MATTHEW 19
19
Aküghüxa vehu Shika
(Mk 10:1-2)
1Kughou Jisü no hipaqo pikhave keno pa ye Galilee qhive no Jordan kukuu Judea cheaxü lo wuve. 2Aqokitikhi no pa pape ighi, eno tilauno pa no panoqo shipivitsü.
3Phariseemi no pa lau ighi no pa ghükeju ghi iniju, “Ayezah kiqilo kiu kiu ghenguno mu milakhi ye pa nipu phevelu nani ma?” 4Pa no khochile, “Nongu ye phimla aphi keshea? Abothu lono Pulhoküsüu no kiptimi ngo totimi lhosü, 5eno pi: ‘Hi ghenguno timi lakhi ye pa puaza qhive no pa nipu sasü kütüna luveni eno pama ye ashi lakhi shiveni.’#Bot 2:24; Efe 5:31 6Ikehu pama ye kini kumovae, ikemu ashi lakhiae. Tighenguno Alhou no kiu kime küqhavetsü akeno timi khuu pelomu hexavetsü pekevilo.” 7Phariseemi no pa vilo pi, “Imaye Moses ye kushiye aküghüxa shepe süghi no anipu pheve lopi azah tsü kea?” 8Jisü no panoqo vilo pi, “Nongu mlo kümka ghenguno Moses no nongu ye anipu phevelu nanie pike thono abothu lono tishi cheghike kumoe. 9Eno I no nongu vilo piani: anipu no shupu-salhave keu ghenguno kumo aye, timi khuu no pa nipu pheve no kütami sasü külaveni keno pa ye salha ani.”
10Akhopemi no pa vilo pi, “Akimi ngo anipu dolo hitoi aghi aye, külau move keu pavie.” 11Ikemu Jisü no panoqo vilo pi, “Khuno lau hipau tsü püani keno tipaqo likhino kumo aye kümtsü no hipau tsa pemlae. 12Kughengu apunu lono shoko shive kemi ani, khami ye timi no shoko kughulhove kemi ani, eno khami ye Kungugha yekipe ghenguno alikhi ampi pesü külamo no shoko shive kemi ani. Khuu no hi pelu nani keno pa pelo ikhilu pelo.”
Itimi pelo I lau Ighi pelo
(Mk 10:13-16; Lk 18:15-17)
13Tileno Jisü pelo pa u beno inikhu tsü penike timi khami no itimi pa lau saghi. Akhopemi no timiqo sakiyi, 14ikemu Jisü no pi, “Itimiqo lakha kevino panoqo pelo I lau ighi pelo, kughengu Kungugha yekipe ye hitoi kemi salake.” 15Pa no pa u pesü panoqo shou betsü no wuve.
Apumi Kinimi
(Mk 10:17-31; Lk 18:18-30)
16Timi lakhi no Jisü lau ighi no pi, “Shikükau, lhokta küxü ithulu nike ni ye akivi kiu mla masa kea?” 17Jisü no pa vilo pi, “No ye kushiye I vilo akivipu vehu ighiju ani kea? Milakhi likhi no akivie. Lhokta küxü lo ilonishi aye no ye azakütsü pelulo.” 18Pa no ighiju, “Khipaqo piani kea?” Jisü no pi, “No ye timi ghiqhi moni; no ye shupu-salha moni; no ye püka moni; no ye kichile thopi shimoni,#Ipe 20:13-16; Zak 5:17-20 19o pu o za gihulo, eno o likhi o toi o kisüghümi kimiyelo.”#Ipe 20:12; Zak 5:16; Achi 19:18 20Apumi huno pa vilo pi, “Ni ye hi kümtsü peluvae. Ni ye kiu pekupu lumphi kea?” 21Jisü no pa vilo pi, “Nono kupukülai lunishi aye wulo, nono aghi keu kümtsü jepe kumlhomi tsüvelo, no ye kungugha lo o küakini aniae; tishino ighi püzü I papelo.” 22Kughou apumi huno hi chilu keno pa ye amloksa shi wuve, kughengu pa ye amheghi kütsasa pighi chekemi ke.
23Tileno Jisü no pa khopemi vilo pi, “Kuchou no I no nongu vilo piani, kinimi lakhi no Kungugha yekipe lo iloluni keu ye kushokütsüe. 24Itaghi I no nongu vilo piani, kinimi lakhi no Alhou yekipe lo iloluni keu ye sayeshi#19:24 Camel no ayipuki lono ipu ipeve keu no akümlaue.” 25Kughou akhopemi no hi chilu keno panongu ye shishe akümzave eno pi, “Imaye khunoqo xalu nani kea?” 26Jisü no panoqo jupüzü pi, “Timi ghengu ye kushokütsüpu kemu Alhou ghengu ye thokha kümtsü shilu nani.” 27Tile Peter no khochile, “Julo, ningu ye thokha kümtsü qhive no o pape cheni. Imaye ningu ye kiu ithulu nani kea?” 28Jisü no panoqo vilo pi, “Kuchou no I no nongu vilo piani, ayeghiqha kithe lo kughou Timi Nu no pa juküvü lakhü lo iqani keno, nongu I pape chekeqo ghi kükalakhü chighikini lo iqa no Israel shiaye chighikini shou küghathabe nani. 29Eno khunono I je ghenguno aki-alu, chepu-cheli, apuaza, atianuli, momu ayeghi qhive keno, panongu ye ghuthu aqhe piqi ithulu nani, eno lhokta küxü mheghi ithulu nani. 30Ikemu khunono atüghümi keno kutomo no ashekhami shive nani, eno ashekhami no atüghümi shive nani.”
Currently Selected:
MATTHEW 19: SUMRVBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More