ZECHARIAH 3
3
Achinetou Joshua Kungunhetsü
1Tithiu pa no achinetou Joshua no Ampeuw kungumi zülo puthugho aghi keu, eno Satan no pa u ajeu puthugho no pa nguku aghi keu I piye. 2Ampeu no Satan vilo pi, “Ampeu no o lomipi ani, O Satan! Jerusalem kisheluve keu Ampeu no o lomipi ani! Hi ye ami lono püxü phelu keu misüke kumo?” 3Joshua ye niqhinilai keu phimini pepusü kungumi zülo puthugho ae. 4Eno kungumi huno pa zülo puthugho akeqo vilo pi, “Niqhinilai keu phimini pa launo xave tsülo.” Eno Joshua vilo pa no pi, “Julo, I no o launo o xine ikhive tsüae, eno I no tsüghükhüi keu phimini o pipeni.” 5Tile I no pi, “Panoqo pelo tsüghükhüi keu kütsükükha phi pesü pa kütsü lo sütsü pelo.” Ikehu panongu no tsüghükhüi keu kütsü kükhaphi pesü pa kütsü küzütsü eno aphimini pipeve. Ampeuw kungumi no aphivilo puthugho ae.
6 Ampeuw kungumi no tsaqüi Joshua shikumto, 7“Aqokitikhi Mpeu no hitoi piani: Tsala nono I laghi lo cheche eno I zakütsü pape aye, nono I kilo ayepe nani eno Iw küghaki peitha nani, eno khunoqo hile puthugho ani keno tipaqo gholo ighikulupu chipiu tsü nani. 8Hi inilo, O achinetou Joshua, no eno o küsami o zülo iqa akeqo ye amchipu timiqo ke: julo, I no I qeu Aloka hu süghi nani. 9Kughengu julo, I no Joshua zülo atu qhipüa keu, atu lakhi anhethi tsüni akeu lo I no atsa yetha pukupe qhitsü nani, aqokitikhi Mpeu no asheshu, eno hipau ghakhu xine ye I no atsala lakhi lono ikhive tsü nani. 10Tipa tsalani, aqokitikhi Mpeu no asheshu, nongu kümtsü no pa kisüghüu kusü no pa tsaibo eno mububo qholo ighipe nani.”
Currently Selected:
ZECHARIAH 3: SUMRVBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More