MATTHEW 18
18
Khuu no Akijeu Kea?
(Mk 9:33-37; Lk 9:46-48)
1Tipa tüqhüdo lo akhopemi no Jisü lau ighi no ighiju, “Kungugha yekipe lo khuu no akijeu kea?” 2Jisü no itimi lakhi kusawo panongu mta lo qhi 3eno pi: “Kuchou no I no nongu vilo piani, nongu no aküxü kililu no itimi toi shimo kelo nongu ye khilemu Kungugha yekipe lo ilomo nani. 4Khukhumu pa ampi kuchunipe itimi hipau toi shikeu no Kungugha yekipe lo kümtsü nguno akijeue.
5“Khukhumu I je lono itimi hitoi kemi ikhilu keu ye ni ikhilu ani, 6ikemu khunono I pülü chekemi itimi hipaqo gholo lakhi pelomu küpxa luve peni keno, pa ghengu ye akuo lo athi kütsüghü tuqu tshüqhi pusü azüghi kutho lono pütsüqhive keu pavi nani.
Axine lo Ghuju Sawuve
(Mk 9:42-48; Lk 17:1-2)
7“Axine lo ghuju sawuve keu ghenguno ayeghiqha hasapue! Kughengu ghukuju ye ighi masa nani, ikemu khuu vecheo ghukuju ighini keno pa haküsapue! 8O u momu o pukhu no o pelo axine shipe aghi aye michepe pevelo. O ghenguno apukhu momu au xapusü alhomi lo vesüve pekepu ye apukhu momu au lakhi kühano aküxüpu lo ilove keu pavie. 9O nhethi no o pelo axine shipe aghi aye lejope pevelo. O ghenguno anhethi kini xapusü amiyizü lo vesüve pekepu ye anhethi lakhi likhi pusü aküxüpu lo ilove keu pavie.
Pühavekeu Ambe
(Lk 15:3-7)
10“Mthamini nongu ye hi kititiqo gholo lakhi mu jukünathalu nosake tsükhüi lo, kughengu I no nongu vilo piani, panoqo kheu kungumi ye pülhapuju I Pu kungugha lo akeu zülo acheni. 11[Kughengu Timi Nu ye pühave keqo xaluni ke ighie.] 12“Nongu ye kiu kümsü ania? Timi lakhi no ambe 100 akelo lakhi no kauve aye, pa ye lhotoku toku hu ato lo achu kümza püaghi püzü lakhi kauve keu phuwu moni keshea? 13Eno pa no ti phulu aye, kuchou no I no nongu vilo piani, pa ye ambe lhotoku toku pühamo no akeqo nguno alau hi ambe lakhi shou alovi nani. 14Ikehu I Pu kungugha lo akeu pulou ye hi kititiqo gholo lakhi mu pühave penishi moe.
O thiküzüu no Axine Shiaye
15“O thiküzüu no o shou axine shiaye, pa lau wuno lomoshi pa kipimi pilo. Pa no o tsa initsü aye, no ye o thiküzüu züluvae. 16Ikemu pa no o tsa ini tsümo aye, o gholo milakhi kini sawulo, tishianguno ngukukile keu kümtsü mikini momu miküthü vecheo thopi shipeni. 17Pa no tipaqo tsa ini tsümo aye akukuhou vilo pilo. Eno pa no akukuhou tsa ghi initsü move aye, pa pesü ayekümthami momu asüqha küqhami toi peithalo.” 18“Kuchou no I no nongu vilo piani, nongu no ayeghi lo kiu tsüghani keno kungugha lo ghi tsügha nani eno nongu no ayeghi lo kiu kuqhoni keno kungugha lo ghi kuqho nani. 19Itaghi I no nongu vilo piani, ayeghi lo nongu gholo mikini no kiu kiumu pulo küqha no inikhu aye, I Pu kungugha lo akeu no ti shitsü nani. 20Kughengu I je lono khilehi mikini momu miküthü kumqoni keno ni ye tile panoqo gholo ani.”
Akipimi Qhitsümla keu Qeu
21Tile Peter no Jisü lau ighi no iniju, “Ampeu, I thiküzümi lakhi ye ghuthu khije I shou axine shilu nani, eno ni ye ghuthu khije pa kipimi qhitsülu nani kea? Ghuthu tsüni keo?” 22Jisü no pa khochile, “Ni ye o vilo ghuthu tsüni piamoe, ikemu lhotsüni no ghuthu tsüni piani.”
23“Tighenguno Kungugha yekipe ye kükami lakhi no pa qemi sasü kihikülai juniye aketoie. 24Kughou pa no kihikülaithu keno, aqeu lakhi ghüka 10,000 shou pa pi xapu akeu pa lau saghi. 25Ikemu pa no api lochile mla kepu shive kehu, ampeu ye aqeu hu jeve penike azah tsü, eno pa gholono anipu, atianuli eno pa no kiu ache keno, qhoi süküqha püzü love penikeu shi. 26Ikelo aqeu huno pa mpeu zülo qhoqhünhepe qhüiniju pi, ‘I no o lokhave nanike kimiye no kutuu tsü aghilo.’ 27Ampeu no aqeu kimiyeve püzü api qhikhave tsüno phepuwuve. 28Ikemu aqeu huno ipeve kethiu pa no pa küsau aqemi lakhi ghüka 100 pa pi xapu akeu sasü kusholu, ikelo tipau küghape tsüqüqhi püzü pi, ‘Nono I pi xapu akeu tsüvelo.’ 29Pa küsau aqeu huno itsaqi no pa qhüiniju pi, ‘I no o lochileve nanike kutuu tsü aghilo.’ 30Ikemu pa no milive no pa küsau aqeu huno api lomoke kutolo akughuki lo khathave. 31Kughou pa küsami aqemi kütami no hi ithive keno, panongu ye shishe amlo kütakihive eno ampeu vilo kiu shive keno qhoi pivetsü. 32Tileno pa mpeu no aqeu hu kusaghipe eno pa vilo pi, ‘No kixikila qeu! Nono I qhüiniju kehu I no o piagha kümtsü qhivetsü. 33Ikehu I no o kimiyeqhiyi ketoi no ghi o küsau kimiyeqhiyi kepu shiake kumo?’ 34Eno pa xukighide lono aqeu huno api lokha moke kutolo ghime penike aghime kütsümi u lo süvetsü. 35Ikehu nongu no amlo lono no thiküzümi kipimi peve tsümo aye, I Pu kungugha lo akeu no hitoi nongu lakhikhi lau shinani.”
Currently Selected:
MATTHEW 18: SUMRVBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More