Matiye 15
15
Ərba an səzet ɗiy en lahəŋka
(MAR 7:1-13)
1Yaŋ, Farisaɗe dit mərbaŋ-mahenziŋ azzoŋ sə Yerusalem aza Yesu, assohõnən də wənəh na: 2Vimi gewleɗ nok azbanən ənziya an net ɗiy lahəŋ ɓa di? Vimi awɗanən vet dawzəm way ɓa di? 3Yaŋ Yesu azlani, aɓsit na: Ya nokum hara vimi kədaggaraŋ ki mahenziŋ na Maŋgəlva ammba ənziya an nokum lahəŋ di? 4#ƏGI 20:12; ƏMS 5:16 ƏGI 21:17; MƏS 20:9Maŋgəlva anahək na: Agagdakan afuk dət moko, an dəpel mbərayən aka afəni awaniɓa mani, kawbayni. 5Yaŋ nokum munokum tat ənahaŋ na: Naway di pak dənah sən afəni awaniɓa sət man na: «An nədapsuk nabbah suk kətaŋ na, nəpsənək Maŋgəlva», 6as na tay də wəray nawgagdakan kpẽh ɓa. Vasna kəraygənənək əpel na Maŋgəlva sən wən na matuyokum. 7Məs muluvuluvuɗe! Təstəsi Isaya agəɗ kəleŋ akokum, də wənəh na:
8 #
ISA 29:13
Ɗiyiŋ də met adawgagdakawəni,
ya mekret na, farafaray səzawa.
9Ɗari adagagdakawəni,
an adarban sitin ɗiy mahenziŋ net ɗiyi.
Zəgeɗ en nawraygənən ɗəfa
(MAR 7:14-23)
10Yaŋ Yesu aye ɗiyi, aɓsit na: Məprəma, məprəm gabbani: 11An məs dədawtoŋ ama ɗəf dədawraygəni ɓa, an dədawgilyen sə ma ɗəf titir dədawraygəni.
12Yaŋ gewleɗ nan azaraŋ azani, aɓsənən na: Kəsənək na əpel nok assanək mekret Farisaɗe sa? 13Yaŋ azlan siti amna: Zeŋve məs afu na disiŋ dəzlga ɓa pak kaptuni. 14#LUK 6:39Məppeti: deŋgerɗe, məkdahaŋ deŋgerɗeŋ. An daŋgar tay əgdəh daŋgar, sulegit pak wazbəraŋ addəv vovu. 15Yaŋ Piyer azlani, aɓsən na: Aboton səm wənməkkpaŋgaŋ ɗa. 16Yesu amna: Askes na, nokum pak kaprəmnən gabban ɓa sa? 17Kəsənən na an məzutoŋ ama ɗəf pak, addəv ɗəf adaddan kawtəhən a gizbe ɓa sa? 18#MAT 12:34Zəga an məzugilyen sə ma ɗəfa, sə makran adawgilyeni, zəgaski dədawraygəni. 19Vi sə makra ɗəfi, əɗɗumɗe mbəreyti, əbay gəbaya, əku a gizbe, polkoyo, əhãla, uwawəna gəm əpel mbərayən aket ɗiy adawgilyoŋ. 20Zəgeɗiskiŋ dədawraygənən ɗəfa. Wəzəm məza əɗɗa va ɗəf ɓa, araygən na ɗəf ɓa.
Guluk zeŋvit ɗiy meɓɓet tətafək Yesu
(MAR 7:24-30)
21Adan Yesu agil sədaka, ambatək aka dələv na Tir də Sidon. 22Guluk mə Kananakə naka dələv vanəs, pay aza Yesu, təŋgəzlək vaŋvəl dawnəh na: Daya, wətən Davit, awəl sahã akawa. Wətu tat məs tuya adawzəmgət sahã dərwadərwa. 23Ya nan dəzlan sət wən taka dayday ɓa. Gewleɗ nan azzoŋ azan dawnəh na: Arɓahat tələ, vi tat əzbam də vaŋvəla. 24Yaŋ Yesu azlani, amna: Məslənwi an azet timeŋgiɗ mizet na Israyeli ɓa ɓa. 25Yaŋ təde təppu' abani, təmna: Aw Daya, ade əbbah suwa. 26Yaŋ azlani, amna: Vi tay lew əgəm way net kirin kazgan sit kirtit kirɗe ɓa. 27Yaŋ təmna: Ha'aw Daya, vi kirtit kirɗe vet affekeŋ way an dədawbəta səmmba vet migilti. 28Yaŋ Yesu azlani, aɓsət na: Gulku, ətaf nok metiŋgini dəgəɗ suk va kəŋgələ. Wətət təmbələk daska'e ləŋgə.
Yesu ambəlgitik məs gbəgbaɗe diyɗa
29Səza azar sədaka, Yesu ambatək a ma pehe na Galile. Apeŋ aka mossorgo metiŋ, ndən adak ɗewi. 30Ɗiy diyɗa azzoŋguk azani, akiyaŋ sənənək vədalɗe, deŋgerɗe, maŋgalɓayeɗi, goryomɗe-mərma hurzlumiti dit məs gbəgbaɗe meɓɓet diyɗa. Avoŋgitin ammba təlni, yaŋ ambəlgiti. 31Hã ɗiy əggətaŋ də ula goryomɗe-mərma hurzlumit dawpeleŋ, maŋgalɓayeɗ təlit məpparən, vədalɗe ədawaŋ lawlawə, deŋgerɗe ulaŋgə, agagdakanənək Maŋgəlva na Israyel.
Yesu azəmgitik ɗiy gabal poɗo
(MAR 8:1-10)
32Yesu ayek gewleɗ nan azani, yaŋ aɓsit na: In tat ule ɗiyiŋ sahə, vi pay hoku yaŋka, tahəŋ azawa, ya tahəŋ də zəga nawzəm ɓa. Maw tay aka əppet əddoŋ də mãy ɓa, vi adawtaknən gabbet aka tive ɓa. 33Gewleɗ nan aɓsənən na: Səŋga zəga nawzəm adazzan səm a kapta-muyaŋ gala nawbet ɗiy gbeŋkiŋ di? 34Yesu aɓsit na: moŋgosokɗe mbarwaŋ avokum di? Aɓɗaŋ na: buhul gəm kilfeŋge memeɗeŋɗe siɗikke. 35Yaŋ Yesu aɗiy wən nan sit ɗiy dəssoŋgən afuŋ. 36Agimik moŋgosokɗe buhul dit kilfeŋge neki, agəɗ əsoko sən Maŋgəlva, arɗeti, apsit gewleɗ nani, gewleɗ nan tam sit ɗiyi. 37Ndəɗaŋ pak azəmaŋka, abaŋka. Akkalanənək an dəpələ, agəɗək gadagarɗe buhul miknihti. 38Əŋɗa net zel en dəzəmaŋ tay gabal poɗo, mbəksa gil dit kirni. 39Adan Yesu apsitik tive sit ɗiyi, ndən toŋ addəv bəlay, ndən mbat aka dələv na Magadan.
Currently Selected:
Matiye 15: GB
Highlight
Share
Copy
Want to have your highlights saved across all your devices? Sign up or sign in
All right reserved