy haran a disiŋ, agəɗ əsoko sən Maŋgəlva. Arɗeti, apsit gewleɗ nani, gewleɗ nan tam sit ɗiyi. 20Ndəɗaŋ pak azəmaŋka, abaŋka. Akkalanənək an dəmbərə, agəɗək gadagarɗe kəlaw kiyit sula miknihti. 21Əŋɗa net zel en dəzəmaŋ wagəɗ aza gabal sle mbəksa gil dit kirni.
Yesu tay ədaw aka pehe
(MAR 6:45-52; YOH 6:15-21)
22Dərɓagan ləŋgə, Yesu agəɗək vavyak sit gewleɗ nan dətoŋgoŋgən addəv bəlay, vi dəmbataŋgən daabəŋ kiyən a dəgar, aka tay əgay uɗak dit ɗiyi. 23Adan awɗak dit ɗiyi, ndən peŋ aka mossorgo metiŋ vi kakkam takərgəni. Hã moskoy gap tay adak takərgəni. 24Bəlay faraɗay diyɗa də mabuzgum, vovulumɗe asilyoŋguk akani vi haran sek aka səmyã yi. 25Ba pummo na, ndən pay azet də ədaw aka pehe. 26Adan gewleɗ awlanən ədaw aka pehe, geslne armeke, aɓɗaŋ na: Məzvefi, anzlaŋgək vaŋvəla sən geslne. 27Yesu apel sitik go'ləŋge, amna: Məsok zukum intə, kədawgeslne'eŋ ɓa. 28Piyer azlan sənəka, amna: Aw Daya, adan istə na, anah su ndawgən azok dəket iŋkile tamə. 29Yaŋ anah sən na: Ade.
Səza agil səddəv bəlay, Piyer adawək aket iŋkile əmbat aza Yesu. 30Ya adan awla semyã gədakə, geslne armaka, atəŋgək ətəpa, aŋgəzlək vaŋvəl dawnəh na: Daya akõhguwa. 31Yesu atələk van go'ləŋgə, armaka, aɓsən na: Məs ətaf nan məgəsən, vimi kəsok kiyuk gərətgərət di?
32Adan aguloŋ sulegit pak addəv bəlay, səmyã ɓatə. 33Yaŋ gewleɗ en naddəv bəlay appu'oŋ abani, aɓsənən na: Gesiŋgi Wətən Maŋgəlva kənani.
Yesu tay əmbəlgit məs gbəgbaɗe na kivadələv Genesaret
(MAR 6:53-56)
34Səza agaraŋgə, atoŋgoŋ aka dələv na Genesaret. 35Ɗiy naka dələv nadak vet asənnək Yesu, abbalanənək wən nan aka kivadələv van pakə, akisənənik məs gbəgbaɗe pakə. 36Akkamanənək dəpetigən dərəŋgənəngən gabba lukut nan dayday, en məs dərəŋgənən pak amblaŋka.
Currently Selected:
Matiye 14: GB
Highlight
Share
Copy
Want to have your highlights saved across all your devices? Sign up or sign in
All right reserved