ZECHARIAH 4
4
Ameshoyi Kulukibepu
1Kungumi khuu I pütsa akeno pa no itaghi ighi no timi lakhi no züake lono küda puthuve ketoi I küda puthu. 2Eno I vilo pi, “No ye kiu ithulu ani kea?” I no khochile, “Ameshoyi kulukibepu lakhi I no ithulu ani, tipau kütsüqa lo akhu lakhi eno akulu tsüni no tipa shou ani, akulu lakhikhi lo ayihu kichi tsüni ani. 3Eno olive sübo kini no tipau küdau ani, lakhino akhu ajeu ani eno lakhino piyiu ani.” 4Kungumi khuu I pütsa akeno pa vilo I no pi, “Hipaqo ye kiu kea I mpeu?” 5Kungumi huno I khochile pi, “Hipaqo ye kiu keno no ye mtha kea?” I no khochile, “Moe, I mpeu.” 6Ikehu pa no I vilo pi, “Hi ye Zerubbabel tsükeu Ampeu tsa ke: Akumto no kumo, momu aküka nomu kumoe, ikemu I Ghungu vecheo noe, ipi aqokitikhi Mpeu no pi. 7O naghuto kuloghi, no ye kiu kea? Zerubbabel zülo no ye külaqave nani. Pa no ashekhau tuqu pewo gho akelo timiqo no iqhaighu ‘Kimiyekini, Alhouw kimiyekini!’ ipi nani.”
8Tileno Ampeu tsa I lau ighi no pi, 9“Zerubbabel u no aki hipau aboqha qhavae; pa u no itaghi hipau kishekha nani. Tileno aqokitikhi Mpeu no nongu lau I puwu kepi nongu no ithi nani. 10Kughengu khunono akikishi lo ajuichemo kepi aghüthisü akeno alovive nani, eno Zerubbabel u lo akimghitu ithulu nani.
“Akulu tsüni hipaqo ye Ampeu nhethi ayeghiqha kümtsü shou jupuku achekeu ke.” 11I no pa vilo iniju, “Akulukibepu ajeu eno piyiu olive sübo akeu ye kiu kea?” 12I no akiniu pa pütsa no iniju, “Ameshoyi yihu phivilo olive süloka kini akeu, khipau lono akughupu thazü lephe ani keno tipaqo ye kiu kea?” 13Pa no I vilo pi, “Hipaqo ye kiu keno no ye mtha keshea?” I no khochile, “Ni ye mthae, I mpeu.” 14Ikehu pa no pi, “Hi ye nukisheve keu pama ayeghiqha kümtsü Mpeu gholo puthugho achekeu ke.”
Currently Selected:
ZECHARIAH 4: SUMRVBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More