ZECHARIAH 5
5
Liküküzü Kaku Yechekeu
1Itaghi I no I nhethi tsükhope jukelo liküküzü kaku lakhi yecheghi keu ithulue! 2Kungumi huno I vilo pi, “No ye kiu ithulu ania?” I no khochile, “Liküküzü kaku lakhi yechekeu ithulu ani. Ti ye akushulau auxakuchho muku, eno akijelau auxakuchho chighie.” 3Pa no I vilo pi, “Hi ye aghakhu kümtsü shou ghukusho ikughi akeu ke. Kughengu liküküzü kaku tüxau akeu kiqi lono püka chekemi kümtsü kileqhive nani, eno itaghi tüxau akeu kiqi lono akimki shoqhi shi chekemi kümtsü kileqhive nani. 4Aqokitikhi Mpeu no pi, I no hipau puwu nani, eno hi no küpkami kilo eno khuu no I je lono akimki shoqhi shicheni keno pa kilo ilo nani. Eno tipau no pa kilo ngove no asüpa ngo atuqo ghi külhüve nani.”
Ashoghi lo akeu Totimi
5Tithiu kungumi I pütsa akeu huno azüu ighi no I vilo pi, “O nhethi tsükhope ti ipeche keu ye kiu keno julo.” 6I no pi, “Ti ye kiu kea?” Pa no pi, “Hipau ye ashoghi lakhi ipeche keu ke.” Eno pa no pi, “Hi ye aghakhu kümtsü lo timiqo xineke.” 7Julo, ayi künha lhapheve no totimi lakhi ashoghi lo iqa aghi! 8Pa no pi, “Hi ye Küsakügha ke.” Pa no ashoghi lo li inasüve no ayi künha mishishei keu pesü tipau kichi nhave.
9Tishino I no I nhethi tsükhope jukelo totimi kini azüu ipe cheghi! Pama ye amülhü lo achishibo xakhope yecheghi. Pama chishibo ye azüghau chishibo toi eno pama no ashoghi pesü ayeghi ngo atsütsü dolo ikuve. 10I no kungumi I pütsa akeu vilo iniju, “Pama ye ashoghi khilau pewu cheni kea?” 11Pa no pi, “Tipau ki mla tsüniye Shinar yeghi lo pewu cheni. Kughou no aki tipau shiqhiveni keno, pama no ashoghi pesü tile qhive nani.”
Currently Selected:
ZECHARIAH 5: SUMRVBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More