Matiye 13
13
Wənməkkpaŋga na məzənse
(MAR 4:1-9; LUK 8:4-8)
1Pay dəpaska, Yesu agilik səŋgili, ambatək əsan ama pehe. 2#LUK 5:1-3Ɗiy diyɗa azzoŋguk azani. Vini atoŋ addəv bəlay, asan addəvən, ɗiy tam aziweŋ ama busgum. 3Arban sitik zəgeɗ diyɗa də wənməkkpaŋga. Amna:
Məzənse ambatək a gulyo, vi kazlga. 4Adan adawndolni, zeŋve maɓɓan abətək aka tive, biŋgeɗ azzoŋko, ayaɗənənka. 5Zeŋve maɓɓan abətək aka soyomo, dələv tay akan diyɗa ɓa. Go'ləŋgə agilke, vi dələv tay akan diyɗa ɓa. 6Adan pay agili, azlaka, akəlka vi dərah təki nampa suwerin ɓa. 7Zeŋve maɓɓan abətək addəvit gedirgeɗi, gedirgeɗ aɓayaŋka, azəmgənək sahã. 8Ya zeŋve maɓɓan əmpa abətək aka ba'arə, aɗika. Maɓɓan aɗiyək səkatə maɓɓan kaklaw sləre maɓɓan kaklaw hoku. 9Məs də sləman, dəprəma.
Vimi Yesu adawpel dit wənməkkpaŋgaɗe di?
(MAR 4:10-12; LUK 8:9-10)
10Yaŋ gewleɗ na Yesu azzoŋ azani, assohõnəni: Vimi kədawpel sit dit wənməkkpaŋgaɗe di? 11Yaŋ azlani, aɓsit na: Nokum məpsukumi əsən wən məɗama na məlĩ na Maŋgəlva, ya neti məpsiti ɓa. 12#MAT 25:29; MAR 4:25; LUK 8:18; 19:26Vi məs dərah zəga kapsəni azani, ərah nan wasan diyɗa, məs dərah zəga ɓa, kawmõhni an navan daydayə. 13Vi aski nədawpel sit dit wənməkkpaŋgaɗe. Vi tahəŋ əziyən hereti ya awlaŋ ɓa. Tahəŋ əpakən sləmeti, ya aprəmnən ɓa, awsənən gabban ɓa. 14#ISA 6:9,10Vaski kəleŋ na Isaya agəɗ aketi, an məs apel dawnəh na:
Əprəm kədaprəmaŋgə, ya kəsənən gabban ɓa.
Ula kədawlaŋgə, ya tay kədawlaŋ ɓa.
15Vi mekret ɗiyəŋ aɓɓəlka,
asukunək sləmeti, atipinik hereti vi adawlaŋ ɓa,
adaprəmaŋ ɓa, adawsənaŋ gabba zəga ɓa,
gəm adawɗiyaŋ marava ɓa, ka nədawmbəlgit ɓa.
16 #
LUK 10:23,24 Ya munokum, əzaɓ aza horokum vi tay ula, gəm sləmokum vi tay əprəma. 17Gesiŋ nədawnah sukum: Məskəleŋɗe diyɗa dit ɗiy təstəs diyɗa, aŋglaŋgək ulanən an kədawlaŋgə, ya dulanən ɓa. Aŋglaŋgək əprəm an kədaprəmaŋgə, ya dəprəmnən ɓa.
Yesu tay əboton wənməkkpaŋga na məzənse
(MAR 4:13-20; LUK 8:11-15)
18Məprəm gabba wənməkkpaŋga na məzənse naka. 19Ɗəf an dəprəm əpel na məlĩ na Maŋgəlva pak ya dəsən gabban ɓa. Məs pepet əzzan əgəm an məzlgan a makran naka, ndəni an məzlgan aba tive. 20An məzlgan aka təki soyomo, ndeni ɗəf an dəprəm əpele, dətaf go' də ənneke. 21Ya suwerin tay ɓa. Wasan gap pay siɗikke, ya an tatwãh awaniɓa əsərma adek aka wən na əpel naka, ndən ərəh tive naskoto. 22An məzlgan addivit gedirgeɗi, ndeni ɗəf an dəprəm əpele, ya əŋgla na zəga negge də wərak na arya wazəmgənən sahã na əpel vani, ndən kpaŋ məza əɗi aran ɓa. 23An məzlgan aka ba'arə, ndəni ɗəf an dəprəm əpele, dəprəm gabbani, sessel watər wəraya, maɓɓan waɗi aran səkatə, maɓɓan waɗi aran kaklaw sləre, maɓɓan kaklaw hoku.
Wənməkkpaŋga na bergezleŋ
24Yaŋ Yesu apel sit də wənməkkpaŋga maɓɓani, amna: Məlĩ na Maŋgəlva tay va ɗəf dəzlga zeŋve moggon a gulyo ananda. 25Aka ɗiy adawleŋgeŋgi, məzuzel nan pay bergezleŋ ka'ka' addəv haykəmari, ndən mbatə. 26Səza hay agili, apoku, bergezleŋɗe tam arbanənək ziti. 27Belemɗe na afən gəla payaŋ azani, aɓsənən na: Daya: Nam na zeŋve moggon kəzlgə a gulyo anokdaŋka ɓa sa? Ya səŋgay bergezleŋ di? 28Aɓsit na: Ɗəf məzuzeli dəɗɗaska. Belemɗe aɓsənən na: As na mok aka məlgən əptiwit sa? 29Azlan sitike: Awwo, vi kədaptuwən bergezleŋɗe sap də haykəmari ɓa. 30Məppet sulegit pak dəɓayaŋ sap hã gap pay nawbəla. Pay nawbəla, wanənah sit məzubəlaŋ na: Məkkelet bergezleŋɗe tagay, miynet bebbepi, kawzleti. Ya na haykəmari na məkkalan su a maha anawda.
Wənməkkpaŋga na zeŋve na meslene
(MAR 3:30-32; LUK 13:18-19)
31Yesu apel sitik də wənməkkpaŋga maɓɓani, amna: Məlĩ na disiŋ tay va zeŋvək na meslene. Ɗəf agəmtək azlgətək addəv guli nani. 32Məgəsəttə səmmbet zeŋveɗe pakə, ya an təɓayka, ndət əday kiyit teɓ pakə, ndət əkkpaŋ wəlaŋga, hã biŋgeɗ əzzoŋ əzaɓ gəla net aka ki vata.
Wənməkkpaŋga na wuɗo
(LUK 13:20-21)
33Yesu apel sitik də wənməkkpaŋga maɓɓan əmpa, amna: Məlĩ na disiŋ agilik va wuɗo, guluk təgəm təslahan ara gəpa marga taka, gəpa pak ahəska.
Va Yesu agəɗ wəza dit wənməkkpaŋgaɗe
(MAR 4:33-34)
34Zəgeɗis pak Yesu anah sitik ɗiy dit wənməkkpaŋgaɗe, tay məs anah sit məza dit wənməkkpaŋgaɗe yi ɓa ɓa, 35#GLƊ 78:2vi an məskəleŋ anah dəgəɗgəni. Amna:
Wanəkol maw əpel wənməkkpaŋgaɗe,
wanərbet zəgeɗ en məɗemit farfar, aka ətəŋ na gabba dəlva.
Yesu tay əboton wənməkkpaŋga net bergezleŋ
36Adan Yesu appet ɗiyi, atoŋguk eŋgili. Gewleɗ nan azzoŋguk azani aɓsənən na: Arban səm wənməkkpaŋga net bergezleŋɗe a gulyo. 37Yaŋ azlan siti, amna: Məs dəzlga zeŋve moggonəŋka, ndəni Wətən Ɗəfa. 38Guli na ənziya egge yi, zeŋve moggoni, ndəni ɗiy na məlĩ na Maŋgəlva, bergezleŋɗe ndəɗaŋgə ɗiy mbəreyti. 39Məzuzel məs dəzlge ndəni Satan, pay nawbəla, ndəni pay nagrak dəlva, məzubəlaŋ tamə ndəɗaŋgə maslayɗe. 40Va adawndetin bergezleŋɗe kazgət aka offo vaski adawsan pay əgrak dəlva. 41Wətən Ɗəf waslən maslayɗe nani, wagilgitin məskotgitin ɗiy addəv mambraya dit məs mambrayɗe pak səddəv məlĩ nani, 42wazgetin addəv movoro na offo. Əhəm də əpəran slay ɗəfi dədawsan adaka. 43Asna ɗiy təstəs wawiɗeŋ va pay addəv məlĩ na Afiti. Məs də sləman, dəprəma.
Arya məɗamani gəm everzle na sləma
44Məlĩ na disiŋ agilik va arya məɗaman addəv gulyo. Ɗəf arəhəka, aɗamanək əmpa, addəv ənnek nani, yaŋ ambat əvəl zəga nan pak albəh guli vani.
45Məlĩ na disiŋ agilik va məman van məkay everzleɗ na sləma. 46Adan arəh everzle na sləma diyɗa, yaŋ ambat əvəl zəga nan pak yaŋ albəh everzle vani.
Wənməkkpaŋga na zəva
47Əmpa, məlĩ na disiŋ agilik va zəva məzgan a pehe dərəm zeŋvit zəgeɗ temtem pakə. 48An aknahka, kagdəni ama busgum, kassayi, kawzi kilif mogget a kəggəla, ya en mbəreyti kawndolti. 49Vaski adawsan pay əgrak dəlva. Maslayɗe wazzoŋgu wagohnin ɗiy mbəreyit səret en təstəsə. 50Wazgetin addəv movoro na offo. Əhəm də əpəran slay ɗəfi dədawsan adaka.
Aryeɗ meleketet dit məzveti
51Yesu assohẽtik gewleɗ nani. Kəprəmənək zəgeɗis pak sa? Azlan sənənka məprəməka. 52Yaŋ anah sit na: Vi vaski mərbə-mahenziŋ məzəzban məlĩ na Maŋgəlva pak, agilik va afən gəla, məzugilgit zəgeɗ meleketeti gəm zəgeɗ məzvet sə təki nawzaɓ nani.
Ɗiy na Nazaret dətafnən Yesu ɓa
(MAR 6:1-6; LUK 4:16-30)
53Adan Yesu agrek wənməkkpaŋgaɗeski, ndən mbat sədaka, 54adan agap aka dələv nani, ayegetik ɗiy nadak addəv gəla nakkal neti hã ndəɗaŋ əggətaŋgə, aɓɗaŋ na: Səŋga arəh maɗɗulaŋ mãy sekeneɗiŋ di? 55Nam na wətən məntar wəleŋɗe yi ɓa sa? Miryam adawyətən mani, Yakob də Yosef, Simoŋ gəm Yuda əŋgə milmiŋgiɗin ɓa sa? 56Milmiŋgiɗin məguliŋgit pak anamdaŋ ɓa sa? Səŋga arəh zəgeɗiŋ pak di? 57#YOH 4:44Aski dətek dawtafni. Yaŋ Yesu aɓsit na: kawzeleni məskəleŋ an aka dələv nani gəm eŋgil ananda yi ɓa ɓa. 58Adak na, Yesu dəgəɗ sekeneɗ diyɗa ɓa, vi tahəŋ də ətaf ɓa.
Currently Selected:
Matiye 13: GB
Highlight
Share
Copy
Want to have your highlights saved across all your devices? Sign up or sign in
All right reserved